ദോഹ: രാജ്യത്ത് ഭിക്ഷാടനം തടയുന്നതിനും സാമൂഹിക ക്രമം നിലനിര്‍ത്തുന്നതിനും പൊതുജനങ്ങളുടെ സഹകരണം തേടി ഖത്തര്‍ ആഭ്യന്തര മന്ത്രാലയം. ഭിക്ഷാടനം സംസ്‌കാരമില്ലാത്ത സ്വഭാവമാണെന്നും ഇത്തരം പ്രവണതകള്‍ക്കെതിരെ സമൂഹം ഒറ്റക്കെട്ടായി നില്‍ക്കണമെന്നും മന്ത്രാലയം ഔദ്യോഗിക പ്ലാറ്റ്‌ഫോമുകളിലൂടെ ആവശ്യപ്പെട്ടു.
ഭിക്ഷാടനം ശ്രദ്ധയില്‍പ്പെടുന്ന പക്ഷം മെട്രാഷ് (Mterash) ആപ്ലിക്കേഷന്‍ വഴിയോ നിശ്ചയിക്കപ്പെട്ട ഹോട്ട്‌ലൈന്‍ നമ്പറുകള്‍ വഴിയോ അധികൃതരെ വിവരമറിയിക്കാന്‍ മന്ത്രാലയം നിര്‍ദ്ദേശിച്ചു.

വിവരമറിയിക്കേണ്ട രീതി:

* പൊതുജനങ്ങള്‍ക്ക് താഴെ പറയുന്ന നമ്പറുകളില്‍ വിളിച്ച് പരാതികള്‍ രജിസ്റ്റര്‍ ചെയ്യാവുന്നതാണ്:
* ഫോണ്‍: 2347483
* ഫോണ്‍: 33618627

സാമൂഹിക മൂല്യങ്ങള്‍ ഉയര്‍ത്തിപ്പിടിക്കുന്നതിനും നിയമവിരുദ്ധമായ ഇത്തരം രീതികളെ ഉന്മൂലനം ചെയ്യുന്നതിനും പൊതുജനങ്ങളുടെ ജാഗ്രതയ്ക്കും കൃത്യസമയത്തുള്ള റിപ്പോര്‍ട്ടിംഗിനും വലിയ പങ്കുണ്ടെന്ന് മന്ത്രാലയം വ്യക്തമാക്കി. നെഗറ്റീവ് സ്വഭാവങ്ങള്‍ക്കെതിരെയുള്ള പോരാട്ടത്തില്‍ ഓരോ താമസക്കാരനും ഉത്തരവാദിത്തത്തോടെ പെരുമാറണമെന്നും അധികൃതര്‍ കൂട്ടിച്ചേര്‍ത്തു.
ഖത്തറിലെ നിയമപ്രകാരം ഭിക്ഷാടനം ശിക്ഷാര്‍ഹമായ കുറ്റമാണ്. അര്‍ഹരായവരിലേക്ക് സഹായങ്ങള്‍ എത്തുന്നുവെന്ന് ഉറപ്പാക്കാന്‍ അംഗീകൃത ജീവകാരുണ്യ സംഘടനകള്‍ വഴി മാത്രം ദാനധര്‍മ്മങ്ങള്‍ നല്‍കണമെന്നും ആഭ്യന്തര മന്ത്രാലയം നേരത്തെ ഓര്‍മ്മിപ്പിച്ചിരുന്നു.

ALSO READ: യു.എ.ഇയില്‍ അടുത്ത മൂന്ന് വര്‍ഷത്തേക്കുള്ള സ്‌കൂള്‍ കലണ്ടര്‍ പ്രഖ്യാപിച്ചു; യാത്രകളും അവധികളും പ്ലാന്‍ ചെയ്യാന്‍ അറിഞ്ഞിരിക്കാം തീയതികള്‍

English Summary: The Qatar Ministry of Interior (MoI) has launched a strict campaign to combat begging during the Holy Month of Ramadan. Describing begging as 'uncivilized behavior,' authorities have called for public vigilance to ensure that charitable donations reach only those truly in need through official channels.