കോഴിക്കോട്: കൊയിലാണ്ടി തോരായിക്കടവിൽ നിർമാണത്തിലിരിക്കുന്ന പാലത്തിന്റെ ഒരു ഭാഗം തകർന്ന സംഭവത്തിൽ കർശന നടപടി സ്വീകരിക്കുമെന്ന് പൊതുമരാമത്ത് മന്ത്രി പി.എ. മുഹമ്മദ് റിയാസ്. കേരള റോഡ് ഫണ്ട് ബോർഡ് പ്രൊജക്ട് ഡയറക്ടറുടെ റിപ്പോർട്ട് ലഭിച്ചാലുടൻ നടപടിയുണ്ടാകുമെന്ന് മന്ത്രി വ്യക്തമാക്കി. "അധികൃതർ പരിശോധന നടത്തിയിട്ടും വീഴ്ച സംഭവിച്ചിട്ടുണ്ടെങ്കിൽ യാതൊരു വിട്ടുവീഴ്ചയും ഉണ്ടാകില്ല. മുൻവിധിയോടെ ഒന്നും പറയുന്നില്ല," മന്ത്രി കൂട്ടിച്ചേർത്തു.

ഇന്നലെ വൈകീട്ട് 3.45-നാണ് തോരായിക്കടവ് പാലത്തിന്റെ മധ്യഭാഗത്തെ ഭീം തകർന്നു വീണത്. കോൺക്രീറ്റ് പ്രവർത്തനങ്ങൾ നടക്കുന്നതിനിടെയാണ് അപകടം. തൊഴിലാളികൾ അത്ഭുതകരമായി രക്ഷപ്പെട്ടു. കരാർ കമ്പനിയുടെ ഭാഗത്ത് ഗുരുതര വീഴ്ച സംഭവിച്ചതായി നാട്ടുകാർ ആരോപിക്കുന്നു. മലപ്പുറം ആസ്ഥാനമായ പി.എം.ആർ കൺസ്ട്രക്ഷൻ കമ്പനിയാണ് പാലത്തിന്റെ നിർമാണ ചുമതല വഹിക്കുന്നത്. കൊയിലാണ്ടി-ബാലുശ്ശേരി മണ്ഡലങ്ങളെ ബന്ധിപ്പിക്കുന്ന ഈ പാലം നാട്ടുകാരുടെ ചിരകാലാഭിലാഷമാണ്. എൽ.ഡി.എഫ് സർക്കാർ കിഫ്ബി മുഖേനയാണ് നിർമാണം നടപ്പാക്കുന്നത്.

വെങ്ങളം-അഴിയൂർ ദേശീയപാതയുടെ നിർമാണവുമായി ബന്ധപ്പെട്ട പ്രശ്നങ്ങൾ പരിഹരിക്കണമെന്ന ജനങ്ങളുടെ ആവശ്യം ന്യായമാണെന്ന് മന്ത്രി പറഞ്ഞു. "സർക്കാർ ജനങ്ങളോടൊപ്പമാണ്. കരാറുകാർ ശരിയായ നിലപാട് സ്വീകരിക്കാത്തത് നേരത്തെ ശ്രദ്ധയിൽപ്പെട്ടതാണ്. പ്രവൃത്തി തടസ്സമില്ലാതെ പുരോഗമിക്കാൻ കൂടുതൽ തൊഴിലാളികളെ ഉൾപ്പെടുത്തി സർവീസ് റോഡുകളുടെ നിർമാണം ഉൾപ്പടെ പൂർത്തിയാക്കണമെന്ന് മുഖ്യമന്ത്രി കേന്ദ്രമന്ത്രിയോട് ആവശ്യപ്പെട്ടിട്ടുണ്ട്," മന്ത്രി വ്യക്തമാക്കി. പൊതുമരാമത്ത് വകുപ്പിന്റെ കീഴിലുള്ള കേരള റോഡ് ഫണ്ട് യൂണിറ്റിന്റെ മേൽനോട്ടത്തിലാണ് പ്രവൃത്തികൾ നടക്കുന്നത്.   നാട്ടുകാരുടെ ദീർഘകാല ആവശ്യമായിരുന്ന ഈ പാലം പൂർത്തിയാകുന്നതോടെ കോഴിക്കോട്-കുറ്റ്യാടി സംസ്ഥാന പാതയിലേക്കും ദേശീയ പാതയിലേക്കും എളുപ്പത്തിൽ എത്തിച്ചേരാൻ സാധിക്കുമായിരുന്നു. അപകടത്തെ തുടർന്ന് നിർമാണ പ്രവർത്തനങ്ങൾ താൽക്കാലികമായി നിർത്തിവെച്ചിരിക്കുകയാണ്.

The under-construction bridge at Thorayikkadavu in Koyilandy, Kozhikode, collapsed on Thursday evening around 3:45 PM during concrete work. No workers were injured. Minister P.A. Muhammed Riyas promised strict action if lapses are found after the Kerala Road Fund Board's report. Locals allege negligence by the contractor, P.M.R Construction. The bridge, a long-standing demand, is being built by the LDF government through KIFBI