ചേർത്തല: പള്ളിപ്പുറം പഞ്ചായത്തിലെ കാവുങ്കൽ വെള്ളിമുറ്റം ഭാഗത്ത് സ്വകാര്യ കമ്പനിയുടെ ഗോഡൗൺ നിർമാണത്തിനിടെ കോൺക്രീറ്റ് തട്ട് ഇടിഞ്ഞുവീണ് നാല് തൊഴിലാളികൾക്ക് പരിക്കേറ്റു. ഇന്നലെ ഉച്ചകഴിഞ്ഞ് രണ്ട് മണിയോടെയാണ് അപകടം ഉണ്ടായത്. കൊച്ചിയിലെ ഒരു കോൺട്രാക്ടർക്ക് കീഴിലാണ് ഗോഡൗൺ നിർമാണം നടന്നിരുന്നത്. അപകടസമയത്ത് 30-ലേറെ തൊഴിലാളികൾ സ്ഥലത്തുണ്ടായിരുന്നതായാണ് റിപ്പോർട്ട്.

കെട്ടിടത്തിന്റെ മേൽതട്ടിൽ കോൺക്രീറ്റ് മിശ്രിതം നിറയ്ക്കുന്നതിനിടെയാണ് തട്ട് ഇടിഞ്ഞുവീണത്. ഇതോടെ  കമ്പി, പട്ടിക, ആണി എന്നിവ കുത്തിയാണ് തൊഴിലാളികൾക്ക് പരിക്കേറ്റത്. പരിക്കേറ്റവരിൽ കൊച്ചി സ്വദേശിയായ ഒരാളുടെ നില ഗുരുതരമാണ്. പരിക്കേറ്റ എല്ലാ തൊഴിലാളികളെയും വിവിധ ആശുപത്രികളിൽ പ്രവേശിപ്പിച്ചിട്ടുണ്ട്.

നിർമാണപ്രവർത്തനങ്ങളിൽ ഗുരുതരമായ അപാകതകളുണ്ടെന്ന് പ്രദേശവാസികൾ ആരോപിച്ചു. ഈ പ്രദേശം മുമ്പ് കൃഷിക്കായി ഉപയോഗിച്ചിരുന്ന പാടശേഖരമായിരുന്നുവെന്നും, പാടം നികത്തി അനധികൃതമായാണ് നിർമാണം നടത്തുന്നതെന്നും നാട്ടുകാർ ആരോപിക്കുന്നു. ചതുപ്പുനിറഞ്ഞ ഈ പ്രദേശത്ത് യാതൊരു സുരക്ഷാ മാനദണ്ഡങ്ങളും പാലിക്കാതെയാണ് നിർമാണം നടക്കുന്നതെന്നും ആരോപണം ഉയർന്നിട്ടുണ്ട്.