കുവൈത്ത് സിറ്റി: കുട്ടികളുടെ അവകാശങ്ങള്‍ സംരക്ഷിക്കുന്നതിനും കുടുംബ സ്ഥിരത ശക്തിപ്പെടുത്തുന്നതിനും ലക്ഷ്യമിട്ടുള്ള നിയമനിര്‍മ്മാണ ഭേദഗതികളെത്തുടര്‍ന്ന് വിവാഹത്തിനുള്ള കുറഞ്ഞ പ്രായം 18 ആയി ഉയര്‍ത്തിയതായി കുവൈത്ത് നീതിന്യായ മന്ത്രി നാസര്‍ അല്‍ സുമൈത്.

18 വയസ്സിന് മുമ്പ് വിവാഹം നടത്താന്‍ കഴിയില്ലെന്ന് ഉറപ്പാക്കിക്കൊണ്ട്, 51/1984 ലെ പേഴ്‌സണല്‍ സ്റ്റാറ്റസ് നിയമത്തിലെ ആര്‍ട്ടിക്കിള്‍ 26, ജാഫാരി പേഴ്‌സണല്‍ സ്റ്റാറ്റസ് നിയമം നമ്പര്‍ 124/2019 ലെ ആര്‍ട്ടിക്കിള്‍ 15 എന്നിവയില്‍ കുവൈത്ത് സര്‍ക്കാര്‍ മാറ്റങ്ങള്‍ വരുത്തി.

കുട്ടികളുടെ അവകാശങ്ങള്‍ക്കായുള്ള കണ്‍വെന്‍ഷന്‍, സ്ത്രീകള്‍ക്കെതിരായ എല്ലാത്തരം വിവേചനങ്ങളും ഇല്ലാതാക്കുന്നതിനുള്ള കണ്‍വെന്‍ഷന്‍ എന്നിവയുള്‍പ്പെടെയുള്ള അന്താരാഷ്ട്ര കരാറുകളെയും ഉടമ്പടികളെയും മാനിച്ചാണ് കുവൈത്തിന്റെ നിര്‍ണായക തീരുമാനം.

കുവൈത്തിലെ ശൈശവ വിവാഹത്തെക്കുറിച്ചുള്ള സ്ഥിതിവിവരക്കണക്കുകള്‍ അടിസ്ഥാനമാക്കി 2024 ല്‍ 1,145 ശൈശവ വിവാഹങ്ങള്‍ രജിസ്റ്റര്‍ ചെയ്തതായി അല്‍ സുമൈത് വെളിപ്പെടുത്തി. ഇതില്‍ 1,079 പെണ്‍കുട്ടികളും 66 ആണ്‍കുട്ടികളും ഉള്‍പ്പെടുന്നു.

പ്രായപൂര്‍ത്തിയാകാത്തവര്‍ക്കിടയിലെ വിവാഹമോചന നിരക്ക് മുതിര്‍ന്നവരെ അപേക്ഷിച്ച് ഇരട്ടിയാണെന്ന് പഠനങ്ങള്‍ തെളിയിച്ചിട്ടുണ്ട്. വിവാഹത്തിന് മുമ്പ് ഇണകള്‍ വൈകാരികവും സാമൂഹികവുമായ പക്വതയിലെത്തുന്നുവെന്ന് ഉറപ്പാക്കാന്‍ നിയമനിര്‍മ്മാണ ഇടപെടലിന്റെ അനിവാര്യമായിരുന്നു.

കുടുംബങ്ങളെയും കുട്ടികളെയും സംരക്ഷിക്കുന്നതിനുള്ള കുവൈത്തിന്റെ ഭരണഘടനാപരമായ പ്രതിബദ്ധതയിലാണ് നിയമ പരിഷ്‌കരണം വേരൂന്നിയിരിക്കുന്നതെന്ന് മന്ത്രി പറഞ്ഞു.

ഭരണഘടനയുടെ ആര്‍ട്ടിക്കിള്‍ 9 കുടുംബത്തെ 'സമൂഹത്തിന്റെ അടിത്തറ' ആയി നിര്‍വചിക്കുകയും മാതൃത്വത്തിന്റെയും ബാല്യത്തിന്റെയും സംരക്ഷണം നിര്‍ബന്ധമാക്കുകയും ചെയ്യുന്നു. അതേസമയം ആര്‍ട്ടിക്കിള്‍ 10, പ്രായപൂര്‍ത്തിയാകാത്തവരെ ചൂഷണം ചെയ്യുന്നതും അവഗണിക്കുന്നതും തടയുന്നതിനുള്ള സര്‍ക്കാരിന്റെ കടമയെ ശക്തിപ്പെടുത്തും.

വിവാഹ പ്രായം ഉയര്‍ത്തുന്നതിലൂടെ, യുവാക്കളെ സംരക്ഷിക്കുന്നതിനും വിവാഹമോചന നിരക്കുകള്‍ കുറയ്ക്കുന്നതിനും കുടുംബ സ്ഥിരത പ്രോത്സാഹിപ്പിക്കുന്നതിനുമുള്ള നിര്‍ണായക ചുവടുവയ്പ്പാണ് കുവൈത്ത് സ്വീകരിക്കുന്നതെന്ന് അല്‍ സുമൈത് പറഞ്ഞു.

'കുട്ടികളെ ശൈശവ വിവാഹത്തില്‍ നിന്ന് സംരക്ഷിക്കുന്ന അന്താരാഷ്ട്ര മാനദണ്ഡങ്ങളോടുള്ള കുവൈത്തിന്റെ പ്രതിബദ്ധതയാണ് ഈ ഭേദഗതി പ്രതിഫലിപ്പിക്കുന്നത്. ഇത് കുടുംബ ഐക്യം വര്‍ധിപ്പിക്കുകയും വിവാഹമോചന നിരക്കുകള്‍ കുറയ്ക്കുകയും സാമൂഹിക വികസനത്തെ പിന്തുണയ്ക്കുകയും ചെയ്യുമെന്നാണ് പ്രതീക്ഷിക്കുന്നത്.' അദ്ദേഹം പറഞ്ഞു.

Kuwait has made a decisive change in the age of marriage