ഇസ്‌റാഈല്‍ ആശുപത്രിക്ക് മുകളില്‍ മിസൈല്‍ പതിച്ച സംഭവത്തില്‍ പ്രതികരണവുമായി ആരോഗ്യമന്ത്രി. ഇറാന്‍ ചെയ്യുന്നത് യുദ്ധക്കുറ്റമാണെന്നാണ് മന്ത്രിയുടെ പ്രതികരണം. ഇരാന്‍ ഭീകരാക്രമണമാണ് നടത്തുന്നതെന്നും മന്ത്രി ചൂണ്ടിക്കാട്ടി. 

'നിരപരാധികളായ സാധാരണക്കാരെയും ജീവന്‍ രക്ഷിക്കാന്‍ സമര്‍പ്പിതരായ മെഡിക്കല്‍ സംഘങ്ങളെയും മനഃപൂര്‍വ്വം ലക്ഷ്യം വച്ചുള്ള ഇറാനിയന്‍ ഭരണകൂടത്തിന്റെ യുദ്ധക്കുറ്റമാണിത്. ആരോഗ്യ മന്ത്രാലയം മുന്‍കൂട്ടി തയ്യാറായിരുന്നു, സ്വീകരിച്ച അടിയന്തര നടപടികള്‍ക്ക് നന്ദി, ഒരു വലിയ ദുരന്തം ഒഴിവായി' മന്ത്രി പറഞ്ഞു. 

സൊറോക്ക ആശുപത്രിക്ക് നേരെ ഇറാന്‍ നടത്തിയ ബാലിസ്റ്റിക് മിസൈല്‍ ആക്രമണം 'മനഃപൂര്‍വ്വം' എന്നും 'കുറ്റകരം' എന്നും ആരോപിച്ച് വിദേശകാര്യ ഉപമന്ത്രി ഷാരന്‍ ഹാസ്‌കലും രംഗത്തെത്തി. 

ALSO READ: ഇസ്‌റാഈലില്‍ ഇറാനിയന്‍ തീമഴ,നിരവധി പേര്‍ക്ക് പരുക്ക്;  തെല്‍ അവീവില്‍ ആശുപത്രിക്കു മുകളിലും മിസൈല്‍ പതിച്ചു, വിഷവാതകം ചോരുന്നതായി സംശയം, ആളുകളെ ഒഴിപ്പിക്കുന്നു

 'സൊറോക്ക ആശുപത്രിക്ക് നേരെ ഇറാന്‍ ഒരു ബാലിസ്റ്റിക് മിസൈല്‍ ആക്രമണം നടത്തി. സൈനിക താവളമല്ല. ഒരു ആശുപത്രി. നെഗേവ് മേഖലയുടെ പ്രധാന മെഡിക്കല്‍ സെന്ററാണിത്. സിവിലിയന്‍മാരെ  ലക്ഷ്യമിട്ട് മനഃപൂര്‍വ്വം ചെയ്ത കുറ്റകൃത്യമാണിത്. ലോകം ശബ്ദമുയര്‍ത്തണം,' ഷാരന്‍ ഹാസ്‌കല്‍ എക്സില്‍ ആവശ്യപ്പെട്ടു. 

മന്ത്രിമാരുടെ പ്രതികരണത്തില്‍ ശക്തമായാണ്  സോഷ്യല്‍ മീഡിയ ചോദ്യം ചെയ്യുന്നത്. ഗസ്സയില്‍ ഇസ്‌റാഈല്‍ നടത്തുന്നത് സാമൂഹിക സേവനമാണോ എന്നാണ് സോഷ്യല്‍ മീഡിയയുടെ ചോദ്യം. 55,493 പേര്‍ കൊല്ലപ്പെട്ടുവെന്നാണ് ഗസ്സയില്‍ നിന്നുള്ള ഔദ്യോഗിക കണക്ക്. ഗസ്സയിലെ ഏകദേശം 94 ശതമാനം ആശുപത്രികളും ഇസ്‌റാഈല്‍ തകര്‍ത്തിട്ടുണ്ട്. വെല്‌ളം വൈദ്യുതി തുടങ്ങി പ്രാഥമിക സംവിധാനങ്ങളും ഇസ്‌റാഈല്‍ തകര്‍ത്തു. നൂറുകണക്കിന് ആരോഗ്യ പ്രവര്‍ത്തകരാണ് ഇതിനകം ഗസ്സയില്‍ കൊല്ലപ്പെട്ടത്. ഭക്ഷണത്തിനായി കാത്തു നില്‍ക്കുന്ന മനുഷ്യരെ കൊല്ലുക എന്നതാണ് നിലവില്‍ ഗസ്സയില്‍ ഇസ്‌റാഈല്‍ ചെയ്യുന്നത്. ബുധനാഴ്ച ഗസ്സയിലൂടനീളം 30 പേരെ ഇസ്റാഈല്‍ കൊലപ്പെടുത്തി. ഇസ്റാഈല്‍- ഇറാന്‍ യുദ്ധത്തിന്റെ പശ്ചാത്തലത്തില്‍ ഗസ്സയില്‍ വംശഹത്യ വ്യാപിപ്പിച്ചിരിക്കുകയാണ് ഇസ്റാഈല്‍. മാധ്യമങ്ങളുടെ ശ്രദ്ധ ഇറാന്‍ യുദ്ധത്തിലേക്ക് മാറിയതോടെയാണിത്. ചൊവ്വാഴ്ചയും 70 പേരെ ഇസ്റാഈല്‍ ഗസ്സയില്‍ വെടിവച്ചു കൊന്നിരുന്നു. 

മധ്യ, വടക്കന്‍ ഗസ്സയിലെ സെയ്ത്തൂനിനടുത്തുള്ള മഗാസി അഭയാര്‍ഥി ക്യാംപില്‍ ഇസ്റാഈല്‍ നടത്തിയ വ്യോമാക്രമണത്തില്‍ 14 പേര്‍ കൊല്ലപ്പെട്ടു. തെക്കന്‍ ഗസ്സയിലെ ഖാന്‍ യൂനിസില്‍ ടെന്റിനു നേരെ നടത്തിയ വ്യോമാക്രമണത്തില്‍ അഞ്ചു പേരും കൊല്ലപ്പെട്ടു. 

മധ്യ ഗസ്സയില്‍ യു.എന്‍ സഹായം പ്രതീക്ഷിച്ച് സലാഹുദ്ദീന്‍ റോഡില്‍ കാത്തിരുന്ന ജനക്കൂട്ടത്തിനു നേരെ ഇസ്റാഈല്‍ സേന വെടിവച്ചു. ഇതില്‍ 11 പേര്‍ കൊല്ലപ്പെട്ടു. ഭക്ഷണത്തിന് കാത്തു നിന്നവരാണ് കൊല്ലപ്പെട്ടത്. ഇതുവരെ ഗസ്സയില്‍ ഭക്ഷണത്തിന് കാത്തു നിന്ന് 397 പേരെ ഇസ്റാഈല്‍ വെടിവച്ചു കൊന്നിട്ടുണ്ട്. 3000 പേര്‍ക്ക് ആക്രമണത്തില്‍ പരുക്കേറ്റു.