പാലക്കാട്: മന്ത്രി കെ ബി ഗണേഷ് കുമാറിനെതിരേ ഭാര്യ നല്‍കിയ പരാതിയില്‍ സര്‍ക്കാര്‍ നടപടിയെടുക്കാന്‍ വൈകുന്നതില്‍ രൂക്ഷവിമര്‍ശനവുമായി രാഹുല്‍ മാങ്കൂട്ടത്തില്‍. സ്ത്രീസുരക്ഷക്ക് വെമ്പല്‍ കൊള്ളുന്ന സര്‍ക്കാര്‍ മന്ത്രിക്കെതിരായ പരാതിയില്‍ എന്തു ചെയ്തു?. ഉമ്മന്‍ ചാണ്ടിയുടെ മനസ്സ് എപ്പോഴെങ്കിലും വേദനിച്ചിട്ടുണ്ടെങ്കില്‍ അതിന്റെ കൂലിയാണ് ഇപ്പോള്‍ കിട്ടുന്നതെന്ന് ഗണേഷ് കുമാര്‍ മനസ്സിലാക്കണമെന്നും രാഹുല്‍ പറഞ്ഞു.

ഒരു ഇമെയില്‍ ലഭിച്ചതിലൂടെ മാത്രം പ്രത്യേക അന്വേഷണ സംഘം രൂപീകരിച്ച് ഹോട്ടല്‍ വളഞ്ഞ് ജനപ്രതിനിധിയെ അറസ്റ്റ് ചെയ്യാന്‍ താല്‍പര്യപ്പെടുന്ന പൊലിസിനോടും മുഖ്യമന്ത്രി പിണറായി വിജയനോടും ചോദിക്കാനുള്ള കാര്യം, കെ.ബി ഗണേഷ് കുമാറിനെ അറസ്റ്റ് ചെയ്യാന്‍ എപ്പോഴാണ് പുറപ്പെടുകയെന്നാണ്. എപ്പോഴാണ് ആ മന്ത്രിയുടെ രാജി ചോദിച്ചുവാങ്ങുകയെന്ന് അറിയാന്‍ കേരളത്തിലെ ജനങ്ങള്‍ക്ക് താല്‍പര്യമുണ്ട്. 

ഗണേഷ് കുമാറിനെതിരെ ഭാര്യ നേരിട്ട് പൊലീസിനെ വിളിച്ച് പരാതി പറയുകയായിരുന്നു. അവരുടെ ഫോണ്‍ ചോര്‍ത്തിക്കൊണ്ടിരിക്കുകയാണെന്നാണ് അവര്‍ പറയുന്നത്. ഗുരുതരമായ ആരോപണമാണിത്. മുഖ്യമന്ത്രിയുടെ മകളെ വിളിച്ചിരുന്നുവെന്ന് ഗണേഷ് കുമാറിന്റെ ഭാര്യ പറയുന്നു. എന്നിട്ട് എന്തു നടപടിയുണ്ടായെന്ന് മുഖ്യമന്ത്രിയും പൊലീസും പറയണമെന്നും രാഹുല്‍ മാങ്കൂട്ടത്തില്‍ ആവശ്യപ്പെട്ടു.