ദിയോറിയ: ഉത്തർപ്രദേശിലെ മഹാമഹർഷി ദേവരഹ ബാബ മെഡിക്കൽ കോളേജിലെ കുടിവെള്ള ടാങ്കിൽ അഴുകിയ നിലയിൽ കണ്ടെത്തിയ മ‍ൃതദേഹം 61-കാരന്റേതെന്ന് സ്ഥിരീകരിച്ചു. ടാങ്കിലെ വെള്ളം കുടിവെള്ളത്തിന് പുറമെ ശുചിമുറികൾ ഉൾപ്പെടെയുള്ള ആവശ്യങ്ങൾക്കും ഉപയോഗിച്ചിരുന്നതായി വെളിപ്പെട്ടതോടെ ആശുപത്രി അധികൃതരുടെ ഭാ​ഗത്ത് നിന്നും ഗുരുതരമായ വീഴ്ചയാണ് സംഭവിച്ചിരിക്കുന്നത്.

ALSO READ: ഉത്തർപ്രദേശിൽ ഇമാമിന്റെ ഭാര്യയെയും പെൺമക്കളെയും പള്ളി വളപ്പിൽ വെട്ടിക്കൊലപ്പെടുത്തി നിലയിൽ കണ്ടെത്തി  

കഴിഞ്ഞ തിങ്കളാഴ്ചയാണ് വെള്ളത്തിന് ദുർഗന്ധം അനുഭവപ്പെടുന്നതായി രോഗികൾ പരാതി ഉന്നയിച്ചത്. തുടർന്ന് നടത്തിയ പരിശോധനയിലാണ് അഞ്ചാം നിലയിലുള്ള ടാങ്കിൽ മൃതദേഹം കണ്ടെത്തിയത്. മൃതദേഹത്തിന് ദിവസങ്ങളോളം പഴക്കമേറിയതിനാൽ വലിയ തോതിൽ അഴുകിയ നിലയിലായിരുന്നു മൃതദേഹം. സംഭവത്തെ തുടർന്ന് മെഡിക്കൽ കോളേജ് പ്രിൻസിപ്പാളിനെ സസ്പെൻഡ് ചെയ്ത് ജില്ലാ മജിസ്ട്രേറ്റ് ദിവ്യ മിത്തലിന്റെ നേതൃത്വത്തിൽ അന്വേഷണം ആരംഭിച്ചു.

ALSO READ: വിധവയെ കൂട്ടബലാത്സംഗത്തിനിരയാക്കിയ കേസ്; വ്യാജ ചുഴലിക്കാറ്റ് മുന്നറിയിപ്പ് നൽകി പൊലിസ്; ബോട്ടുമായി രക്ഷപ്പെടാൻ ശ്രമിച്ച പ്രതികൾ അറസ്റ്റിൽ

മഹാരാഷ്ട്ര സ്വദേശിയായ അശോക് ഗവാൻഡേ (61) ആണ് മരിച്ചയാൾ എന്ന് തിരിച്ചറിഞ്ഞു. മാനസികാരോഗ്യ വെല്ലുവിളികൾ നേരിട്ടിരുന്ന ഇയാൾ ഉത്തർപ്രദേശിലെ ബന്ധുവീട്ടിൽ എത്തിയ ശേഷം വീട്ടുകാരുടെ കണ്ണുവെട്ടിച്ച് മുങ്ങുകയായിരുന്നു. പരുക്കേറ്റ നിലയിൽ നാട്ടുകാർ ഇയാളെ ആശുപത്രിയിൽ എത്തിച്ചെങ്കിലും പിന്നീട് ഇയാളെ കാണാതാവുകയായിരുന്നു. പോസ്റ്റ്മോർട്ടം റിപ്പോർട്ട് പ്രകാരം ശ്വാസംമുട്ടലാണ് മരണകാരണം.

ടാങ്കിലെ വെള്ളം കുടിവെള്ളത്തിന് ഉപയോഗിച്ചിട്ടില്ലെന്നും ശുചിമുറികൾക്കും മറ്റ് ആവശ്യങ്ങൾക്കുമാണ് ഉപയോഗിച്ചിരുന്നതെന്നുമാണ് ആശുപത്രി അധികൃതർ വിശദീകരണം. ആർക്കും തടസമില്ലാതെ ടെറസിലേക്ക് പ്രവേശിക്കാമായിരുന്നെന്നും സിസിടിവി ക്യാമറകൾ ഇല്ലാതിരുന്നെന്നും അന്വേഷണത്തിൽ കണ്ടെത്തി. ടെറസിൽ നിന്ന് മദ്യകുപ്പികളും ലഹരിവസ്തുക്കളും ലഭിച്ചതായി ജില്ലാ മജിസ്ട്രേറ്റിന്റെ റിപ്പോർട്ടിൽ വ്യക്തമാക്കുന്നുണ്ട്.

സംഭവം കൊലപാതകമാണോ എന്ന സംശയത്തിൽ പൊലിസ് അന്വേഷണം തുടരുകയാണ്. മരിച്ച 61-കാരൻ ഗോരഖ്പൂരിലെ ബന്ധുക്കളെ കാണാൻ എത്തിയ ശേഷം എങ്ങനെ ദിയോറിയയിലെ മെഡിക്കൽ കോളേജിലെ വാട്ടർ ടാങ്കിൽ എത്തിയെന്നും പൊലിസ് പരിശോധിക്കുന്നുണ്ട്. മൃതദേഹം കുടുംബത്തിന് കൈമാറിയി.