എന്തെങ്കിലും ചെറിയ പച്ചക്കറികള്‍ എങ്കിലും വീട്ടില്‍ നട്ടുപിടിപ്പിക്കാത്തവര്‍ കുറവായിരിക്കും. വീട്ടമ്മമാര്‍ അധികവും എന്തെങ്കിലുമൊക്കെ വീട്ടില്‍ നട്ടുപിടിപ്പിക്കാറുണ്ട്. നമ്മുടെ ആവശ്യത്തിനുളള പച്ചക്കറികള്‍ വീട്ടില്‍ തന്നെ ഉണ്ടാവുന്നതാണെങ്കില്‍ അത് തരുന്ന സന്തോഷവും വലുതാണ്. മാത്രമല്ല വിഷാംശമില്ലാത്ത ആഹാരം കഴിക്കുക എന്നതാണ് വലിയ കാര്യം. എന്നാല്‍ വീട്ടിലെ പച്ചക്കറികളെയും ചെടികളെയും തഴച്ചു വളര്‍ത്താന്‍ നല്ലൊരു വിദ്യയുണ്ട്.

ഒരു രൂപ പോലും ചിലവാക്കേണ്ടി വരാത്ത ഒരു ടെക്‌നിക്കാണ് ഇത്. കാരണം എന്നും നമ്മുടെ വീട്ടിലുള്ള ഒരു സാധനം തന്നെയാണിത്. എല്ലാവരുടെയും വീട്ടില്‍ കഞ്ഞിവെള്ളം ഉണ്ടായിരിക്കും. ചോറു വച്ചു കഴിഞ്ഞാല്‍ കഞ്ഞി വെള്ളം പിന്നെ കുടിക്കുകയോ ബാക്കിവരുന്നത് കളയുകയോ ചെയ്യുന്നവരാണ് മിക്കവരും. എന്നാലിനി കളയാതെ എടുത്തു വയ്ക്കുക.

ഒരു ദിവസം പുളിപ്പിച്ചെടുത്ത കഞ്ഞി വെള്ളമാണ് ഇതിനാവശ്യം. ഒരു പഴയബക്കറ്റില്‍ ഒരു ദിവസം പുളിച്ച  കഞ്ഞിവെള്ളം ഒഴിച്ചുവയ്ക്കുക. അതിനോടൊപ്പം തന്നെ അടുക്കളയിലെ ആവശ്യമില്ലാത്ത വേസ്റ്റ് എല്ലാം ആ വെള്ളത്തിലേക്ക് ഇട്ടു കൊടുക്കുകയും ചെയ്യാം. ഉള്ളിയുടെയും ഉരുളക്കിഴങ്ങിന്റെയും വെളുത്തുള്ളിയുടെയും പഴത്തിന്റെയും മുട്ടത്തോടും ഒക്കെ അതിലേക്കിട്ടു കൊടുക്കുക. 

അതുപോലെ പച്ചക്കറികളുടെയും പഴങ്ങളുടെയുമൊക്കെ വേസ്റ്റും ചീഞ്ഞുപോയ പച്ചക്കറിയുണ്ടെങ്കില്‍ അതും ഇട്ടു കൊടുക്കാവുന്നതാണ്. ഒരാഴ്ച ഇങ്ങെനെ കഞ്ഞിവെള്ളം വച്ച് അതിലേക്ക് ഓരോദിവസവും പുളിച്ച കഞ്ഞിവെള്ളവും വേസ്റ്റും ഇട്ടുകൊടുക്കുക. ദിവസവും ഇത് സൂക്ഷിച്ചു വയ്ക്കണം. അടച്ചൊന്നും വയ്ക്കണമെന്നില്ല. തുറന്നിരിക്കുന്നത് തന്നെയാണ് നല്ലത്. ഇങ്ങനെ കഞ്ഞിവെള്ളം ഏഴുദിവസമാണ് വയ്‌ക്കേണ്ടത്.

ഇതിലേക്ക് മൂന്നിരട്ടി വെള്ളം കൂടെ ഒഴിച്ച് അരിച്ചെടുക്കുക. ഇനി ചെടികള്‍ക്ക് ഒഴിച്ചു കൊടുത്തുനോക്കൂ... അരിച്ചെടുത്ത വേസ്റ്റും ചെടികളുടെ ചുവട്ടിലിട്ടു കൊടുക്കാവുന്നതാണ്.  എന്നിട്ട് മണ്ണിട്ട് മൂടിയാല്‍ മതിയാവും. ഇതു നല്ലൊരു വളമാണ്. അതുകൊണ്ട് പച്ചക്കറികള്‍ നന്നായി വളരാനും വീട്ടില്‍ വേസ്റ്റ് ഇല്ലാതിരിക്കാനും ഇതു കാരണമാവുന്നു. ഏറ്റവും നല്ല വളമായ ഈ വളം എല്ലാവരും പരീക്ഷിക്കേണ്ടതു തന്നെയാണ്.