തിരുവനന്തപുരം: ഭക്ഷ്യഭദ്രതാ മുന്‍ഗണനാ പട്ടികയില്‍ ഉള്‍പ്പെടാത്ത 1.21 കോടി ജനങ്ങള്‍ക്കു രണ്ടു രൂപ നിരക്കില്‍ അരി നല്‍കുമെന്നു സംസ്ഥാന സര്‍ക്കാര്‍ പ്രഖ്യാപിച്ചെങ്കിലും അര്‍ഹരായ കുടുംബങ്ങളെ കണ്ടെത്താന്‍ കഴിയാത്തതിനാല്‍ വിതരണം മുടങ്ങുന്നതായി ഓള്‍ ഇന്ത്യ റേഷന്‍ ഡീലേഴ്‌സ് അസോസിയേഷന്‍ ദേശീയ ജനറല്‍ സെക്രട്ടറി ബേബിച്ചന്‍ മുക്കാടന്‍ വാര്‍ത്താസമ്മേളനത്തില്‍ ആരോപിച്ചു.
മുന്‍ഗണനാ വിഭാഗത്തില്‍പ്പെടുന്ന 1.54 കോടി കുടുംബങ്ങള്‍ക്കു സൗജന്യമായി അരി വിതരണം ചെയ്യാന്‍ അതാതു ജില്ലാ സപ്ലൈ ഓഫിസര്‍മാരെ ചുമതലപ്പെടുത്തി സര്‍ക്കാര്‍ ഇതിനകം ഉത്തരവിറക്കിയിരുന്നു. മൊത്ത വ്യാപാരികള്‍ എഫ്.സി.ഐയില്‍ നിന്നും അരിയെടുത്ത് റേഷന്‍ കടകള്‍ക്കു നല്‍കുകയും ചെയ്തു.
എന്നാല്‍ അരി ലഭിക്കാന്‍ അര്‍ഹരായ കുടുംബങ്ങളെ കണ്ടെത്തി പട്ടിക പ്രസിദ്ധീകരിക്കാത്തതിനാല്‍ റേഷന്‍ കടകളില്‍ അരിവിതരണം തുടങ്ങിയില്ല. കേന്ദ്ര സര്‍ക്കാര്‍ ഇവര്‍ക്കായി അധിക വിഹിതമായി അനുവദിച്ച 4.25 ലക്ഷം മെട്രിക് ടണ്‍ അരി, വിതരണം നടത്തിയില്ലെങ്കില്‍ ലാപ്‌സാവാന്‍ സാധ്യതയുണ്ടെന്നും അദ്ദേഹം പറഞ്ഞു.
വകുപ്പു മന്ത്രിയുടെ പ്രവര്‍ത്തനങ്ങള്‍ക്കു തടയിടാനായി ഒരു വിഭാഗം ഉദ്യോഗസ്ഥരും റേഷന്‍ മാഫിയ സംഘവും ശ്രമം നടത്തുന്നുവെന്നും ബേബിച്ചന്‍ മുക്കാടന്‍ വാര്‍ത്താസമ്മേളനത്തില്‍ ആരോപിച്ചു. സംസ്ഥാന സെക്രട്ടറി എ.ഷാജഹാനും പങ്കെടുത്തു.