അമൃത്സര്‍: പഞ്ചാബില്‍ വ്യാജമദ്യം കഴിച്ച് 15 മരണം. പഞ്ചാബിലെ അമൃത്സര്‍ ജില്ലയില്‍ മജിതയിലെ മധായ്, ഭഗ്ലി ഗ്രാമങ്ങളിലാണ് മദ്യദുരന്തമുണ്ടായത്. നിരവധി പേര്‍ ചികിത്സയിലാണെന്നും ഇതില്‍ ആറ് പേരുടെ നില ഗുരുതരമാണെന്നും റിപ്പോര്‍ട്ടുകള്‍ പറയുന്നു. 

മദ്യം കഴിച്ചവര്‍ക്ക് ഇന്നലെ രാത്രിയോടെയാണ് അസ്വസ്ഥതകളുണ്ടായത്. നിരവധി പേര്‍ വിവിധ ആശുപത്രികളില്‍ ചികിത്സ തേടി. തുടര്‍ന്ന് വ്യാജമദ്യത്തിന്റെ പ്രധാന വിതരണക്കാരനായ പ്രഭ്ജീത് സിങ് എന്നയാളെ അറസ്റ്റ് ചെയ്തതായി അമൃത്സര്‍ എ.എസ്.പി മനീന്ദര്‍ സിങ് പറഞ്ഞു.

'ഇന്നലെ രാത്രി 9.30ഓടെയാണ് വിഷ മദ്യം കഴിച്ച് ആളുകള്‍ മരിക്കുന്നുവെന്ന വിവരം ഞങ്ങള്‍ക്ക് ലഭിച്ചത്. ഉടന്‍ തന്നെ നടപടി സ്വീകരിച്ച് നാല് പേരെ കസ്റ്റഡിയിലെടുത്തു' -എ.എസ്.പി പറഞ്ഞു.

ഉടന്‍തന്നെ  ഗ്രാമങ്ങളിലേക്ക് മെഡിക്കല്‍ സംഘത്തെ അയച്ചതായി അമൃത്സര്‍ ഡെപ്യൂട്ടി കമീഷണര്‍ സാക്ഷി സാഹ്നി പറഞ്ഞു. വീടുകള്‍ തോറും ചെന്ന് വിവരങ്ങള്‍ ശേഖരിക്കുകയും ചികിത്സ നല്‍കുകയും ചെയ്തിട്ടുണ്ട്. ലക്ഷണങ്ങളുള്ള എല്ലാവരെയും ആശുപത്രിയിലുമാക്കിയെന്നും ഡെപ്യൂട്ടി കമീഷണര്‍ അറിയിച്ചു.   സര്‍ക്കാര്‍ സാധ്യമായ എല്ലാ സഹായവും നല്‍കുമെന്നും കേസില്‍ അന്വേഷണം തുടരുകയാണെന്നും അദ്ദേഹം കൂട്ടിച്ചേര്‍ത്തു.

At least 15 people have died and several others are in critical condition after consuming spurious liquor in Majitha's Madhai and Bhagli villages in Amritsar, Punjab. Authorities have arrested the key supplier and launched an extensive investigation.