ന്യൂഡല്‍ഹി: മഹാരാഷ്ട്ര നിയമസഭാ തിരഞ്ഞെടുപ്പില്‍ മാച്ച് ഫിക്‌സിംഗ് ആരോപണം ഉന്നയിച്ച ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ ആരോപണങ്ങള്‍ ചര്‍ച്ച ചെയ്യാമെന്ന് തിരഞ്ഞെടുപ്പ് കമ്മീഷന്‍. മാച്ച് ഫിക്‌സിംഗ് ആരോപണങ്ങള്‍ തള്ളിയ തിരഞ്ഞെടുപ്പ് കമ്മീഷന്‍വ ഇക്കാര്യം വ്യക്തമാക്കി രാഹുലിന് കത്തയച്ചു. എന്നാല്‍ തിരഞ്ഞെടുപ്പ് കമ്മീഷന്റെ കത്തിന് രാഹുല്‍ മറുപടി നല്‍കിയിട്ടില്ലെന്നാണ് പുറത്തുവരുന്ന വിവരം.

ALSO READ: 'ആര്‍ക്കുമുന്നിലും തലകുനിക്കാത്ത രാജ്യം, ആത്മാഭിമാനവും ധൈര്യവും എന്തെന്ന് ഇന്ത്യ ഇറാനെ കണ്ട് പഠിക്കണം' സഞ്ജയ് റാവത്ത്

ജൂണ്‍ 12നാണ് രാഹുലിന് കത്തയച്ചത്. ഡല്‍ഹിയിലെ അദ്ദേഹത്തിന്റെ ഔദ്യോഗിക വസതിയില്‍ കത്ത് ലഭിച്ചതായും ഇമെയിലിലും കത്ത് അയച്ചിട്ടുണ്ടെന്നും തിരഞ്ഞെടുപ്പ് കമ്മീഷനെ ഉദ്ദരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.

ജൂണ്‍ 7ന് ഇന്ത്യന്‍ എക്‌സ്പ്രസില്‍ പ്രസിദ്ധീകരിച്ച ലേഖനത്തില്‍ രാഹുല്‍ ഗാന്ധി തിരഞ്ഞെടുപ്പ് കമ്മീഷന്റെ നിഷ്പക്ഷതയെ ചോദ്യം ചെയ്തിരുന്നു. ഇതിനോട് പ്രതികരിച്ചാണ് തിരഞ്ഞെടുപ്പ് കമ്മീഷന്‍ രാഹുലിന് കത്തയച്ചത്.

'നവംബര്‍ 2024ലെ മഹാരാഷ്ട്ര തിരഞ്ഞെടുപ്പിനെക്കുറിച്ച് ഇന്ത്യന്‍ നാഷണല്‍ കോണ്‍ഗ്രസ് ഉന്നയിച്ച സമാന ആശങ്കകള്‍ക്ക് ഡിസംബര്‍ 24, 2024ന് കമ്മീഷന്‍ വിശദമായ മറുപടി നല്‍കിയിരുന്നു,' കത്തില്‍ വ്യക്തമാക്കി. വോട്ടര്‍ പട്ടിക, വോട്ടെടുപ്പ് ശതമാനം എന്നിവയെക്കുറിച്ചുള്ള സംശയങ്ങള്‍ക്ക് കമ്മീഷന്‍ മറുപടി നല്‍കിയിട്ടുണ്ടെന്നും, കൂടുതല്‍ വിശദീകരണങ്ങള്‍ക്കായി രാഹുല്‍ ഗാന്ധിയെ നേരിട്ട് ബന്ധപ്പെടാന്‍ ക്ഷണിക്കുകയാണെന്നും കത്തില്‍ പറയുന്നു. ഇമെയിലില്‍ സൗകര്യപ്രദമായ സമയം അറിയിക്കാമെന്നും തിരഞ്ഞെടുപ്പ് കമ്മീഷന്‍ വ്യക്തമാക്കി.

ALSO READ: സൈന്യത്തിനെതിരെ അപകീർത്തികരമായ പരാമർശം; അഞ്ചാം തവണയും കോടതിയിൽ ഹാജരാകാതെ രാഹുൽ

'മഹാരാഷ്ട്ര തിരഞ്ഞെടുപ്പില്‍ മാച്ച് ഫിക്‌സിംഗ് നടന്നു, ഇത് ജനാധിപത്യത്തിന് വിഷമാണ്,' എന്ന് രാഹുല്‍ Xല്‍ കുറിച്ചിരുന്നു. വോട്ടര്‍ പട്ടികയും വോട്ടിംഗിന്റെ സിസിടിവി ദൃശ്യങ്ങളും ലഭിക്കാന്‍ പ്രതിപക്ഷം നടത്തിയ ശ്രമങ്ങള്‍ പരാജയപ്പെട്ടതായും അദ്ദേഹം ആരോപിച്ചു. എന്നാല്‍, വോട്ടര്‍മാരുടെ സ്വകാര്യതയും സുരക്ഷയും സംരക്ഷിക്കേണ്ടത് അനിവാര്യമാണെന്നും, സിസിടിവി ദൃശ്യങ്ങള്‍ കോടതി ഉത്തരവില്ലാതെ പങ്കുവെക്കാനാവില്ലെന്നും കമ്മീഷന്‍ വ്യക്തമാക്കി.