കൊല്‍ക്കത്ത: ഓപ്പറേഷന്‍ സിന്ദൂറിനെക്കുറിച്ച് സംസാരിക്കുന്നതിനിടെ ഒരു സമുദായത്തെക്കുറിച്ച് മോശമായ ഭാഷയില്‍ സംസാരിച്ചതിന് അറസ്റ്റിലായ സോഷ്യല്‍ മീഡിയാ ഇന്‍ഫ്‌ളുവന്‍സര്‍ ശര്‍മിഷ്ഠ പനോളിയുടെ ജാമ്യഹരജി തള്ളി കൊല്‍ക്കത്ത ഹൈക്കോടതി. നേരത്തേ ഇന്‍സ്റ്റഗ്രാമിലൂടെ നടത്തിയ പരമാര്‍ശങ്ങള്‍ ഏറെ വിവാദമായിരുന്നു. വിവാദമായതിനു പിന്നാലെ യുവതി വിഡിയോ ഡിലീറ്റ് ചെയ്തിരുന്നു.

അഭിപ്രായ സ്വാതന്ത്ര്യത്തിന്റെ പരിധി ഒരു വ്യക്തിയുടെയോ ഒരു സമൂഹത്തിന്റെയോ വികാരങ്ങളെ വ്രണപ്പെടുത്തുന്ന ഘട്ടത്തിലേക്ക് കടക്കാന്‍ പാടില്ലെന്ന്‌ കോടതി നിരീക്ഷിച്ചു.

ALSO READ: ഉപരോധം ലംഘിച്ച് ഇറാനിൽ നിന്ന് എൽപിജി; അദാനിക്കെതിരെ അന്വേഷണം പ്രഖ്യാപിച്ച് യുഎസ്, ഓഹരിയിൽ ഇടിവ്

'നോക്കൂ, നിങ്ങള്‍ക്ക് സംസാരിക്കാനുള്ള സ്വാതന്ത്ര്യമുണ്ട്, പക്ഷേ അതിനര്‍ത്ഥം നിങ്ങള്‍ക്ക് മറ്റുള്ളവരെ വേദനിപ്പിക്കാനുള്ള സ്വാതന്ത്ര്യമുണ്ടെന്നല്ല, നമ്മുടെ രാജ്യം വൈവിധ്യപൂര്‍ണ്ണമാണ്, വ്യത്യസ്ത ജാതികളില്‍ നിന്നും മതങ്ങളില്‍ നിന്നുമുള്ള ആളുകളുണ്ട്. സംസാരിക്കുമ്പോള്‍ നമ്മള്‍ ജാഗ്രത പാലിക്കണം. ഈ സംഭവം ഒരു വിഭാഗം ആളുകളുടെ വികാരം വ്രണപ്പെടാന്‍ കാരണമായി,' കേസ് പരിഗണിച്ച ജസ്റ്റിസ് പാര്‍ത്ഥ സാരഥി പറഞ്ഞു.

ഓപ്പറേഷന്‍ സിന്ദൂറിനെക്കുറിച്ചുള്ള വീഡിയോയിലൂടെ മതവികാരം വ്രണപ്പെടുത്തിയെന്നാരോപിച്ച് പൂനെയില്‍ നിന്നുള്ള 22 കാരിയായ നിയമ വിദ്യാര്‍ത്ഥിനിയായ ശര്‍മിഷ്ഠ പനോളിയെ വെള്ളിയാഴ്ച ഗുരുഗ്രാമില്‍ നിന്നാണ് കൊല്‍ക്കത്ത പൊലിസ് അറസ്റ്റ് ചെയ്തത്. 

സോഷ്യല്‍ മീഡിയയില്‍ വൈറലായ ഇന്‍സ്റ്റാഗ്രാം വീഡിയോ ഒരു മതത്തെ അവഹേളിക്കുന്നതാണെന്ന് വ്യാപകമായ പരാതി ഉയര്‍ന്നിരുന്നു. 

ALSO READ: കൊവിഡ് ജാഗ്രതയില്‍ രാജ്യം; അഞ്ച് മരണം കൂടി, കേസുകള്‍ 4000 കടന്നു

പ്രതിഷേധത്തെ തുടര്‍ന്ന്, പനോളി വിവാദ വീഡിയോകള്‍ ഡിലീറ്റ് ചെയ്യുകയും ക്ഷമാപണം നടത്തുകയും ചെയ്തിരുന്നു. പിന്നീട് ഗുരുഗ്രാമില്‍ നിന്ന് കൊല്‍ക്കത്ത പൊലിസ് യുവതിയെ അറസ്റ്റ് ചെയ്യുകയായിരുന്നു.

ശനിയാഴ്ച കൊല്‍ക്കത്തയിലെ അലിപൂര്‍ കോടതിയില്‍ ഹാജരാക്കിയ ശര്‍മിഷ്ഠ പനോളിയെ 14 ദിവസത്തേക്ക് ജുഡീഷ്യല്‍ കസ്റ്റഡിയില്‍ വിട്ടിരുന്ന.

അതിനിടെ യുവതിക്കെതിരെ പരാതി നല്‍കിയ വജാഖത്ത് ഖാന്‍ എന്ന യുവാവിനെ കാണാനില്ലെന്ന പരാതിയുമായി യുവാവിന്റെ കുടുംബം രംഗത്തു വന്നു. ശര്‍മിഷ്ഠക്കെതിരെ പരാതി നല്‍കിയതിനു ശേഷം യുവാവിനെതിരെ ഭീഷണികള്‍ ഉണ്ടായതായി കുടുംബം പറഞ്ഞു.