മലമ്പുഴ: മലമ്പുഴ ഡാമിന്റെ വൃഷ്ടിപ്രദേശങ്ങളില്‍ നിന്ന് വന്‍തോതില്‍ മരംകടത്തുന്നു. ഇത്തരത്തില്‍ അനധികൃതമായി മുറിച്ചുമാറ്റുന്ന മരങ്ങള്‍ കടത്തുന്നതാകട്ടെ തൃശ്ശൂര്‍ ,എറണാക്കുളം മേഖലകളിലേക്കാണ്.  ആനക്കല്‍, ചേമ്പന മേഖലകളില്‍  ഡാമിനുള്ളിലെ ദ്വീപുകളില്‍ നിന്നാണ് ലോഡുകണക്കിന് മരങ്ങള്‍ മുറിച്ചുകടത്തുന്നത്. പ്രധാനമായും അക്കേഷ്യയിനത്തില്‍പ്പെട്ട മരങ്ങളാണ് മുറിക്കുന്നത്. നെല്ലി, മഞ്ഞപ്പാവട്ട തുടങ്ങി മറ്റ് മരങ്ങളും മുറിച്ചുമാറ്റുന്നുണ്ട്. പകല്‍ ലോഡുകളാക്കി വെച്ച മരങ്ങള്‍ രാത്രിയിലാണ് കടത്തുന്നത്. ഒരാഴ്ചയായി വീണ്ടും മരം മുറിക്കാന്‍ തുടങ്ങിയിട്ട്. മുറിച്ചുമാറ്റുന്ന മരങ്ങള്‍ കൊണ്ടുപോകുന്നത് ഇപ്പോള്‍ പെരുമ്പാവൂര്‍ മേഖലകളിലേക്കാണ്. ഈട്ടിയോട് സാദൃശ്യം തോന്നുന്ന  അക്കേഷ്യമരത്തിന് ഫര്‍ണിച്ചര്‍ നിര്‍മ്മാണരംഗത്ത് ഡിമാന്‍ഡ് ഏറിയതാണ് പെരുമ്പാവൂര്‍ മേഖലകളിലേക്ക് മരം കടത്താന്‍ കാരണം. മരംമുറി വ്യാപകമായതോടെ ഡാമിനുള്ളിലെ പല ദ്വീപുകളും ഇല്ലാതായിത്തുടങ്ങി. മരംമുറിയെത്തുടര്‍ന്ന് മൊട്ടക്കുന്നായി മാറിയ പല ദ്വീപുകളില്‍നിന്നും വര്‍ഷകാലത്ത് ചെളിയും മണ്ണും ഡാമിലേക്ക് ഒലിച്ചിറങ്ങുകയാണ്. ഡാമിനുള്ളിലുള്ള ചെറുദ്വീപുകള്‍ അക്കേഷ്യ മരങ്ങളുള്‍പ്പെടെയുള്ള മരങ്ങളാല്‍ നിബിഡമാണ്. വനത്തിന് സമാനമായിത്തീര്‍ന്ന ചില ദ്വീപുകളില്‍ കാട്ടാനയടക്കമുള്ള വന്യമൃഗങ്ങളുമുണ്ട്. നിരന്തരം ഇത്തരത്തില്‍ മരങ്ങള്‍ കൊള്ളയടിക്കുന്നത് മലമ്പുഴ ഡാം നികന്നു വരുന്നതിനു വഴിവെക്കുമെന്നിരിക്കെ ജലസേചനവകുപ്പ് അധികൃതര്‍ മരംമുറി തടയാന്‍ കാര്യമായ നടപടികളൊന്നും എടുക്കുന്നില്ല. .