ആരോഗ്യകരമായ സാലഡുകളിലും സാന്‍ഡ്‌വിച്ചുകളിലുമെല്ലാം ഇന്ന് ഒഴിവാക്കാനാവാത്ത ഒന്നാണ് ലെറ്റിയൂസ് (Lettuce). കലോറി കുറവായതിനാലും ജലാംശം കൂടുതലുള്ളതിനാലും ഭാരം കുറയ്ക്കാന്‍ ആഗ്രഹിക്കുന്നവരുടെ പ്രിയപ്പെട്ട ഭക്ഷണമാണിത്. വൈറ്റമിന്‍ എ, സി എന്നിവയാല്‍ സമ്പന്നമായ ലെറ്റിയൂസ് ചര്‍മത്തിന്റെയും കണ്ണിന്റെയും ആരോഗ്യത്തിനും ഉത്തമമാണ്.

എന്നാല്‍, കടയില്‍ നിന്ന് വാങ്ങി രണ്ടുദിവസം കഴിയുമ്പോഴേക്കും ലെറ്റിയൂസ് വാടിപ്പോകുന്നതും ഇലകള്‍ക്ക് ബ്രൗണ്‍ നിറം വരുന്നതും പലരെയും അലട്ടുന്ന പ്രശ്‌നമാണ്. ചില നിസ്സാര കാര്യങ്ങള്‍ ശ്രദ്ധിച്ചാല്‍ ദിവസങ്ങളോളം ഇവ ഫ്രഷ് ആയി സൂക്ഷിക്കാന്‍ സാധിക്കും.

1. ഈര്‍പ്പം പൂര്‍ണ്ണമായും ഒഴിവാക്കാം

ലെറ്റിയൂസ് കഴുകി വൃത്തിയാക്കിയ ശേഷം അതില്‍ ഒട്ടും വെള്ളമില്ലെന്ന് ഉറപ്പുവരുത്തണം. പേപ്പര്‍ ടവ്വലുകള്‍ ഉപയോഗിച്ച് ഇലകളിലെ വെള്ളം ഒപ്പിയെടുക്കുക. വെള്ളത്തിന്റെ അംശം ഇലകളിലിരിക്കുന്നത് അവ പെട്ടെന്ന് ചീഞ്ഞുപോകാന്‍ കാരണമാകും.

2. പേപ്പര്‍ ടവ്വല്‍ വിദ്യ

ലെറ്റിയൂസ് സൂക്ഷിക്കുന്ന പാത്രത്തിന്റെയോ കവറിന്റെയോ അടിയില്‍ ഒരു പേപ്പര്‍ ടവ്വല്‍ വിരിക്കുക. ഇതിനു മുകളില്‍ ഇലകള്‍ വെച്ച ശേഷം വീണ്ടും ഒരു പേപ്പര്‍ ടവ്വല്‍ കൂടി മുകളില്‍ വെച്ച് മൂടാം. അധികമായി വരുന്ന ഈര്‍പ്പം ഈ പേപ്പര്‍ വലിച്ചെടുക്കും. പേപ്പര്‍ ടവ്വല്‍ നനയുന്നതിനനുസരിച്ച് അത് മാറ്റി പുതിയത് വയ്ക്കുന്നത് ആയുസ്സ് കൂട്ടാന്‍ സഹായിക്കും.

3. എയര്‍ടൈറ്റ് കണ്ടെയ്‌നര്‍ ഉപയോഗിക്കാം

ലെറ്റിയൂസ് കടയില്‍ നിന്ന് ലഭിക്കുന്ന പ്ലാസ്റ്റിക് കവറുകളില്‍ തന്നെ സൂക്ഷിക്കരുത്. പകരം ഒരു എയര്‍ടൈറ്റ് കണ്ടെയ്‌നറിലേക്ക് മാറ്റുക. ശ്രദ്ധിക്കുക, പാത്രത്തില്‍ ഇലകള്‍ കുത്തിനിറയ്ക്കരുത്; നേരിയ വായുസഞ്ചാരം ഉണ്ടാകുന്നത് ഇലകള്‍ കൂടുതല്‍ കാലം ക്രിസ്പി (Crispy) ആയിരിക്കാന്‍ സഹായിക്കും.

4. പഴങ്ങള്‍ക്കടുത്ത് വേണ്ട!

ആപ്പിള്‍, അവോക്കാഡോ തുടങ്ങിയ പഴങ്ങള്‍ 'എത്തിലീന്‍' എന്ന ഗ്യാസ് പുറത്തുവിടുന്നവയാണ്. ഇവയുടെ അടുത്ത് ലെറ്റിയൂസ് വെച്ചാല്‍ അത് വേഗത്തില്‍ പഴുക്കാനും നിറം മാറാനും സാധ്യതയുണ്ട്. അതിനാല്‍ പഴങ്ങളും ലെറ്റിയൂസും വെവ്വേറെ സൂക്ഷിക്കാന്‍ ശ്രദ്ധിക്കുക.

 ALSO READ: വാഷിങ് മെഷീനുള്ളില്‍ പാമ്പ്..! നിങ്ങളുടെ വീട്ടിലെ ഗൃഹോപകരണങ്ങള്‍ സുരക്ഷിതമാണോ? ശ്രദ്ധിക്കാന്‍ ചില കാര്യങ്ങള്‍

5. ഫ്രിഡ്ജിലെ ശരിയായ ഇടം

ഫ്രിഡ്ജിനുള്ളിലെ പച്ചക്കറികള്‍ വയ്ക്കുന്ന 'ക്രിസ്പര്‍ ഡ്രോയറില്‍' (Crisper Drawer) വേണം ലെറ്റിയൂസ് വയ്ക്കാന്‍. തുറന്ന ഷെല്‍ഫുകളില്‍ വെച്ചാല്‍ താപനിലയിലെ വ്യതിയാനം മൂലം ഇവ വേഗം വാടിപ്പോകും.

ടിപ്പ്: ലെറ്റിയൂസ് മുറിച്ചു കഴിഞ്ഞാല്‍ അത് എത്രയും വേഗം ഉപയോഗിക്കുന്നതാണ് നല്ലത്. സൂക്ഷിച്ചു വയ്ക്കണമെന്നുണ്ടെങ്കില്‍ ഉണങ്ങിയ പേപ്പര്‍ ടവ്വലില്‍ പൊതിഞ്ഞ് മാത്രം പാത്രത്തില്‍ വയ്ക്കുക.

By removing excess moisture, using paper towels and airtight containers, keeping lettuce away from ethylene-producing fruits, and storing it in the fridge’s crisper drawer, lettuce can be kept fresh and crisp for several days.