തിരുവനന്തപുരം:നിലയ്ക്കാത്ത മഴയില്‍ താളം തെറ്റി ട്രെയിന്‍ ഗതാഗതം. ശക്തമായ കാറ്റില്‍ സ്റ്റേഷനുകള്‍ക്കിടയിലെ റെയില്‍വേ ട്രാക്കിലേക്ക് മരം വീണതിനെത്തുടര്‍ന്നാണ് ട്രെയിന്‍ ഗതാഗതം താറുമാറായത്. 

സംസ്ഥാനത്ത് വിവിധ ട്രെയിനുകള്‍ വൈകിയാണ് ഓടിക്കൊണ്ടിരിക്കുന്നത്. മൈസൂര്‍ -തിരുവനന്തപുരം എക്‌സ്പ്രസ് ഒന്നേകാല്‍ മണിക്കൂര്‍ വൈകിയാണ് എറണാകുളം പിന്നിട്ടത്. കചെഗുഡ മുരുഡേശ്വര്‍ എക്‌സ്പ്രസ് 50 മിനിറ്റ് വൈകി കോഴിക്കോടും പിന്നിട്ടു. 06555 നമ്പര്‍ ബംഗളൂരു - തിരുവനന്തപുരം സ്‌പെഷ്യല്‍ ട്രെയിന്‍ ഒന്നര മണിക്കൂര്‍ വൈകി തിരുപ്പൂര്‍ പിന്നിട്ടിട്ടുണ്ട്.

ഗോരഖ്പൂര്‍ തിരുവനന്തപുരം രപ്തിസാഗര്‍ എക്‌സ്പ്രസ് നാലര മണിക്കൂര്‍ വൈകി കട്പാടിയും പിന്നിട്ടു. ഗുരുവായൂര്‍ ചെന്നൈ എക്‌സ്പ്രസ് ഒരു മണിക്കൂര്‍ വൈകി തിരുവനന്തപുരം പിന്നിട്ടു. അപ്രതീക്ഷിത വൈകലുകള്‍ക്ക് സാധ്യത ഉള്ളതിനാല്‍ യാത്രയ്ക്ക് മുന്‍പ് ട്രെയിനിന്റെ സമയം തത്സമയ വിവരങ്ങള്‍ നല്‍കുന്ന റെയില്‍വേ ആപ്പില്‍നോക്കി യാത്രക്കാര്‍ ഉറപ്പാക്കണം.