കുവൈത്ത് സിറ്റി∙ കുവൈത്തിൽ ഇന്നലെ മുതൽ ശക്തമായ പൊടിക്കാറ്റ്. റോഡ് ഗതാഗതത്തെ ഉൾപ്പെടെ പൊടിക്കാറ്റ് പ്രതികൂലമായി ബാധിക്കുന്നുണ്ട്. ഇന്നും (April 15) പൊടിക്കാറ്റ് ശക്തമായി വീശാൻ സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. മണിക്കൂറിൽ 60 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുണ്ടെന്നും മുന്നറിയിപ്പിൽ പറയുന്നു. പൊടിക്കാറ്റ് കാരണം ദൃശ്യപരതയിൽ ഗണ്യമായ കുറവുണ്ടാകുമെന്നും ചില പ്രദേശങ്ങളിൽ 1,000 മീറ്ററിൽ താഴെയാകാനും ചില പ്രദേശങ്ങളിൽ പൂജ്യം വരെ എത്താനും സാധ്യതയുണ്ടെന്നും വകുപ്പ് പ്രവചിച്ചു. തെക്ക് നിന്ന് വടക്ക് പടിഞ്ഞാറോട്ട് ശക്തമായ കാറ്റ് പ്രതീക്ഷിക്കുന്നു. ഇതിൻ്റെ വേഗത മണിക്കൂറിൽ 60 കിലോമീറ്റർ കവിയാൻ സാധ്യതയുണ്ട്. കടൽ പ്രക്ഷുബ്ധമാകാനും ഉയർന്ന തിരമാലകൾക്കും സാധ്യതനിലനിൽക്കുന്നു. 

പൊടിക്കാറ്റ് മൂലം സർക്കാർ, സ്വകാര്യ സ്കൂളുകൾ ഓൺലൈൻ മുഖേന ക്ലാസുകൾ നടത്താൻ കുവൈത്ത് വിദ്യാഭ്യാസ മന്ത്രാലയം നിർദ്ദേശം നൽകി. കുവൈത്തിലെ ഇന്ത്യൻ സ്കൂളുകൾ ഓൺലൈൻ ക്ലാസ് സംബന്ധിച്ച് സർക്കുലർ പുറപ്പെടുവിച്ചു. ചില ഇന്ത്യൻ സ്കൂളുകൾക്ക് അവധിയും നൽകിയിട്ടുണ്ട്.

സ്കൂൾ കെട്ടിടങ്ങളിലെ ജനലുകളും വാതിലുകളും സുരക്ഷിതമായി അടച്ചിടണമെന്നും വിദ്യാഭ്യാസ മന്ത്രാലയം പുറപ്പെടുവിക്കുന്ന തീരുമാനങ്ങളെക്കുറിച്ച് അറിഞ്ഞിരിക്കണമെന്നും സർക്കുലറിൽ പറയുന്നു.

Strong Dust Storm in Kuwait; Educational Institutions turn to Online Classes