ദുബൈ: തിരക്കേറിയ ബനിയാസ് പ്രദേശത്ത് വെച്ച് ശ്വാസതടസ്സം നേരിട്ട് ബോധരഹിതയായ പിഞ്ചുകുഞ്ഞിന് രക്ഷകനായി മാറിയ ദുബൈ നിവാസിയെ ആദരിച്ച് ദുബൈ സിവിലിറ്റി കമ്മിറ്റി. ഉവൈസ് ബഹ്‌റാം മുഫാരിദ് എന്ന 38-കാരന്റെ പെട്ടെന്നുള്ള ഇടപെടലാണ് നിർണ്ണായകമായത്.

നിർണായക നിമിഷത്തിലെ രക്ഷാപ്രവർത്തനം

ഉവൈസ് ബനിയാസ് പ്രദേശത്ത് ഇരിക്കുമ്പോൾ, കടുത്ത ശ്വാസതടസ്സം നേരിടുകയും ബോധം നഷ്ടപ്പെടുകയും ചെയ്ത മകളെയും കൊണ്ട് ഒരു അമ്മ ഓടിയെത്തുകയായിരുന്നു. ഒട്ടും താമസിക്കാതെ കുട്ടിയെ കൈകളിലെടുത്ത ഉവൈസ് പ്രഥമശുശ്രൂഷ നൽകി. നിമിഷങ്ങൾക്കുള്ളിൽ കുട്ടിക്ക് ശ്വാസം എടുക്കാമെന്നായി. ഉവൈസിന്റെ തക്കതായ ഇടപെടലാണ് കുട്ടിയുടെ ജീവൻ രക്ഷിക്കാൻ സഹായിച്ചത്.

ALSO READ: 1,400-ലധികം പൗരന്മാരുടെ 475 മില്യൺ ദിർഹം കടം എഴുതിത്തള്ളി യുഎഇ പ്രസിഡന്റ് 

ഒന്നുമറിയാതെ ചുറ്റും നിന്നവരെ ആദ്യം നടുക്കുകയും പിന്നീട് ആശ്വാസം പകരുകയും ചെയ്തത് ആ നിമിഷത്തിലെ ഉവൈസിന്റെ വേഗതയും സംയമനവുമായിരുന്നുവെന്ന് ദൃക്‌സാക്ഷികൾ വ്യക്തമാക്കി. ഉവൈസിന്റെ പ്രവൃത്തിയെ കമ്മിറ്റി ജനറൽ കോർഡിനേറ്റർ സയീദ് അൽ നസാരി പ്രശംസിച്ചു. ദുബൈയുടെ ആഴത്തിൽ വേരൂന്നിയ സാമൂഹിക മൂല്യങ്ങളെയാണ് ഈ പ്രവൃത്തി പ്രതിഫലിപ്പിക്കുന്നതെന്ന് അദ്ദേഹം ചൂണ്ടിക്കാട്ടി.

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം മുന്നോട്ടുവെച്ച കാരുണ്യം, ഐക്യദാർഢ്യം, സാമൂഹിക ഉത്തരവാദിത്തം എന്നീ തത്വങ്ങൾ ഉവൈസിന്റെ പ്രവൃത്തിയിൽ ഉൾക്കൊണ്ടിട്ടുണ്ടെന്ന് അൽ നസാരി വ്യക്തമാക്കി.

"ഒരു നിർണായക നിമിഷത്തിൽ ഒരു പെൺകുട്ടിയെ രക്ഷിക്കാൻ സഹായിച്ച മാന്യമായ ഇടപെടൽ ദുബൈയെ അതുല്യമാക്കുന്ന സഹകരണത്തിലും പരസ്പര പിന്തുണയിലും അധിഷ്ഠിതമായ ആത്മാവിന്റെ ഓർമ്മപ്പെടുത്തലാണ്," അൽ നസാരി പറഞ്ഞു.

ALSO READ: ദേശീയ ദിനത്തോടനുബന്ധിച്ച് വമ്പൻ പ്രഖ്യാപനവുമായി du; ഉപയോക്താക്കൾക്ക് 54GB സൗജന്യ ഡാറ്റയും മറ്റ് ഓഫറുകളും  

ഇതെന്റെ രണ്ടാമത്തെ വീട്

കഴിഞ്ഞ 15 വർഷമായി യുഎഇയിൽ താമസിക്കുന്ന ഉവൈസ്, താൻ പൂർണ്ണമായും സഹജാവബോധത്തിൽ നിന്നും മനുഷ്യത്വത്തിൽ നിന്നും മാത്രമാണ് പ്രവർത്തിച്ചതെന്ന് പ്രതികരിച്ചു. ഭാര്യ നഴ്‌സായി ജോലി ചെയ്യുന്ന ദുബൈ തന്റെ രണ്ടാമത്തെ വീടാണെന്നും അദ്ദേഹം പറഞ്ഞു.

"ഞാൻ ചെയ്തത് ഈ സമൂഹത്തിന്റെ മൂല്യങ്ങളെ പ്രതിഫലിക്കുന്ന ഒരു മാനുഷിക പ്രവൃത്തി മാത്രമാണ്," അദ്ദേഹം കൂട്ടിച്ചേർത്തു.

ലോകത്തിലെ ഏറ്റവും പരിഷ്കൃതവും സാമൂഹികമായി യോജിച്ചതുമായ നഗരങ്ങളിലൊന്നായി ദുബൈ തുടരുന്നുവെന്ന് ഉറപ്പാക്കുന്നതിനുള്ള ദൗത്യത്തിന്റെ ഭാഗമായാണ് ഇത്തരം മാതൃകാപരമായ പ്രവൃത്തികളെ കമ്മിറ്റി അഭിനന്ദിക്കുന്നത്.

authorities honored a young man in dubai for rescuing a child who collapsed due to breathing difficulty on a busy street. his quick response and timely help prevented a major tragedy, earning wide appreciation.