മാമ്പഴക്കാലമായി. വീട്ടുമുറ്റത്തെ മാവില്‍ പാകമെത്തിയ മാങ്ങമുതല്‍ കണ്ണിമാങ്ങകള്‍ വരെ നിറഞ്ഞുനില്‍ക്കുന്നുണ്ടാവും. കേരളത്തിലെ ശുദ്ധമായ കാലാവസ്ഥയും സമൃദ്ധമായ മണ്ണും മാവ് പൂക്കാന്‍ അനുകൂലമാണ്.  പലതരം മാങ്ങകള്‍ നാട്ടിലുണ്ട്. കിളിച്ചുണ്ടന്‍, മൂവാണ്ടന്‍, കോമാങ്ങ, നാട്ടുമാങ്ങ തുടങ്ങിയ മാങ്ങയിനങ്ങളാണ് ഒട്ടുമിക്ക ആളുകളുടേയും വീട്ടിലുണ്ടാവുക. 

അച്ചാറിടാനും ഉപ്പിലിടാനും മാത്രമല്ല മാങ്ങ പഴുപ്പിച്ച് കഴിക്കാനും മലയാളികള്‍ക്ക് ഇഷ്ടമാണ്. പാകമെത്തിയ പച്ചമാങ്ങകള്‍ പറിച്ച് കറ കളഞ്ഞ് വൃത്തിയാക്കി പഴുപ്പിക്കാന്‍ വയ്ക്കുന്ന ശീലം പണ്ടുതൊട്ടേ നമ്മള്‍ക്കുണ്ട്. ചാക്കില്‍ കെട്ടി സൂക്ഷിക്കുന്നവരും വെളിച്ചം തട്ടാത്ത ഇരുട്ട് മുറിയില്‍ താഴെ സൂക്ഷിക്കുന്നവരുമുണ്ട്. പെട്ടെന്ന് പഴുത്ത് കിട്ടാന്‍ കൊന്നയുടെ ഇല മുകളിലായ് വയ്ക്കാറുണ്ട്. ഇത്ര നന്നായി സംരക്ഷിച്ച മാമ്പഴം പഴുത്ത ശേഷം കഴിക്കാന്‍ നോക്കുമ്പോള്‍ പുഴുവിനെ കണ്ടാലോ?.. അത്തരം സാഹചര്യം നിങ്ങള്‍ക്കുണ്ടായിട്ടുണ്ടോ?.. എന്നാലിനി കൊതിയോടെ ക്ഷമയോടെ കാത്തിരുന്ന് അവസാനം നിരാശപ്പെടേണ്ടി വരില്ല. മാമ്പഴത്തില്‍ പുഴുവരാതിരിക്കാന്‍ ഒരു മാര്‍ഗമുണ്ട്. 

പാകമെത്തിയ മാങ്ങ പറിച്ചുവച്ചതിന് ശേഷം കായീച്ചയുടെ മുട്ടകള്‍ നശിപ്പിച്ചശേഷം പഴുപ്പിക്കുകയാണ് ചെയ്യുന്നത്. മാങ്ങയുടെ തൊലിയിലെ കായീച്ചകളുടെ മുട്ടകള്‍ (ചിലപ്പോള്‍ പെട്ടെന്ന് കാണാന്‍ സാധിക്കില്ല) നശിപ്പിച്ചെങ്കില്‍ മാത്രമേ നല്ല പുഴുവില്ലാത്ത മാമ്പഴം കഴിക്കാന്‍ കഴിയൂ. 

ഇവയെ നശിപ്പിക്കാന്‍ ഇളം ചൂടു വെള്ളത്തില്‍ അല്‍പം ഉപ്പു ചേര്‍ത്ത് മാങ്ങ മുക്കിവയ്ക്കണം (അതായത് ഒരു ബക്കറ്റ് തിളച്ചവെള്ളത്തില്‍ മുക്കാല്‍ ബക്കറ്റ് പച്ചവെള്ളം ഒഴിച്ച് ലീറ്ററിന് ഒരു ഗ്രാം എന്ന തോതില്‍ കറിയുപ്പ് ചേര്‍ക്കണം). മിനിമം 15 മിനിറ്റെങ്കിലും ഈ വെള്ളത്തില്‍ മുക്കിവയ്ക്കണം. അതിനു ശേഷം സാധാരണവെള്ളത്തില്‍ കഴുകി നല്ല വൃത്തിയുള്ള കോട്ടണ്‍ തുണി ഉപയോഗിച്ച് തുടച്ച ശേഷം പഴുപ്പിക്കാന്‍ വച്ചാല്‍ പുഴുവില്ലാത്ത മാമ്പഴം ലഭിക്കും.

മാങ്ങയെ അത്ര നിസാരക്കാരനായി കരുതേണ്ട, നിരവധി ആരോഗ്യഗുണങ്ങളുള്ള പഴമാണ് മാങ്ങ. വിറ്റാമിന്‍ സി, വിറ്റാമിന്‍ എ, ഫൈബര്‍ തുടങ്ങി ഇരുപതിലധികം വ്യത്യസ്ത വിറ്റാമിനുകളും ധാതുക്കളും മാങ്ങയിലുണ്ട്. ഒരു മുക്കാല്‍ കപ്പ് മാങ്ങ കഴിക്കുന്നതിലൂടെ ദിവസേനയുള്ള വിറ്റാമിന്‍ എയുടെ 8%, വിറ്റാമിന്‍ സിയുടെ 50%, വിറ്റാമിന്‍ ബി 6ന്റെ 8% എന്നിവ നിങ്ങള്‍ക്ക് ലഭിക്കും. കൂടാതെ പ്രതിരോധശേഷി വര്‍ദ്ധിപ്പിക്കാനും ദഹന പ്രക്രിയ മികച്ചതാക്കാനും സഹായിക്കുന്നു. 

Learn how to remove fruit fly eggs, use simple preservation techniques, and enjoy the health benefits of mangoes, packed with vitamins and fiber.