സിഡ്‌നി: ആഷസ് പരമ്പരയിലെ അഞ്ചാം പോരാട്ടത്തില്‍ ഇംഗ്ലണ്ടിന് ഇന്നിങ്‌സ് തോല്‍വി. ഇന്നിങ്‌സിനും 123 റണ്‍സിനും ഉജ്ജ്വല വിജയം പിടിച്ചെടുത്ത ആസ്‌ത്രേലിയ അഞ്ച് ടെസ്റ്റുകളടങ്ങിയ പരമ്പര 4-0ത്തിന് സ്വന്തമാക്കി. നാലാം ടെസ്റ്റ് സമനിലയില്‍ അവസാനിച്ചിരുന്നു. ഇംഗ്ലണ്ടിന്റെ ഒന്നാം ഇന്നിങ്‌സ് സ്‌കോറായ 346 റണ്‍സിന് മറുപടിയായി ആസ്‌ത്രേലിയ ഒന്നാം ഇന്നിങ്‌സില്‍ ഏഴ് വിക്കറ്റ് നഷ്ടത്തില്‍ 649 റണ്‍സെന്ന കൂറ്റന്‍ സ്‌കോര്‍ പടുത്തുയര്‍ത്തി ഇന്നിങ്‌സ് ഡിക്ലയര്‍ ചെയ്തിരുന്നു. 303 റണ്‍സ് ലീഡ് വഴങ്ങി രണ്ടാം ഇന്നിങ്‌സ് ബാറ്റ് ചെയ്ത ഇംഗ്ലണ്ടിന്റെ പോരാട്ടം വെറും 180 റണ്‍സില്‍ അവസാനിപ്പിച്ചാണ് ആസ്‌ത്രേലിയ മികച്ച വിജയം സ്വന്തമാക്കിയത്. നാല് വിക്കറ്റ് വീഴ്ത്തി പാറ്റ് കമ്മിന്‍സും മൂന്ന് വിക്കറ്റെടുത്ത് നതാന്‍ ലിയോണും ഇംഗ്ലീഷ് തകര്‍ച്ച വേഗത്തിലാക്കി. സ്റ്റാര്‍ക്ക്, ഹാസ്‌ലെവുഡ് എന്നിവര്‍ ഓരോ വിക്കറ്റും വീഴ്ത്തി. പാറ്റ് കമ്മിന്‍സ് കളിയിലെ താരമായപ്പോള്‍ ടൂര്‍ണമെന്റിലുടനീളം അത്യുജ്ജ്വലമായി ബാറ്റ് ചെയ്ത ഓസീസ് നായകന്‍ സ്റ്റീവന്‍ സ്മിത്ത് പരമ്പരയുടെ താരമായി.
രണ്ടാം ഇന്നിങ്‌സില്‍ ഇംഗ്ലണ്ടിനായി ക്യാപ്റ്റന്‍ ജോ റൂട്ട് (58) പൊരുതിയെങ്കിലും പിന്തുണയ്ക്കാനാളില്ലാതെ മടങ്ങേണ്ടി വന്നു. മധ്യനിരയില്‍ ബെയര്‍‌സ്റ്റോ 38 റണ്‍സെടുത്തു. മറ്റൊരു താരത്തിനും പിടിച്ചുനില്‍ക്കാന്‍ പോലും അവസരം ലഭിച്ചില്ല. 23 റണ്‍സുമായി ക്യുറന്‍ പുറത്താകാതെ നിന്നു.
നേരത്തെ ഉസ്മാന്‍ ഖവാജ (171), ഷോണ്‍ മാര്‍ഷ് (156), മിച്ചല്‍ മാര്‍ഷ് (101) എന്നിവരുടെ സെഞ്ച്വറികളും സ്റ്റീവന്‍ സ്മിത്ത് (83), ഡേവിഡ് വാര്‍ണര്‍ (56) എന്നിവരുടെ അര്‍ധ സെഞ്ച്വറികളുമാണ് ആസ്‌ത്രേലിയക്ക് കൂറ്റന്‍ സ്‌കോര്‍ സമ്മാനിച്ചത്.