അഹമ്മദാബാദിലെ നരേന്ദ്ര മോദി സ്റ്റേഡിയത്തിന് നേരെ ബോംബ് ഭീഷണി. ഇമെയിലിലൂടെയാണ് ഭീഷണി സന്ദേശമെത്തിയത്. 'പാകിസ്ഥാൻ' എന്ന പേരിൽ ഗുജറാത്ത് ക്രിക്കറ്റ് അസോസിയേഷന് (ജിസിഎ) ലഭിച്ച ഇമെയിലിൽ "നിങ്ങളുടെ സ്റ്റേഡിയം ഞങ്ങൾ തകർക്കും" എന്ന ഭീഷണി സന്ദേശമാണുള്ളത്. ഓപ്പറേഷൻ സിന്ദൂറിന് പിന്നാലെയെത്തിയ ഭീഷണി സന്ദേശത്തിന്റെ പശ്ചാതലത്തിൽ സുരക്ഷാ ഏജൻസികൾ ഉയർന്ന ജാഗ്രത പാലിക്കുകയും അന്വേഷണം ആരംഭിക്കുകയും ചെയ്തിട്ടുണ്ട്.

അടുത്ത ആഴ്ച സ്റ്റേഡിയത്തിൽ രണ്ട് പ്രധാന ഐപിഎൽ മത്സരങ്ങൾ നടക്കാനിരിക്കെയാണ് ഈ ഭീഷണി സന്ദേശമെത്തിയത്. ഇതിനെ തുടർന്ന് സ്റ്റേഡിയത്തിലും പരിസരപ്രദേശങ്ങളിലും സുരക്ഷാ ക്രമീകരണങ്ങൾ കൂടുതൽ ശക്തിപ്പെടുത്തിയിട്ടുണ്ട്. ഗുജറാത്ത് പൊലിസും സൈബർ ക്രൈം ടീമും ഇമെയിലിന്റെ ഉറവിടം കണ്ടെത്താൻ അന്വേഷണം ആരംഭിച്ചിട്ടുണ്ട്.

ജിസിഎ ഉദ്യോഗസ്ഥർ പറ‍ഞ്ഞതു പ്രകാരം, പൊലിസുമായും സുരക്ഷാ ഏജൻസികളുമായും സ്ഥിരമായ ബന്ധം പുലർത്തിക്കൊണ്ടിരിക്കുകയാണ്. സ്റ്റേഡിയത്തിലെ എല്ലാ സുരക്ഷാ നടപടികളും കർശനമാക്കിയിട്ടുണ്ട്. ഭീഷണി സന്ദേശത്തെക്കുറിച്ച് ബിസിസിഐയെയും ഐപിഎൽ സംഘാടക സമിതിയെയും അറിയിച്ചിട്ടുണ്ടെന്നും ജിസിഎ വ്യക്തമാക്കി.

മെയ് 14-ന് ഗുജറാത്ത് ടൈറ്റൻസ് ലഖ്നൗ സൂപ്പർ ജയന്റ്സ് മത്സരവും, മെയ് 18-ന് ചെന്നൈ സൂപ്പർ കിംഗ്സ് മത്സരങ്ങവുമാണ് ഇനി ഇവിടെ നടക്കാനിരിക്കുന്നത്. 1,32,000 പ്രേക്ഷകരെ ഉൾക്കൊള്ളാനാകുന്ന ഈ സ്റ്റേഡിയം ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയമാണ്. ഭീഷണിയുടെ സത്യാവസ്ഥ വിശദമായി അന്വേഷിക്കുന്നുണ്ടെന്നും ഏത് സാഹചര്യവും നേരിടാൻ തയ്യാറാണെന്നും പൊലിസ് വ്യക്തമാക്കി. സ്ഥലത്തെ സുരക്ഷാ ഏർപ്പാടുകൾ ഇതിനകം ശക്തിപ്പെടുത്തിയിട്ടുണ്ടെന്നും പൊലിസ് അറിയിച്ചു.

A chilling bomb threat targeting Ahmedabad’s Narendra Modi Stadium has sparked high alert after an email—signed under "Pakistan"—warned, "We will destroy your stadium." The threat comes ahead of key IPL matches scheduled on May 14 & 18, prompting intensified security measures. Gujarat Police and cybercrime teams are investigating the email’s origin, while authorities assure full preparedness.