തിരുവനന്തപുരം: സംസ്ഥാനത്ത് തീവ്ര വോട്ടര്‍പട്ടിക പരിഷ്‌കരണം (എസ്.ഐ.ആര്‍) നടപ്പാക്കുന്നത് നീട്ടിയേക്കും. കേന്ദ്ര തെരഞ്ഞെടുപ്പ് കമ്മിഷനാണ് ഇതുസംബന്ധിച്ച് അന്തിമ തീരുമാനമെടുക്കേണ്ടത്. തദ്ദേശ തെരഞ്ഞെടുപ്പ് പൂര്‍ത്തിയാകുന്നത് വരെ എസ്.ഐ.ആര്‍ നടപ്പാക്കുന്നത് നീട്ടിവയ്ക്കണമെന്നാവശ്യപ്പെട്ട് കഴിഞ്ഞ ദിവസം കേരളത്തിലെ മുഖ്യതെരഞ്ഞെടുപ്പ് ഓഫിസര്‍ രത്തന്‍ യു. ഖേല്‍ക്കര്‍ കേന്ദ്ര തെരഞ്ഞെടുപ്പ് കമ്മിഷന് കത്തയച്ചിരുന്നു. അനുകൂല തീരുമാനമുണ്ടാകുമെന്നാണ് പ്രതീക്ഷയെന്ന് രത്തന്‍ യു. ഖേല്‍ക്കര്‍ ഇന്നലെ മാധ്യമങ്ങളോട് പറഞ്ഞു. 

എസ്.ഐ.ആര്‍ നടപ്പാക്കുന്നതിനുള്ള നടപടിക്രമങ്ങളിലേക്ക് കടക്കാന്‍ നേരത്തെ കേന്ദ്ര തെരഞ്ഞെടുപ്പ് കമ്മിഷന്‍ സംസ്ഥാനത്തെ മുഖ്യതെരഞ്ഞെടുപ്പ് ഓഫിസര്‍ക്ക് നിര്‍ദേശം നല്‍കിയിരുന്നു. ഷെഡ്യൂള്‍ പ്രഖ്യാപിക്കുന്നതിന് മുന്നോടിയായുള്ള നടപടികളും സംസ്ഥാനത്ത് ആരംഭിച്ചിരുന്നു. തദ്ദേശ തെരഞ്ഞെടുപ്പ് നടക്കുന്ന വേളയില്‍ എസ്.ഐ.ആര്‍ നടപ്പാക്കുന്നത് ഉദ്യോഗസ്ഥതലത്തില്‍ ബുദ്ധിമുട്ട് സൃഷ്ടിക്കില്ലെന്ന നിലപാടാണ് നേരത്തെ സംസ്ഥാനത്തെ ഉദ്യോഗസ്ഥര്‍ സ്വീകരിച്ചത്. എന്നാല്‍ അംഗീകൃത രാഷ്ട്രീയ പാര്‍ട്ടികളുടെ യോഗത്തില്‍ ബി.ജെ.പി ഒഴികെയുള്ള എല്ലാവരും ഇതിനെ എതിര്‍ത്തതോടെയാണ് പുനഃപരിശോധനയ്ക്ക്  മുഖ്യതെരഞ്ഞെടുപ്പ് ഓഫിസര്‍ തയാറായത്. 

സംസ്ഥാന തെരഞ്ഞെടുപ്പ് കമ്മിഷനോടും ജില്ല കലക്ടര്‍മാരോടും നടത്തിയ കൂടിയാലോചനകള്‍ക്ക് ശേഷമാണ് തദ്ദേശ തെരഞ്ഞെടുപ്പ് കഴിയുന്നതുവരെ കേരളത്തില്‍ എസ്.ഐ.ആര്‍ നീട്ടിവയ്ക്കുന്നതാകും ഉചിതമെന്ന് നിർദേശിക്കുന്ന കത്ത് കേന്ദ്ര തെരഞ്ഞെടുപ്പ് കമ്മിഷന് നല്‍കിയത്. 

എസ്.ഐ.ആര്‍ നടപടികളില്‍ രാഷ്ട്രീയപാര്‍ട്ടികളുടെ സഹകരണം ആവശ്യമാണ്. വീടുവീടാന്തരമുള്ള പരിശോധന ആവശ്യമാണെന്നതിനാല്‍ ബൂത്ത് ലെവല്‍ ഓഫിസര്‍മാര്‍ക്കൊപ്പം പാര്‍ട്ടികളുടെ ബൂത്ത് ലെവല്‍ ഏജന്റുമാരും സഹകരിച്ചാല്‍ മാത്രമെ എസ്.ഐ.ആര്‍ പൂര്‍ണമായി നടപ്പാകൂ. തദ്ദേശ തെരഞ്ഞെടുപ്പ് നടക്കുന്നതിനിടയില്‍ വളരെ സങ്കീര്‍ണ്ണമായ തീവ്ര വോട്ടര്‍പട്ടിക പരിഷ്‌കരണം കൂടി നടത്തുന്നത് അപ്രായോഗികമാണെന്നാണ് രാഷ്ട്രീയ പാര്‍ട്ടികളുടെയും നിലപാട്. 

കൂടാതെ തദ്ദേശ തെരഞ്ഞെടുപ്പിന്റെ ചുമതല വഹിക്കുന്ന ഉദ്യോഗസ്ഥര്‍ തന്നെയാകും വോട്ടര്‍പട്ടിക പരിഷ്‌കരണത്തിനും മേല്‍നോട്ടം വഹിക്കേണ്ടി വരിക. ഇതു പരിഗണിച്ച് തീവ്ര വോട്ടര്‍പട്ടിക പരിഷ്‌കരണം മാറ്റിവയ്ക്കണമെന്ന് സംസ്ഥാന തെരഞ്ഞെടുപ്പ് കമ്മിഷണര്‍ മുഖ്യതെരഞ്ഞെടുപ്പ് ഓഫിസര്‍ക്ക് ശുപാര്‍ശ നല്‍കിയിട്ടുണ്ട്.