ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ലിവര്‍പൂള്‍- ചെല്‍സി പോരാട്ടം സമനിലയില്‍. 1-1നാണ് കരുത്തന്മാര്‍ ഒപ്പത്തിനൊപ്പം പിരിഞ്ഞത്. മറ്റൊരു മത്സരത്തില്‍ ആഴ്‌സണലിനെ വാട്‌ഫോര്‍ഡ് 2-1നു അട്ടിമറിച്ചു. സതാംപ്ടനെ സ്വാന്‍സീ സിറ്റി 2-1നു കീഴടക്കിയപ്പോള്‍ ശക്തരായ ടോട്ടനം ഹോട്‌സ്പറിനെ സണ്ടര്‍ലാന്‍ഡ് ഗോള്‍രഹിത സമനിലയില്‍ തളച്ചു. നിലവിലെ ചാംപ്യന്‍മാരായ ലെയ്സ്റ്റര്‍ സിറ്റിയുടെ കഷ്ടകാലത്തിനു അറുതിയായില്ല. ഇത്തവണ ബേണ്‍ലി അവരെ 1-0ത്തിനു വീഴ്ത്തി. ക്രിസ്റ്റല്‍ പാലസ് 2-0ത്തിനു ബേണ്‍മൗത്തിനെ കീഴടക്കിയപ്പോള്‍ മിഡ്ഡ്ല്‍സ്‌ബ്രൊ- വെസ്റ്റ് ബ്രോംവിച് പോരാട്ടം 1-1നു സമനില.
ലിവര്‍പൂളിന്റെ തട്ടകമായ ആന്‍ഫീല്‍ഡില്‍ നടന്ന പോരാട്ടത്തിലാണ് ചെല്‍സി സമനില വഴങ്ങിയത്. ആദ്യ പകുതിയില്‍ ഒരു ഗോളിനു മുന്നില്‍ നിന്ന ചെല്‍സിയെ രണ്ടാം പകുതിയിലെ ഗോളിലാണ് ലിവര്‍പൂള്‍ ഒപ്പം പിടിച്ചത്. കളിയുടെ 24ാം മിനുട്ടില്‍ ഡേവിഡ് ലൂയീസ് ചെല്‍സിയെ മുന്നില്‍ കടത്തി. രണ്ടാം പകുതി തുടങ്ങി 57ാം മിനുട്ടില്‍ വിനാല്‍ഡമിന്റെ ഗോള്‍ ലിവര്‍പൂളിനു സമനില സമ്മാനിച്ചു.
സ്വന്തം തട്ടകമായ എമിറേറ്റ്‌സ് സ്റ്റേഡിയത്തിലാണ് ആഴ്‌സണല്‍ അപ്രതീക്ഷിത അട്ടിമറി നേരിട്ടത്. കളി തുടങ്ങി ആദ്യ 15 മിനുട്ടിനുള്ളില്‍ തന്നെ വാട്‌ഫോര്‍ഡ് രണ്ടു ഗോളുകള്‍ ഗണ്ണേഴ്‌സിന്റെ വലയിലാക്കി അവരെ ഞെട്ടിച്ചു. പിന്നീട് പ്രതിരോധം തീര്‍ത്ത വാട്‌ഫോര്‍ഡിനു മുന്നില്‍ മറുപടി ഗോള്‍ നേടാന്‍ ആഴ്‌സണല്‍ കിണഞ്ഞു ശ്രമിച്ചു. 58ാം മിനുട്ടില്‍ ഇവോബിയുടെ മികവില്‍ അവര്‍ ഒരു ഗോള്‍ മടക്കിയെങ്കിലും അനിവാര്യമായ ദുരന്തം മറികടക്കാന്‍ സാധിച്ചില്ല.
പരിതാപകരമായ അവസ്ഥയിലൂടെ കടന്നുപോകുന്ന നിലവിലെ ചാംപ്യന്‍മാരായ ലെയ്സ്റ്റര്‍ സിറ്റി തോല്‍വിയോടെ ഒരു സ്ഥാനം വീണ്ടുമിറങ്ങി 16ല്‍ എത്തി നില്‍ക്കുന്നു. ബേണ്‍ലിയോടു 1-0ത്തിനു തോല്‍വി വഴങ്ങിയ അവര്‍ക്ക് ഇനിയുള്ള മത്സരങ്ങള്‍ നിര്‍ണായകമാണ്.
ഇനിയും തോല്‍വിയില്‍ നിന്നു കരകയറാന്‍ സാധിച്ചില്ലെങ്കില്‍ തരംതാഴ്ത്തല്‍ മേഖലയിലേക്കാണ് ടീം പോകുന്നത്. നിലവില്‍ ക്രിസ്റ്റല്‍ പാലസ്, സണ്ടര്‍ലാന്‍ഡ്, ഹള്‍ സിറ്റി ടീമുകളാണ് തരംതാഴ്ത്തല്‍ ഭീഷണി നേരിടുന്നത്.
പോയിന്റ് പട്ടികയില്‍ ചെല്‍സി തന്നെ മുന്നേറുന്നു. 23 മത്സരങ്ങളില്‍ നിന്നായി 56 പോയിന്റുകളാണു അവര്‍ക്കുള്ളത്. 47 പോയിന്റുകളുമായി ടോട്ടനം രണ്ടാം സ്ഥാനത്തും ആഴ്‌സണല്‍ മൂന്നാമതും. അപ്രതീക്ഷിത തോല്‍വി നേരിട്ടതാണ് ആഴ്‌സണലിനു തിരിച്ചടിയായത്. വിജയിച്ചിരുന്നെങ്കില്‍ 50 പോയിന്റുമായി അവര്‍ക്ക് രണ്ടാം സ്ഥാനത്തേക്ക് കയറാമായിരുന്നു. 46 പോയിന്റുമായി ലിവര്‍പൂള്‍ നാലാമത്.