വിശാഖപട്ടണം: ഐപിഎല്ലിൽ സൺറൈസേഴ്‌സ് ഹൈദരാബാദിനെതിരെ മിന്നും ബൗളിംഗ് പ്രകടനവുമായി ഡൽഹി ക്യാപ്പിറ്റൽസിന്റെ ഓസ്‌ട്രേലിയൻ പേസർ മിച്ചൽ സ്റ്റാർക്ക്. ഹൈദെരാബാദിനെതിരെ അഞ്ചു വിക്കറ്റുകൾ വീഴ്ത്തിയാണ് സ്റ്റാർക്ക് തിളങ്ങിയത്. മത്സരത്തിൽ ടോസ് നേടിയ ഓറഞ്ച് ആർമി ബാറ്റിംഗ് തെരഞ്ഞെടുക്കുകയായിരുന്നു. മത്സരത്തിൽ ആദ്യം ബാറ്റ് ചെയ്ത ഹൈദരാബാദ് 18.4 ഓവറിൽ 163 റൺസിന്‌ പുറത്താവുകയായിരുന്നു. 

സ്റ്റാർക്ക് 3.4 ഓവറിൽ 35 റൺസ് വിട്ടുനൽകിയാണ് അഞ്ചു വിക്കറ്റുകൾ സ്വന്തമാക്കിയത്. ഇതോടെ ഐപിഎല്ലിൽ ഫൈഫർ നേട്ടം സ്വന്തമാക്കുന്ന ഏറ്റവും പ്രായം കൂടിയ രണ്ടാമത്തെ താരമായി മാറാനും സ്റ്റാർക്കിനു സാധിച്ചു. തന്റെ 35 വയസിലാണ് സ്റ്റാർക്ക് ഈ നേട്ടം കൈവരിച്ചത്. 34 വയസുള്ളപ്പോൾ ഐപിഎല്ലിൽ അഞ്ചു വിക്കറ്റുകൾ നേടിയ മോഹിത് ശർമയെ മറികടന്നാണ് സ്റ്റാർക്ക് രണ്ടാം സ്ഥാനത്തേക്ക് മുന്നേറിയത്.

2023 സീസണിൽ ഗുജറാത്ത് ടൈറ്റൻസിനായി മുംബൈ ഇന്ത്യൻസിനെതിരെയായിരുന്നു മോഹിത് ഈ നേട്ടം സ്വന്തമാക്കിയിരുന്നത്. ഈ റെക്കോർഡിൽ ഒന്നാം സ്ഥാനത്തുള്ളത് അനിൽ കുംബ്ലെയാണ്. 38 വയസുള്ളപ്പോൾ റോയൽ ചലഞ്ചേഴ്‌സ് ബെംഗളൂരുവിന് വേണ്ടിയാണ് കുംബ്ലെ ഈ നേട്ടം കൈവരിച്ചത്. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സിൽ നിന്നുമാണ് സ്റ്റാർക്ക് ഡൽഹിയുടെ തട്ടകത്തിൽ എത്തിയത്. 

സ്റ്റാർക്കിനു പുറമെ ഡൽഹിക്കായി കുൽദീപ് യാദവ് മൂന്ന് വിക്കറ്റും മോഹിത് ഒരു വിക്കറ്റും സ്വന്തമാക്കി. അർദ്ധ സെഞ്ച്വറി നേടിയ അനികേത് വർമ്മയാണ് ഹൈദരാബാദ് നിരയിലെ ടോപ് സ്‌കോറർ. 41 പന്തിൽ അഞ്ചു ഫോറുകളും ആറ് സിക്സുകളും ഉൾപ്പടെ 74 റൺസാണ് താരം നേടിയത്. ഹെൻറിച്ച് ക്ലാസൻ 19 പന്തിൽ 32 റൺസും നേടി. 

ഡൽഹി ക്യാപിറ്റൽസ് പ്ലെയിങ് ഇലവൻ

ജേക്ക് ഫ്രേസർ മക്ഗുർക്ക്, ഫാഫ് ഡു പ്ലെസിസ്, അഭിഷേക് പോറെൽ (വിക്കറ്റ് കീപ്പർ), കെഎൽ രാഹുൽ, അക്സർ പട്ടേൽ (ക്യാപ്റ്റൻ), ട്രിസ്റ്റൻ സ്റ്റബ്സ്, വിപ്രരാജ് നിഗം, മിച്ചൽ സ്റ്റാർക്ക്, കുൽദീപ് യാദവ്, മോഹിത് ശർമ, മുകേഷ് കുമാർ.

സൺറൈസേഴ്‌സ് ഹൈദരാബാദ് പ്ലെയിങ് ഇലവൻ

ട്രാവിസ് ഹെഡ്, അഭിഷേക് ശർമ, ഇഷാൻ കിഷൻ, നിതീഷ് റെഡ്ഡി, ഹെൻറിച്ച് ക്ലാസൻ (വിക്കറ്റ് കീപ്പർ), അനികേത് വർമ, അഭിനവ് മനോഹർ, പാറ്റ് കമ്മിൻസ് (ക്യാപ്റ്റൻ), സീഷൻ അൻസാരി, ഹർഷൽ പട്ടേൽ, മുഹമ്മദ് ഷമി.

Mitchell Starc picks five wickets against Sunrisers Hyderabad in ipl 2025