മലപ്പുറം: സംസ്ഥാനത്ത് കുടിവെള്ള വിതരണ പൈപ്പുകൾ പൊട്ടുന്നതുമൂലം ദിവസംതോറും നഷ്ടപ്പെടുന്നത് 40 ശതമാനംവരെ ജലമെന്ന് ജലവിഭവ വകുപ്പിന്റെ കണ്ടെത്തൽ. പൈപ്പുകളുടെ കാലപ്പഴക്കമാണ് കാരണം. 30 മുതൽ 50 വർഷംവരെ പഴക്കമുള്ള പൈപ്പുകളാണ് പൊട്ടുന്നത്. പൊട്ടിയ പൈപ്പുകൾ മാറ്റുന്നതിനായി 2021 മുതൽ ഇതുവരെ 353.14 കോടി രൂപയാണ് ചെലവഴിച്ചത്. 

നാലര വർഷത്തിനിടെ പൈപ്പ് പൊട്ടിയതു മൂലം കുടിവെള്ളം മുടങ്ങിയത് 3,34,126 തവണയാണ്. പരാതി ലഭിക്കാത്തതുകൂടി ചേർക്കുമ്പോൾ ഇതിലേറെവരും. അണ്ടർ വാട്ടർലീക്ക്, ഗാർഹിക കണക്ഷനുകളിലെ ചോർച്ച എന്നിവ മൂലമാണ് ജലം നഷ്ടപ്പെടുന്നത്. മീറ്റർ തകരാർ, ജല മോഷണം, റോഡ് നവീകരണം തുടങ്ങിയവയും വാട്ടർ അതോറിറ്റിക്ക് തിരിച്ചടിയാകുന്നു. 16,480 മീറ്ററുകൾ നിലവിൽ തകരാറിലാണ്.

പൈപ്പ് പൊട്ടുന്നതു കണ്ടെത്താൻ വൈകുന്നതോടെ ദിവസങ്ങളോളം കുടിവെള്ളം നഷ്ടമാകുന്നു. പൈപ്പുകൾ നവീകരിക്കുന്നതിന് പ്രത്യേക പദ്ധതികളൊന്നും ഇതുവരെ വകുപ്പ് ആവിഷ്‌കരിച്ചിട്ടുമില്ല. നിലവിൽ 1252.27 കോടി രൂപ വാട്ടർ അതോറിറ്റിക്ക് കുടിശ്ശികയുണ്ട്.