ഏഷ്യ കപ്പിൽ പാകിസ്താനെ പരാജയപ്പെടുത്തി ഇന്ത്യ കിരീടം ചൂടിയിരിക്കുകയാണ്. ദുബൈ ഇന്റർനാഷണൽ സ്റ്റേഡിയത്തിൽ നടന്ന മത്സരത്തിൽ അഞ്ച് വിക്കറ്റിനായിരുന്നു സൂര്യകുമാർ യാദവും സംഘവും വിജയിച്ചു കയറിയത്. ഇന്ത്യയുടെ ഒമ്പതാം ഏഷ്യ കപ്പ് കിരീട നേട്ടമാണിത്.

ടൂർണമെന്റിൽ ഒറ്റ മത്സരം പോലും പരാജയപ്പെടാതെയാണ് ഇന്ത്യ ഏഷ്യയിലെ രാജാക്കന്മാരായി മാറിയത്. മത്സരത്തിൽ ആദ്യം ബാറ്റ് ചെയ്ത പാക്കിസ്താൻ 19.1 ഓവറിൽ 146 റൺസിന് പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ രണ്ട് പന്തുകളും അഞ്ച് വിക്കറ്റുകളും ബാക്കിനിൽക്കെ ലക്ഷ്യം മറികടക്കുകയായിരുന്നു. 

ടൂർണമെന്റിൽ ബാറ്റിങ്ങിലും വിക്കറ്റ് കീപ്പിങ്കിലും കൊണ്ടും മിന്നും പ്രകടനമായിരുന്നു മലയാളി സൂപ്പർതാരം സഞ്ജു സാംസൺ കാഴ്ചവെച്ചത്. ടൂർണമെന്റിൽ തന്റെ ഓപ്പണിങ് പൊസിഷനിൽ ആയിരുന്നില്ല സഞ്ജു കളിച്ചിരുന്നത്. മിഡിൽ ഓർഡറിൽ കളിച്ചിട്ടും സഞ്ജു മികച്ച പ്രകടനമാണ് നടത്തിയത്. ഇപ്പോൾ ഏഷ്യ കപ്പിൽ തന്റെ ബാറ്റിംഗ് പൊസിഷൻ മാറിയതിനെക്കുറിച്ച് തുറന്നു പറഞ്ഞിരിക്കുകയാണ് സഞ്ജു. തനിക്ക് മോഹൻലാലിന്റെ മനോഭാവമാണെന്നും ഏത് റോൾ ഏറ്റെടുക്കാനും സാധിക്കുമെന്നാണ് സഞ്ജു പറഞ്ഞത്. ഷാർജ സക്സസ് കോളേജിൽ നൽകിയ സ്വീകരണത്തിൽ സംസാരിക്കുകയായിരുന്നു മലയാളി താരം. 

''എനിക്ക് ലാലേട്ടനെ മനോഭാവമാണ് ഏത് റോളും എടുക്കാം. ഏത് പൊസിഷനിൽ കളിച്ചാലും നമുക്ക് തിളങ്ങാനാവുമെന്ന് നമ്മൾ മനസിനെ പറഞ്ഞ് ബോധിപ്പിച്ചാൽ പിന്നെ ഒരു കുഴപ്പവുമില്ല. എന്നും കളിക്കുന്ന പോലെ പാഡും ധരിച്ചുകൊണ്ട് ആദ്യം തന്നെ പോകാതെ കുറച്ചു നേരം നിന്ന് ടീമും പരിശീലകനും ആവശ്യപ്പെടുന്നത് പോലെയുള്ള റോളുകൾ ചെയ്ത് കൊടുക്കും. ശ്രീലങ്കക്കെതിരെ കളിച്ചപ്പോൾ അൽപ്പം വേഗതയിൽ റൺസ് ഉയർത്തേണ്ട സാഹചര്യം ആയിരുന്നു ഉണ്ടായിരുന്നത്'' സഞ്ജു സാംസൺ പറഞ്ഞു.   

ടൂർണമെന്റിൽ നാല് ഇന്നിംഗ്സുകളിൽ നിന്നും ഒരു അർദ്ധ സെഞ്ച്വറി അടക്കം 131 റൺസാണ് സഞ്ജു നേടിയത്. ഗ്രൂപ്പ് ഘട്ടത്തിൽ ഒമാനെതിരെയുള്ള അവസാന മത്സരത്തിൽ അർദ്ധ സെഞ്ച്വറി നേടി സഞ്ജു തിളങ്ങിയിരുന്നു. മത്സരത്തിൽ 45 പന്തിൽ 56 റൺസ് നേടിയാണ് സഞ്ജു ഇന്ത്യൻ ടീമിന്റെ ടോപ് സ്കോററായത്. മൂന്ന് വീതം ഫോറുകളും സിക്സുകളും ആണ് സഞ്ജു നേടിയത്. ഈ തകർപ്പൻ പ്രകടനങ്ങൾക്ക് പിന്നാലെ മത്സരത്തിലെ പ്ലെയർ ഓഫ് ദി മാച്ച് അവാർഡും സഞ്ജുവിനെ തേടിയെത്തി. 

സൂപ്പർ ഫോറിൽ ശ്രീലങ്കക്കെതിരെയുള്ള മത്സരത്തിലെ ഇമ്പാക്ട് പ്ലെയറായി തെരഞ്ഞെടുക്കപ്പെട്ടതും സഞ്ജുവാണ്. ത്സരത്തിൽ ബാറ്റിങ്ങിൽ മികച്ച പ്രകടനം നടത്തിയ സഞ്ജു വിക്കറ്റിന് പിന്നിലും മികച്ചു നിന്നു. മത്സരത്തിൽ 22 പന്തുകളിൽ നിന്നും 39 റൺസാണ് സഞ്ജു അടിച്ചെടുത്തത്. ഒരു ഫോറും മൂന്ന് കൂറ്റൻ സിക്സുകളും ആണ് സഞ്ജുവിന്റെ ബാറ്റിൽ നിന്നും പിറന്നത്.

വിക്കറ്റ് കീപ്പിങ്ങിൽ ശ്രീലങ്കൻ താരം കുശാൽ മെൻഡീസിനെ പുറത്താക്കിയതും സഞ്ജു തന്നെയാണ്. വരുൺ ചക്രവർത്തിയുടെ പന്തിൽ ഒരു മിന്നൽ സ്റ്റമ്പിങ്ങിലൂടെയാണ് സഞ്ജു മെൻഡീസിനെ മടക്കി അയച്ചത്. മത്സരത്തിൽ ഈ വിക്കറ്റ് വളരെ നിർണായകമായിരുന്നു. അർദ്ധ സെഞ്ച്വറി നേടി മിന്നും ഫോമിൽ നിൽക്കെയാണ് സഞ്ജു തകർപ്പൻ സ്റ്റാമ്പിങ്ങിലൂടെ താരത്തെ പുറത്താക്കിയത്. 

Sanju Samson had a brilliant performance in both batting and wicketkeeping in the Asia Cup. Sanju did not play in his opening position in the tournament. Sanju said that he has Mohanlal's attitude and can take on any role.