കയ്യില്‍ ലിക്വിഡ് മണി ഇല്ല എന്ന് കരുതി ഇനി ബസ് യാത്രക്ക് ടെന്‍ഷന്‍ വേണ്ട. കണ്ടക്ടറുമായുള്ള വഴക്കൊഴിവാക്കാന്‍ ചില്ലറ തപ്പ് കഷ്ടപ്പെടുകയും വേണ്ട. സംസ്ഥാനത്തെ എല്ലാ കെ.എസ്.ആര്‍.ടി.സി ബസുകളിലും വരുന്നൂ ഡിജിറ്റല്‍ പെയ്മെന്റ്. ജി പേയും പേ ടിഎമ്മും ഡെബിറ്റ് കാര്‍ഡുകളും ഉള്‍പ്പെടെ രാജ്യത്ത് ഉപയോഗത്തിലുള്ള എല്ലാ ഓണ്‍ലൈന്‍ പണമിടപാട് സംവിധാനങ്ങളിലൂടെയും ബസില്‍ ടിക്കറ്റ് എടുക്കാനാകുമെന്നാണ് പറയുന്നത്. 'ചലോ' ആപ്പുമായി സഹകരിച്ചാണ് പദ്ധതി നടപ്പില്‍ വരുത്താനുദ്ദേശിക്കുന്നത്. മെയ് 22 മുതല്‍ സംവിധാനം നടപ്പിലാവുമെന്നാണ് പറഞ്ഞിരുന്നത്. എന്നാല്‍ ഇത് സംബന്ധിച്ച പണികള്‍ പൂര്‍ത്തിയായി വരുന്നതായി ബന്ധപ്പെട്ടവര്‍ അറിയിച്ചു. 

ക്രെഡിറ്റ് കാര്‍ഡ് സ്വീകരിക്കില്ല. തിരുവനന്തപുരം ജില്ലയില്‍ ചില ബസുകളില്‍ നടപ്പാക്കിയ ഈ സംവിധാനം വിജയം കണ്ടതിന്റെ അടിസ്ഥാനത്തിലാണ് സംസ്ഥാനത്താകെ വ്യാപിപ്പിക്കാന്‍ തീരുമാനിച്ചതെന്ന് ഗതാഗതമന്ത്രി കെ.ബി. ഗണേഷ്‌കുമാര്‍ പറഞ്ഞു.

കെ.എസ്.ആര്‍.ടി.സിയുടെ നേരത്തെയുണ്ടായിരുന്ന ട്രാവല്‍കാര്‍ഡും പുതുക്കി ഇതില്‍ ഉപയോഗിക്കാനാകും. ബസുകളുടെ വിവരങ്ങള്‍ ചലോ ആപ്പില്‍ അപ്പ്ലോഡ് ചെയ്തിട്ടുണ്ട്. സംസ്ഥാനത്ത് സ്വകാര്യ ബസുകളില്‍ പലതിലും ഡിജിറ്റല്‍ പേമെന്റ് സംവിധാനമുണ്ട്. കെ.എസ്.ആര്‍.ടി.സി ബസുകളിലും ഡിജിറ്റല്‍ പേമെന്റ് വരുന്നത് യാത്രക്കാര്‍ക്ക് ഏറെ സൗകര്യപ്രദമാകും. സ്വിഫ്റ്റ് ബസുകളിലും കാര്‍ഡ് ഉപയോഗിക്കാം.

അതേസമയം, നിലവിലുള്ള രീതിയില്‍ പണം നല്‍കി നേരിട്ട് ടിക്കറ്റെടുക്കുന്ന സംവിധാനം ഇനിയും തുടരും. ഏതുരീതി വേണമെന്നത് യാത്രക്കാര്‍ക്ക് തിരഞ്ഞെടുക്കാം. ട്രാവല്‍കാര്‍ഡ് എന്റെ കേരളം പ്രദര്‍ശനത്തില്‍ വില്‍ക്കുന്നുണ്ട്. കാര്‍ഡിന് 100 രൂപയാണ് വില. പിന്നീട് റീചാര്‍ജ് ചെയ്യാം. ഡിപ്പോകളില്‍ ട്രാവല്‍കാര്‍ഡ് ലഭിക്കും.

യാത്രക്കാര്‍ക്കുള്ള പ്രയോജനങ്ങള്‍ : ചില്ലറപ്രശ്നവും അതേച്ചൊല്ലിയുള്ള തര്‍ക്കങ്ങളും ഒഴിവാക്കാം. ടിക്കറ്റ് ചാര്‍ജിനുള്ള പണം കൈയില്‍ കരുതണമെന്നില്ല. ബാക്കി വാങ്ങാന്‍ മറന്നുപോകുമെന്ന പ്രശ്നമില്ല. യാത്രയ്ക്കിടെ ടിക്കറ്റ് നഷ്ടപ്പെട്ടാലും തുക ട്രാന്‍സ്ഫര്‍ചെയ്തു എന്നതിന് തെളിവുണ്ടാകും.