2025 ഏഷ്യ കപ്പിനുള്ള ഇന്ത്യൻ ടീമിനെ കഴിഞ്ഞ ദിവസങ്ങളിലാണ് പ്രഖ്യാപിച്ചത്. ചീഫ് സെലക്ടർ അജിത് അഗാർക്കറും ടി20 ക്യാപ്റ്റൻ സൂര്യകുമാർ യാദവും ചേർന്നാണ് 15 അംഗ ടീമിനെ പ്രഖ്യാപിച്ചത്. ഇന്ത്യൻ ടെസ്റ്റ് ടീം നായകൻ ശുഭ്മാൻ ഗിൽ ടീമിന്റെ വൈസ് ക്യാപ്റ്റനായി തെരഞ്ഞെടുക്കപ്പെട്ടു. മലയാളി സൂപ്പർതാരം സഞ്ജു സാംസണും ടീമിൽ ഇടം നേടി. 

ഇപ്പോൾ ഏഷ്യാ കപ്പിൽ സഞ്ജു സാംസൺ ഇന്ത്യക്കായി കളിക്കാനുള്ള സാധ്യതകളെക്കുറിച്ച് സംസാരിച്ചിരിക്കുകയാണ് ഇന്ത്യൻ താരം അജിങ്ക്യ രഹാനെ. സഞ്ജു സാംസൺ മികച്ച താരമാണെന്നും ടീമിൽ കാണാൻ ആഗ്രഹിക്കുന്നുണ്ടെന്നുമാണ് രഹാനെ പറഞ്ഞത്. എന്നാൽ സഞ്ജു പുറത്തിരിക്കാൻ സാധ്യതയുണ്ടെന്നും രഹാനെ അഭിപ്രായപ്പെട്ടു. 

''ശുഭ്മൻ ഗിൽ ടീമിൽ തിരിച്ചെത്തി. അഭിഷേക് ശർമ്മക്കൊപ്പം അദ്ദേഹം ഓപ്പൺ ചെയ്യാൻ സാധ്യതയുണ്ടെന്ന് എനിക്കുറപ്പുണ്ട്. എന്നാൽ വ്യക്തിപരമായി സഞ്ജു സാംസൺ മികച്ച പ്രകടനം നടത്തിയതിനാൽ അവനെ ടീമിൽ കാണാൻ ഞാൻ ആഗ്രഹിക്കുന്നുണ്ട്. അവൻ വളരെ ആത്മവിശ്വാസമുള്ള താരമാണ്. വളരെ നല്ല ടീം അംഗവുമാണ്. ഇത് വളരെ പ്രധാനപ്പെട്ട കാര്യമാണ്. എന്നാൽ സഞ്ജു പുറത്തിരിക്കാൻ സാധ്യതയുണ്ട്. ഗില്ലും അഭിഷേക് ശർമയും ടീമിനായി ഓപ്പൺ ചെയ്യും'' അജിങ്ക്യ രഹാനെ തന്റെ യുട്യൂബ് ചാനലിൽ പറഞ്ഞു. 

സെപ്റ്റംബർ 10ന് യുഎഇക്കെതിരെയാണ് ഏഷ്യ കപ്പിൽ ഇന്ത്യയുടെ ആദ്യ മത്സരം. ആരാധകർ ഏറെ പ്രതീക്ഷയോടെ കാത്തിരിക്കുന്ന ഇന്ത്യ-പാകിസ്ഥാൻ ഗ്രൂപ്പ് ഘട്ട മത്സരം സെപ്റ്റംബർ 14ന് നടക്കും. ഇന്ത്യ, പാകിസ്ഥാൻ, യുഎഇ, ഒമാൻ എന്നിവ ഉൾപ്പെടുന്നതാണ് എ ഗ്രൂപ്പ്.

2025 ഏഷ്യാ കപ്പിനുള്ള ഇന്ത്യൻ ടീം

സൂര്യകുമാർ യാദവ് (ക്യാപ്റ്റൻ), ശുഭ്മാൻ ഗിൽ (വൈസ് ക്യാപ്റ്റൻ), അഭിഷേക് ശർമ, തിലക് വർമ്മ, ഹാർദിക് പാണ്ഡ്യ, ശിവം ദുബെ, അക്സർ പട്ടേൽ, ജിതേഷ് ശർമ (വിക്കറ്റ് കീപ്പർ), ജസ്പ്രീത് ബുംറ, അർഷ്ദീപ് സിംഗ്, വരുൺ ചക്രവർത്തി, കുൽദീപ് യാദവ്, സഞ്ജു സാംസൺ (വിക്കറ്റ് കീപ്പർ), ഹർഷിത് റാണ, റിങ്കു സിങ്.

Indian star Ajinkya Rahane has spoken about the possibility of Sanju Samson playing for India in the asia Cup