മസ്‌കത്ത്: മസ്‌കറ്റിലെ ഇന്ത്യന്‍ സ്‌കൂള്‍ ദര്‍ശൈത് സംഘടിപ്പിച്ച പിക്‌നിക്കിനിടെ കുട്ടികള്‍ക്ക് പഴകിയ ഭക്ഷണം നല്‍കിയതായി മാതാപിതാക്കള്‍ പരാതി ഉന്നയിച്ചു. ജനുവരി 13ന് റുസൈല്‍ പാര്‍ക്കില്‍ നടന്ന പിക്‌നിക്കിലാണ് ക്ലാസ് മൂന്ന് മുതല്‍ അഞ്ച് വരെ പഠിക്കുന്ന വിദ്യാര്‍ഥികള്‍ക്ക് ഗുണമേന്മയില്ലാത്ത ഭക്ഷണം നല്‍കിയതെന്നാണ് പരാതി.

ഭക്ഷണത്തില്‍ ദുര്‍ഗന്ധം ഉണ്ടായിരുന്നുവെന്നും കഴിക്കാന്‍ പറ്റാത്ത നിലയിലായിരുന്നുവെന്നും മാതാപിതാക്കള്‍ അറിയിച്ചു. ചില കുട്ടികള്‍ ഭക്ഷണം കഴിക്കാന്‍ വിസമ്മതിച്ചതായും, പിക്‌നിക്കിന് ശേഷം വീട്ടിലെത്തിയപ്പോള്‍ ചിലര്‍ക്ക് അസ്വസ്ഥതയും ആരോഗ്യപ്രശ്‌നങ്ങളും ഉണ്ടായതായും പരാതിയില്‍ പറയുന്നു. ഭക്ഷണം കഴിക്കാത്ത കുട്ടികള്‍ക്ക് പകരം മറ്റേതെങ്കിലും ഭക്ഷണം നല്‍കാന്‍ സ്‌കൂള്‍ അധികൃതര്‍ തയ്യാറായില്ലെന്നും മാതാപിതാക്കള്‍ ആരോപിച്ചു.

സംഭവത്തെ തുടര്‍ന്ന് സ്‌കൂള്‍ അധികൃതര്‍ വിശദീകരണം നല്‍കി. ഭക്ഷണം തയ്യാറാക്കുകയും വിതരണം ചെയ്യുകയും ചെയ്തിരുന്ന പുറം ഏജന്‍സിയുടെ ഭാഗത്തുനിന്നുണ്ടായ പിഴവാണ് സംഭവത്തിന് കാരണമെന്നാണ് സ്‌കൂള്‍ വ്യക്തമാക്കിയത്. ഭക്ഷണം കൈകാര്യം ചെയ്തതിലും ഗതാഗതത്തിനിടയിലും വീഴ്ച സംഭവിച്ചതായി സ്‌കൂള്‍ അധികൃതര്‍ സമ്മതിച്ചു.

സംഭവത്തില്‍ ഉത്തരവാദിത്വം ഏറ്റെടുത്ത സ്‌കൂള്‍, ബന്ധപ്പെട്ട ഭക്ഷണ വിതരണ ഏജന്‍സിയെ സ്ഥിരമായി ബ്ലാക്ക്‌ലിസ്റ്റ് ചെയ്തതായി അറിയിച്ചു. ഇതിന് പുറമെ, പിക്‌നിക്കിനായി ഈടാക്കിയ 3.5 ഒമാന്‍ റിയാല്‍ മുഴുവന്‍ തുകയും മാതാപിതാക്കള്‍ക്ക് തിരികെ നല്‍കുമെന്ന് സ്‌കൂള്‍ അറിയിച്ചു. റീഫണ്ട് നടപടികള്‍ ജനുവരി 19 മുതല്‍ ആരംഭിക്കുമെന്നും അറിയിച്ചു.

ഇനിമുതല്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ കര്‍ശന നടപടികള്‍ സ്വീകരിക്കുമെന്ന് സ്‌കൂള്‍ അധികൃതര്‍ വ്യക്തമാക്കി. സ്‌കൂള്‍ പരിപാടികളില്‍ നല്‍കുന്ന ഭക്ഷണം മുന്‍കൂട്ടി പരിശോധിക്കുകയും, ഗുണനിലവാരം ഉറപ്പാക്കുന്നതിനായി പ്രത്യേക സമിതി രൂപീകരിക്കുകയും ചെയ്യുമെന്ന് അധികൃതര്‍ അറിയിച്ചു. സംഭവത്തില്‍ മാതാപിതാക്കളോടും കുട്ടികളോടും സ്‌കൂള്‍ ഖേദം രേഖപ്പെടുത്തി.

Parents complained after students were served stale food during a picnic organised by Indian School Darsait in Muscat. The school announced a full refund and took action against the food supplier