ആലപ്പുഴ: തുഴയെറിഞ്ഞ് അവരെത്തി. ഗ്രാമാന്തരങ്ങളിലെ പുത്തന്‍ പ്രതിഭകളെ തേടി.വിശാല കൊച്ചിയുടെ ഓളപ്പരില്‍നിന്നും കഴിഞ്ഞ 16 ന് തുടക്കമിട്ട ആര്‍മിയുടെ ദക്ഷിണ മേഖല വിഭാഗമായ ഇല്കട്രോണിക്ക് ആന്റ് മെക്കാനിക്കല്‍ എന്‍ജിനീയറിംഗ് സെന്ററിലെ പതിനേഴ് അംഗ സംഘം ഇന്നലെ ആലപ്പുഴയിലെത്തി.
രാജ്യം സംരക്ഷിക്കുന്ന പട്ടാളക്കാരന്റെ വേദനകള്‍ പങ്കുവെച്ചും കേരളത്തിന്റെ ഗ്രാമാന്തരങ്ങളില്‍ സമ്പുഷ്ടമായ കായിക ശേഷിയെ കണ്ടറിഞ്ഞുമാണ് സംഘം യാത്ര തുടരുന്നത്. പട്ടാളക്കാരുടെ നീറുന്ന പ്രശ്‌നങ്ങള്‍ പഠിക്കാനും കയാക്കിംഗ് എന്ന കായിക ഇനത്തിന്റെ പ്രാധാന്യത്തെ കുറിച്ച് യുവാക്കളില്‍ അവബോധം സൃഷ്ടിക്കലുമാണ് സംഘത്തിന്റെ സാഹസിക യാത്രയുടെ ലക്ഷ്യം.
എറണാകുളം,കോട്ടയം, ആലപ്പുഴ ജില്ലകള്‍ സംഘം പിന്നിട്ടു കഴിഞ്ഞു. നൂറു കിലോമീറ്റര്‍ തുഴഞ്ഞെത്തിയ സംഘത്തില്‍ പത്തോളം അന്തര്‍ദേശിയ കയാക്കിംഗ് താരങ്ങളാണുളളത്. കഠിനമായ ചൂടും മോശം കാലവസ്ഥയും ഓളപരിപ്പിലെ ഗതിവിഗതികളും സംഘത്തിന്റെ പ്രയാണത്തിന് തടസം സൃഷ്ടിക്കുന്നുണ്ടെങ്കിലും ഇതിനെയൊക്കെ അതിജീവിച്ചാണ് യാത്ര തുടരുന്നത്. ദൗത്യത്തിന് ഇടയില്‍ സംഘം വിവിധ പ്രദേശങ്ങളില്‍ എത്തി വിവരശേഖരണം നടത്തുന്നുണ്ട്. പത്താം ക്ലാസ് പഠനം പൂര്‍ത്തിയാക്കിയ യുവാക്കള്‍ക്ക് പട്ടാളത്തില്‍ ചേര്‍ന്നു പ്രവര്‍ത്തിക്കുന്നതിന്റെ പ്രാധാന്യവും തൊഴില്‍ സാധ്യതയും വിവരിച്ചു നല്‍കുന്നുണ്ട്.
തോക്കുകള്‍ ഏന്തി അതിര്‍ത്തി കാക്കുന്ന കാര്‍ക്കശ്യക്കാരാണ് പട്ടാളക്കാരെന്ന പതിവ് സങ്കല്‍പ്പത്തിന് മാറ്റം വരുത്തിയാണ് ഇവര്‍ ജനങ്ങളുടെ ഇടയില്‍ സൗഹൃദ സംഗമം നടത്തുന്നത്. അതുക്കൊണ്ടുതന്നെ വിവിധ കേന്ദ്രങ്ങളിലെത്തുന്ന സംഘത്തിന് ജനങ്ങളില്‍നിന്നും ശക്തമായ പിന്തുണയാണ് ലഭിച്ചുവരുന്നത്. പത്തംഗ തുഴച്ചില്‍ക്കാര്‍ക്ക് പുറമെ ഏഴുപേര്‍ അടങ്ങുന്ന വിദഗ്ധ സംഘവും അനുഗമിക്കുന്നുണ്ട്. ലഭ്യമാകുന്ന വിവരങ്ങള്‍ ദൗത്യ പൂര്‍ത്തീകരണത്തിനുശേഷം കരസേനയുടെ ഉന്നതതലങ്ങളിലെത്തിക്കും.
മലയാളിയായ ക്യാപ്ടന്‍ സി.എ അജിമോനും ആര്‍മിയുടെ ദക്ഷിണമേഖലയുടെ പരിശീലകന്‍ മധു പി.എസ് കൈനകരിയുമാണ് നേതൃത്വം നല്‍കുന്നത്. 200 കിലോമീറ്റര്‍ തുഴഞ്ഞ് 25 ന് കൊല്ലത്ത് ദൗത്യം അവസാനിക്കും.നടനും കൊല്ലം എം.എല്‍.എയുമായ മുകേഷ് സമാപന സമ്മേളനത്തില്‍ പങ്കെടുക്കും.