ജലീൽ അരൂക്കുറ്റി 

കൊച്ചി: കേന്ദ്ര ആഭ്യന്തരമന്ത്രി അമിത് ഷായുടെ സാന്നിധ്യത്തിൽ ഇന്ന് ചേരുന്ന ബി.ജെ.പി സംസ്ഥാന നേതൃയോഗത്തിൽ പുനഃസംഘടയെ തുടർന്നുണ്ടായ അതൃപ്തി ചർച്ചയാകും. 

തെരഞ്ഞെടുപ്പ് മുന്നൊരുക്കങ്ങൾ വിലയിരുത്താൻ എത്തുന്ന അമിത് ഷായുടെ പ്രധാന ദൗത്യം കേരളത്തിലെ ബി.ജെ.പിക്കുള്ളിലെ തമ്മിലടി തീർക്കുകയെന്നതാണ്. ബി.ജെ.പി സംസ്ഥാന കോർകമ്മിറ്റി എട്ടിൽ നിന്ന് 24 ലേക്ക് ഉയർത്തി ജംബോ കമ്മിറ്റിയാക്കി മാറ്റിയെങ്കിലും നിലവിലെ കോർകമ്മിറ്റിയിലുണ്ടായിരുന്ന മുതിർന്ന നേതാക്കളെ അവഗണിച്ചതും വി. മുരളീധൻ പക്ഷത്തെ വെട്ടിനിരത്തിയതും കടുത്ത പ്രതിഷേധത്തിനും അതൃപ്തിക്കും ഇടയാക്കിയിരുന്നു.

നേരത്തെ കോർകമ്മിറ്റിയിലുണ്ടായിരുന്ന സംസ്ഥാന വൈസ് പ്രസിഡന്റുമാരായ ഡോ.കെ.എസ് രാധാകൃഷ്ണനെയും എ.എൻ രാധാകൃഷ്ണനെയും പുനഃസംഘടിപ്പിച്ചപ്പോൾ ഉൾപ്പെടുത്താത്തത് വിവാദമായിരുന്നു. പത്ത് സംസ്ഥാന വൈസ് പ്രസിഡന്റുമാരിൽ ഏഴ് പേരെയും കോർകമ്മിറ്റിയിൽ ഉൾപ്പെടുത്തിയപ്പോഴാണ് മുതിർന്ന നേതാക്കൾ പുറത്താവുകയായിരുന്നു. ഇരുവരും അതൃപ്തി പ്രകടിപ്പിച്ചതോടെ എ.എൻ രാധാകൃഷ്ണനെ എൻ.ഡി.എ വൈസ് ചെയർമാൻ പദവി നൽകി സമാശ്വസിപ്പിക്കാൻ നീക്കമുണ്ടായി. എന്നാൽ, കെ.എസ് രാധാകൃഷ്ണനെ പൂർണമായി അവഗണിക്കുന്ന നിലപാടാണ് സ്വീകരിച്ചത്.

ALSO READ: യൂത്ത് കോൺഗ്രസ് അധ്യക്ഷപദവി; അബിൻ വർക്കിയോ അഭിജിത്തോ? ചർച്ച സജീവം