ഷാര്‍ജ: ഷാര്‍ജയില്‍ മലയാളി യുവതിയെ കാണാതായി. യുവതിയുടെ രക്ഷിതാക്കള്‍ അല്‍ ഗര്‍ബ പൊലിസ് സ്റ്റേഷനില്‍ പരാതി നല്‍കിയിട്ടുണ്ട്. ഷാര്‍ജയിലെ അബു ഷഗാറയില്‍ താമസിക്കുന്ന തിരുവനന്തപുരം സ്വദേശികളായ ദമ്പതികളുടെ മകളെയാണ് കാണാതായത്. 22 വയസ്സുകാരിയായ റിതികയെയാണ് ഇന്ന് രാവിലെ എട്ട് മുതല്‍ കാണാതായത്. സഹോദരന്റെ രക്ത പരിശേധന നടത്താന്‍ ക്ലിനിക്കിലേക്ക് ഒപ്പം പോയതാണ് റിതിക. സഹോദരന്‍ ലാബില്‍ കയറിയ സമയം ക്ലിനിക്കില്‍ ഇരിക്കുകയായിരുന്നു റിതിക.

അഞ്ച് മിനുട്ട് കഴിഞ്ഞ് സഹോദരന്‍ ലാബില്‍ നിന്ന് പുറത്തിറങ്ങി നോക്കിയപ്പോള്‍ റിതികയെ കാണാനില്ലായിരുന്നു. ക്ലിനിക്കിന്റെ പുറകുവശത്തെ ഡോറിലൂടെ പുറത്തേക്ക് പോകുന്ന യുവതിയുടെ ദൃശ്യങ്ങള്‍ സിസിടിവി ക്യാമറയില്‍ പതിഞ്ഞു. ക്ലിനിക്കിന്റെ പരിസരങ്ങളിലും മറ്റും അന്വേഷിച്ചെങ്കിലും ഒരു വിവരവും ലഭിക്കാത്തതിനെ തുടര്‍ന്ന് യുവതിയുടെ രക്ഷിതാക്കള്‍ പൊലിസില്‍ പരാതി നല്‍കുകയായിരുന്നു. വെളുത്ത ടോപ്പും കറുത്ത പാന്റ്‌സുമായിരുന്നു കാണാതാകുമ്പോള്‍ യുവതി ധരിച്ചിരുന്നത്.

കഴിഞ്ഞ 27 വര്‍ഷമായി യുഎഇയില്‍ താമസിക്കുന്ന തിരുവനന്തപുരം സ്വദേശികളായ ദമ്പതികളുടെ രണ്ട് മക്കളില്‍ മൂത്തയാളാണ് കാണാതായ റിതിക. യുഎഇയില്‍ തന്നെയാണ് റിതിക പഠിച്ചുവളര്‍ന്നത്. പത്താം ക്ലാസ് വരെ പഠിച്ച ശേഷം പഠനം ഉപേക്ഷിച്ചു. മകള്‍ക്ക് യാതൊരു തരത്തിലുള്ള പ്രശ്‌നവും ഇല്ലായിരുന്നുവെന്ന് യുവതിയുടെ അമ്മ പറഞ്ഞു. യുവതിയെ കാണുന്നവര്‍ 0547517272 (ആശ) എന്ന നമ്പറില്‍ അറിയിക്കണമെന്ന് യുവതിയുടെ ബന്ധുക്കള്‍ അഭ്യര്‍ത്ഥിച്ചു.

A 22-year-old Malayali woman named Rithika has gone missing in Sharjah, UAE, prompting her family from Thiruvananthapuram to issue a desperate public appeal for help.