മൂവാറ്റുപ്പുഴ: അധ്യാപിക വഴക്കുപറഞ്ഞതില്‍ മനംനൊന്ത് തീകൊളുത്തി ആത്മഹത്യയ്ക്ക് ശ്രമിച്ച വിദ്യാര്‍ഥിനി മരിച്ചു. മൂവാറ്റുപ്പുഴ ഗവ.മോഡല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിനിയായ പനവേലില്‍ അനിരുദ്ധന്റെ മകള്‍ ടി.എ നന്ദനയാണ് മരിച്ചത്. ഗുരുതരമായി പൊള്ളലേറ്റ വിദ്യാര്‍ഥിനി കോട്ടയം മെഡിക്കല്‍ കോളേജില്‍ ചികില്‍സയിലായിരുന്നു. ശനിയാഴ്ച പുലര്‍ച്ചെയാണ് മരണം. സംഭവത്തില്‍ അധ്യാപികയ്‌ക്കെതിരേ വാഴക്കുളം പൊലിസ് കേസെടുത്തിട്ടുണ്ട്. ഏറ്റുമാനൂര്‍ മജിസ്‌ട്രേറ്റ് പെണ്‍കുട്ടിയുടെ മൊഴി രേഖപ്പെടുത്തിയിരുന്നു.

കഴിഞ്ഞ ശനിയാഴ്ചയായിരുന്നു സംഭവം. പരീക്ഷ എഴുതാന്‍ സ്‌കൂളിലെത്തിയ വിദ്യാര്‍ഥികളുടെ ബാഗ് മൊബൈല്‍ ഫോണ്‍ കൊണ്ടുവന്നിട്ടുണ്ടോ എന്നറിയാനായി പരിശോധിച്ചിരുന്നു. മകളുടെ ബാഗില്‍ നിന്നും കത്ത് ലഭിച്ചതിനെ തുടര്‍ന്ന് സ്റ്റാഫ് റൂമില്‍ വിളിച്ച് അധ്യാപിക മറ്റു അധ്യാപകരുടെ മുന്‍പില്‍വച്ച് അപമാനിച്ചു. ഇതില്‍ മനംനൊന്താണ് മണ്ണെണ്ണ ഒഴിച്ച് തീ കൊളുത്തി വിദ്യാര്‍ഥിനി ആത്മഹത്യയ്ക്ക് ശ്രമിച്ചത്.