കുവൈത്ത് സിറ്റി: കുവൈത്തില്‍ സാമ്പത്തികബാധ്യതയുള്ള പൗരന്മാര്‍ക്കുള്ള കടങ്ങള്‍ സര്‍ക്കാര്‍ ഏറ്റെടുക്കുന്ന വിശാലപദ്ധതിയുടെ ആദ്യ ഘട്ടത്തിന് തുടക്കം. ആദ്യ ഘട്ടമെന്ന നിലക്ക് 5,000 ദിനാറില്‍ (14 ലക്ഷം രൂപ) കവിയാത്ത കടബാധ്യതയുള്ള പൗരന്മാര്‍ക്കുള്ള കടങ്ങള്‍ ആണ് സര്‍ക്കാര്‍ ഏറ്റെടുത്തത്. ബാധ്യത തീര്‍പ്പാക്കലിന്റെ ആദ്യ ഗഡുവിന് അംഗീകാരം നല്‍കിയതായി സാമൂഹിക കാര്യ മന്ത്രാലയത്തിന്റെ ആക്ടിംഗ് അണ്ടര്‍സെക്രട്ടറിയും കടക്കാരുടെ ആശ്വാസത്തിനായുള്ള സമിതി ചെയര്‍മാനുമായ ഡോ. ഖാലിദ് അല്‍അജ്മി പ്രഖ്യാപിച്ചു.

തീര്‍പ്പാക്കല്‍ പ്രക്രിയ ആരംഭിക്കുന്നതിനായി സ്ത്രീകളും പുരുഷന്‍മാരുമായ 411 പൗരന്മാരുടെ പേരുകള്‍ നീതിന്യായ മന്ത്രാലയത്തിലെ ജനറല്‍ ഡിപ്പാര്‍ട്ട്‌മെന്റ് ഓഫ് ഇംപ്ലിമെന്റേഷന് സമര്‍പ്പിച്ചിട്ടുണ്ടെന്ന് കുവൈത്തിലെ അല്‍റായ് ദിനപത്രം റിപ്പോര്‍ട്ട് ചെയ്തു. സാമ്പത്തികമായി ബുദ്ധിമുട്ടുന്ന പൗരന്മാരുടെ കടങ്ങള്‍ തീര്‍പ്പാക്കുന്നതിനുള്ള ദേശീയ കാമ്പെയ്‌നിന്റെ ഭാഗമാണ് ഈ സംരംഭം. 

ALSO READ: ഹൂതികള്‍ മുക്കിയ കപ്പലില്‍ നിന്ന് ഇന്ത്യക്കാരന്‍ ഉള്‍പ്പെടെ നാലു പേരെ കൂടി രക്ഷിച്ചു, 11 പേരെ കാണാനില്ല; ആറുപേരെ ബന്ദികളാക്കിയെന്ന് റിപ്പോര്‍ട്ട്

കടബാധിതരായ വ്യക്തികളുടെ വിവരങ്ങള്‍ ശേഖരിക്കുന്നതിന് സ്ഥാപിച്ച ഉന്നതാധികാര സമിതിക്ക് കീഴില്‍ ആറ് സാങ്കേതിക, നിയമ വിഭാഗമാണ് പ്രവര്‍ത്തിക്കുന്നത്. ആഭ്യന്തര മന്ത്രാലയങ്ങള്‍, നീതി (സിവില്‍ എക്‌സിക്യൂഷന്‍ വകുപ്പ്), ഇസ്ലാമിക് അഫയേഴ്‌സ്, സോഷ്യല്‍ അഫയേഴ്‌സ്, ജനറല്‍ സെക്രട്ടേറിയറ്റ് ഓഫ് എന്‍ഡോവ്‌മെന്റ്‌സ്, സകാത്ത് ഹൗസ് എന്നിവയില്‍ നിന്നുള്ള പ്രതിനിധികള്‍ ആണ് കമ്മിറ്റികളില്‍ ഉള്‍പ്പെടുന്നത്. ഇവരുടെ ശ്രമഫലമായാണ് അര്‍ഹരായ 411 കടബാധിതതരുടെ പേരുകള്‍ അന്തിമ പട്ടികയില്‍ ഉള്‍പ്പെടുത്താന്‍ സാധിച്ചത്. ഓരോ കേസുകളിലും നിശ്ചിത വ്യവസ്ഥകളുടെ അവലോകനവും സമിതിയുടെ നേതൃത്വത്തില്‍ പൂര്‍ത്തിയാക്കിയതായി ഡോ. ഖാലിദ് അല്‍അജ്മി പറഞ്ഞു.

അപേക്ഷകര്‍ കുവൈത്ത് പൗരന്മാരായിരിക്കണം, നേരത്തെ ഇതുസംബന്ധിച്ച പദ്ധതിയില്‍നിന്ന് പ്രയോജനം നേടിയിട്ടില്ലാത്തവരായിരിക്കണം, കടം വീട്ടി തീര്‍ക്കേണ്ടതായിരിക്കണം തുടങ്ങിയ മാനദണ്ഡങ്ങളുടെ അടിസ്ഥാനത്തില്‍ കമ്മിറ്റികള്‍ നിരവധി കേസുകള്‍ അവലോകനം ചെയ്ത് അംഗീകരിച്ചതായും കടബാധ്യതയുള്ള പൗരന്മാര്‍ക്ക് തിരിച്ചടവ് പൂര്‍ത്തിയായതായി അറിയിക്കുന്ന ഔദ്യോഗിക സന്ദേശങ്ങള്‍ സഹല്‍ ആപ്പ് വഴി ലഭിക്കുമെന്നും അദ്ദേഹം വ്യക്തമാക്കി. 

പതിനായിരം കുവൈത്തി ദീനാറിനു (28 ലക്ഷം രൂപ) താഴെയുള്ള കടബാധ്യതയുള്ള കേസുകളിലും സമിതി പരിശോധന നടത്തി വരികയാണ്. ലഭ്യമായ ഫണ്ടുകള്‍ക്ക് അനുസൃതമായി ഇവരുടെ കട ബാധ്യകളും തീര്‍പ്പാക്കുമെന്നും അധികൃതര്‍ അറിയിച്ചു. ലഭ്യമായ സാമ്പത്തിക സ്രോതസ്സുകള്‍ക്കനുസൃതമായി, 15,000 ദിനാര്‍ വരെ കടമുള്ള വ്യക്തികളെ ലക്ഷ്യമിട്ടുള്ള മൂന്നാം ഘട്ടം തുടര്‍ന്ന് നടക്കും. നീതിയും പൊതുജന വിശ്വാസവും ഉയര്‍ത്തിപ്പിടിക്കുന്ന ഒരു ചട്ടക്കൂടിനുള്ളില്‍, സഹായം ഏറ്റവും ആവശ്യമുള്ളവര്‍ക്ക് എത്തിച്ചേരുന്നുണ്ടെന്ന് ഉറപ്പാക്കാന്‍ കമ്മിറ്റി പ്രതിജ്ഞാബദ്ധമാണെന്ന് ഡോ. ഖാലിദ് അല്‍അജ്മി വ്യക്തമാക്കി.

Acting Undersecretary of the Ministry of Social Affairs and Chairman of the Debtors Committee, Dr. Khaled Al-Ajmi, announced that the first installment of debt settlements for Kuwaiti citizens whose debts do not exceed 5,000 dinars has been approved. As part of this initial phase, the names of over 411 citizens have been submitted to the General Department of Implementation at the Ministry of Justice to begin the settlement process.