അഹമ്മദാബാദ്: ഇന്ത്യ-വെസ്റ്റ് ഇൻഡീസ് ആദ്യ ടെസ്റ്റിൽ ഒന്നാം ഇന്നിങ്സിൽ ഇന്ത്യ 448 റൺസിന്‌ അഞ്ചു വിക്കറ്റുകൾ എന്ന നിലയിൽ ഡിക്ലയർ ചെയ്തു. മൂന്ന് താരങ്ങൾ സെഞ്ച്വറി നേടി തിളങ്ങിയപ്പോൾ ഇന്ത്യ മികച്ച ടോട്ടൽ നേടുകയായിരുന്നു. കെഎൽ രാഹുൽ, ധ്രുവ് ജുറൽ, രവീന്ദ്ര ജഡേജ എന്നിവരാണ് ഇന്ത്യൻ നിരയിൽ സെഞ്ച്വറി നേടിയത്. 

ജഡേജ 176 പന്തിൽ നിന്നും പുറത്താവാതെ 104 റൺസ് നേടിയാണ് തിളങ്ങിയത്. ആറ് ഫോറുകളും അഞ്ചു കൂറ്റൻ സിക്സുകളും അടങ്ങുന്നതായിരുന്നു ജഡേജയുടെ ഇന്നിംഗ്സ്. മത്സരത്തിൽ നേടിയ അഞ്ചു സിക്സറുകൾക്ക് പിന്നാലെ ടെസ്റ്റ് ക്രിക്കറ്റിൽ ഏറ്റവും കൂടുതൽ സിക്‌സറുകൾ നേടിയ ഇന്ത്യൻ താരങ്ങളുടെ പട്ടികയിൽ നാലാം സ്ഥാനത്തെത്തിയിരിക്കുകയാണ് ജഡേജ. 79 സിക്സുകളാണ് ജഡേജ ഇതുവരെ ടെസ്റ്റിൽ നേടിയിട്ടുള്ളത്. 78 സിക്സുകൾ നേടിയ മുൻ ഇന്ത്യൻ നായകൻ എംഎസ് ധോണിയെ മറികടന്നാണ് ജഡേജയുടെ മുന്നേറ്റം.

ടെസ്റ്റ് ക്രിക്കറ്റിൽ ഇന്ത്യക്കായി ഏറ്റവും കൂടുതൽ സിക്സുകൾ നേടിയ താരങ്ങളുടെ പട്ടികയിൽ ഒന്നാം സ്ഥാനത്തുള്ളത് വിരേന്ദർ സെവാഗ്‌, റിഷബ് പന്ത് എന്നിവരാണ്. ഇരുവരും 90 സിക്സുകളാണ് നേടിയിട്ടുള്ളത്. 88 സിക്‌സറുകൾ നേടിയ രോഹിത് ശർമയാണ് പട്ടികയിലെ രണ്ടാമൻ. 

ജഡേജക്ക് പുറമെ 210 പന്തിൽ 125 റൺസ് നേടി ജുറൽ സെഞ്ച്വറി സ്വന്തമാക്കി. 15 ഫോറുകളും മൂന്ന് സിക്സുകളും അടങ്ങുന്നതാണ് താരത്തിന്റെ പ്രകടനം. കെഎൽ രാഹുൽ 197 പന്തിൽ 100 റൺസാണ് നേടിയത്. 12 ഫോറുകളാണ് താരത്തിന്റെ ബാറ്റിൽ നിന്നും പിറന്നത്. ക്യാപ്റ്റൻ ശുഭ്മൻ ഗിൽ അർദ്ധ സെഞ്ച്വറി നേടിയും മികച്ച പ്രകടനം നടത്തി. 100 പന്തിൽ അഞ്ചു ഫോറുകൾ അടക്കം 50 റൺസാണ് ഇന്ത്യൻ ക്യാപ്റ്റന്റെ ബാറ്റിൽ നിന്നും പിറന്നത്.

അതേസമയം ആദ്യ ഇന്നിങ്സിൽ വെസ്റ്റ് ഇൻഡീസ് 162 റൺസിനാണ് പുറത്തായത്. ഇന്ത്യൻ ബൗളിങ്ങിൽ മുഹമ്മദ് സിറാജ് നാല് വിക്കറ്റും ജസ്പ്രീത് ബുംറ മൂന്ന് വിക്കറ്റും നേടി തിളങ്ങി. കുൽദീപ് യാദവ് രണ്ട് വിക്കറ്റും വാഷിംഗ്ടൺ സുന്ദർ ഒരു വിക്കറ്റും സ്വന്തമാക്കി. 

ഇന്ത്യ പ്ലെയിങ് ഇലവൻ

യശസ്വി ജയ്സ്വാൾ, കെ എൽ രാഹുൽ, സായ് സുദർശൻ, ശുഭ്‌മാൻ ഗിൽ (ക്യാപ്റ്റൻ), ധ്രുവ് ജുറൽ (വിക്കറ്റ് കീപ്പർ), രവീന്ദ്ര ജഡേജ, വാഷിംഗ്‌ടൺ സുന്ദർ, നിതീഷ് കുമാർ റെഡ്ഡി, കുൽദീപ് യാദവ്, ജസ്പ്രീത് ബുംറ, മുഹമ്മദ് സിറാജ്

വെസ്റ്റ് ഇൻഡീസ് പ്ലെയിങ് ഇലവൻ

ടാഗെനറൈൻ ചന്ദർപോൾ, ജോൺ കാംബെൽ, അലിക് അത്തനാസ്, ബ്രാൻഡൻ കിംഗ്, ഷായ് ഹോപ്പ്(വിക്കറ്റ് കീപ്പർ), റോസ്റ്റൺ ചേസ്(ക്യാപ്റ്റൻ), ജസ്റ്റിൻ ഗ്രീവ്സ്, ജോമെൽ വാരിക്കൻ, ഖാരി പിയറി, ജോഹാൻ ലെയ്ൻ, ജെയ്‌ഡൻ സീൽസ്

India declared their first innings at 448 for five in the first Test between India and West Indies. Ravindra Jadeja shone in the match by scoring an unbeaten 104 off 176 balls. Jadeja's innings was studded with six fours and five huge sixes.