ഗുവാഹതി: വടക്കു കിഴക്കന്‍ മേഖലയിലെ ആദ്യ സ്വകാര്യ സര്‍വകലാശാലയായ മേഘാലയ സയന്‍സ് ആന്‍ഡ് ടെക്‌നോളജി(യു.എസ്.ടി.എം)ക്കെതിരായ വനഭൂമി കൈയേറ്റ ആരോപണങ്ങള്‍ നിഷേധിച്ച് മേഘാലയ സര്‍ക്കാര്‍. കൃത്യമായ നടപടിക്രമങ്ങള്‍ പാലിച്ചാണ് യു.എസ്.ടി.എമ്മിന് ഭൂമി അനുവദിച്ചതെന്നും ലംഘനങ്ങളുടെ പേരില്‍ ഇതിനകം പിഴ ചുമത്തിയിട്ടുണ്ടെന്നും തിരിച്ചുപിടിച്ചിട്ടുണ്ടെന്നും മേഘാലയ സര്‍ക്കാര്‍ സുപ്രിംകോടതിയെ അറിയിച്ചു. 

നേരത്തെ നിയമവിരുദ്ധമായി വനഭൂമിയില്‍ നിര്‍മിച്ചെന്നാരോപിച്ച് യൂനിവേഴ്‌സിറ്റിക്ക് സുപ്രിംകോടതി നിയോഗിച്ച സെന്‍ട്രല്‍ എംപവേര്‍ഡ് കമ്മിറ്റി (സി.ഇ.സി) 150.35 കോടി രൂപ പിഴയിട്ടിരുന്നു. കേസില്‍ വിശദീകരണം തേടി മേഘാലയ സര്‍ക്കാരിന് സുപ്രിംകോടതി നോട്ടിസയക്കുകയും ചെയ്തു. ഇതിനുള്ള മറുപടിയിലാണ്, അസമിലെ ഹിമന്തബിശ്വ ശര്‍മയുടെ നേതൃത്വത്തിലുള്ള ബി.ജെ.പി സര്‍ക്കാരിന്റെ ആരോപണങ്ങള്‍ നിഷേധിച്ച് മേഘാലയ സത്യവാങ്മൂലം സമര്‍പ്പിച്ചത്. 

മേഘാലയയിലെ വനഭൂമി സംസ്ഥാന അധികാരപരിധിയില്‍ മാത്രമല്ല, സ്വയംഭരണ ജില്ലാ കൗണ്‍സിലുകളുടെ അധികാരത്തിന് കീഴിലാണെന്ന് സര്‍ക്കാര്‍ വാദിച്ചു. യൂനിവേഴ്‌സിറ്റിയുടെ നിര്‍മാണമാണ് അസമിലെ പ്രളയകാരണമെന്ന ഹിമന്തയുടെ ആരോപണം മേഘാലയ നിഷേധിച്ചു. ആസൂത്രണമില്ലാത്ത നഗരവല്‍ക്കരണം, തണ്ണീര്‍ത്തടങ്ങളുടെ കൈയേറ്റം, മോശം മാലിന്യനിര്‍മാർജന സംവിധാനം എന്നിവയാണ് പ്രളയകാരണമെന്ന് ചൂണ്ടിക്കാട്ടിയ സത്യവാങ്മൂലം, മേഘാലയയില്‍ നിന്ന് അസമിലേക്ക് മഴവെള്ളം സ്വാഭാവികമായി ഒഴുകുന്നത് മനുഷ്യനിര്‍മ്മിത പ്രതിഭാസമല്ലെന്നും വ്യക്തമാക്കി.

കേന്ദ്രത്തിന്റെ അനുമതിയില്ലാതെ 25 ഹെക്ടര്‍ വനഭൂമിയിലാണ് യൂനിവേഴ്‌സിറ്റി നിർമിച്ചതെന്നായിരുന്നു ആരോപണം. യു.എസ്.ടി.എമ്മും ചുറ്റുമുള്ള കെട്ടിടങ്ങളും കൈവശപ്പെടുത്തിയ മുഴുവന്‍ പ്രദേശവും ഒരു വര്‍ഷത്തിനുള്ളില്‍ സാധാരണ വനത്തിലേക്ക് പൂർണമായും പുനഃസ്ഥാപിക്കണമെന്നും പിഴത്തുകയില്‍ നിന്നുള്ള ഫണ്ട് കെട്ടിടങ്ങള്‍ പൊളിക്കാന്‍ ഉപയോഗിക്കണമെന്നും നേരത്തെ സി.ഇ.സി സുപ്രിംകോടതിയോട് ശുപാര്‍ശ ചെയ്തിരുന്നു. ഇതോടെ യൂനിവേഴ്‌സിറ്റി കെട്ടിടം പൊളിക്കാനുള്ള നീക്കം നടത്തുന്നതിനിടെയാണ് യൂനിവേഴ്‌സിറ്റിക്ക് അനുകൂലമായുള്ള മേഘാലയ സര്‍ക്കാരിന്റെ ഇടപെടല്‍. കേസ് അടുത്തമാസം വീണ്ടും സുപ്രിംകോടതി പരിഗണിക്കും.

ഹിമന്ത ബിശ്വ ശര്‍മയുടെ ആരോപണത്തിന് പിന്നാലെ പരീക്ഷയില്‍ ക്രമക്കേട് നടത്തിയെന്ന പേരില്‍ സര്‍വകലാശാലയുടെ സ്ഥാപക ചാന്‍സലറും വിദ്യാഭ്യാസ വിചക്ഷണനുമായ മഹ്ബൂബുല്‍ ഹഖിനെ അറസ്റ്റ്‌ചെയ്തിരുന്നു. ഹഖിന് പിന്നീട് ഗുവാഹതി ഹൈക്കോടതി ജാമ്യം നല്‍കി. കേസില്‍ മേഘാലയ സര്‍ക്കാര്‍ സ്വീകരിച്ച നടപടി ഹഖിന് ആശ്വസമാണ്. ഗുവാഹത്തിയുടെ പ്രവേശന കേന്ദ്രമായ ജോര്‍ബട്ടിനോട് ചേര്‍ന്നുള്ള മേഘാലയയിലെ റിഭോയ് ജില്ലയിലാണ് സര്‍വകലാശാലയുള്ളത്. നാക്കിന്റെ ആദ്യ 50 റാങ്കില്‍പ്പെട്ട സ്ഥാപനം ആണിത്.