ഭീംപൂര്‍(ബംഗാള്‍): ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റിക്ക് കീഴില്‍ ബംഗാളില്‍ പ്രവര്‍ത്തിക്കുന്ന മദ്‌റസകളുടെ കലാ മത്സരമായ പര്‍വാസ് 2018ല്‍ ഉത്തര്‍ ദിനാജ്പൂര്‍ മേഖല വിജയികളായി.
തിങ്കള്‍, ചൊവ്വ ദിവസങ്ങളിലായി ദാറുല്‍ ഹുദാ ബംഗാള്‍ കാംപസില്‍ നടന്ന പരിപാടിയില്‍ രാംപുര്‍ ഹട്ട്, സാഗര്‍ ദിഗി, മുര്‍ഷിദാബാദ്, ഉത്തര്‍ ദിനാജ്പൂര്‍, ബീര്‍ ഭൂം മേഖലകളില്‍ നിന്നായി നൂറില്‍ പരം വിദ്യാര്‍ഥികള്‍ പങ്കെടുത്തു. രാംപുര്‍ ഹട്ട് രണ്ടാം സ്ഥാനവും മുര്‍ഷിദാബാദ് മൂന്നാം സ്ഥാനവും നേടി. 17, 18 തിയതികളില്‍ അഞ്ചു മേഖലകളില്‍ നടന്ന പ്രാഥമിക റൗണ്ടിലെ വിജയികളാണ് ഫൈനലില്‍ മത്സരിച്ചത്. അഫ്‌സര്‍ അലി (ദിനാജ്പൂര്‍) സീനിയര്‍ വിഭാഗത്തിലും റംസാന്‍ (രാംപുര്‍ ഹട്ട്) ജൂനിയര്‍ വിഭാഗത്തിലും കലാപ്രതിഭാ പട്ടം കരസ്ഥമാക്കി.
സമാപന പരിപാടി പാണക്കാട് സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്തു. അബ്ദുല്‍ ഗഫൂര്‍ ഖാസിമി കുണ്ടൂര്‍, ഡോ. മുന്‍കിര്‍ ഹുസൈന്‍, മുഫ്തി നൂറുല്‍ ഹുദാ, അഹ്മദ് ഫാരിസ് ഹുദവി, ശാക്കിര്‍ ഹുദവി സംബന്ധിച്ചു. ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി പൂര്‍വ വിദ്യാര്‍ഥി കൂട്ടായ്മ ഹാദിയയുടെ ആഭിമുഖ്യത്തിലാണ് പരിപാടി സംഘടിപ്പിച്ചത്.