ന്യൂഡല്‍ഹി: ഐ.എസ് ഭീകരര്‍ വധിച്ച ഇന്ത്യക്കാരുടെ മൃതദേഹങ്ങള്‍ നാട്ടിലെത്തിക്കുന്നതിനായി വിദേശകാര്യ സഹമന്ത്രി വി.കെ സിങ് ഇറാഖിലേക്ക്. ഏപ്രില്‍ ഒന്നിനാണ് വി.കെ സിങ് ഇറാഖിലേക്ക് പുറപ്പെടുക.

38 ഇന്ത്യക്കാരുടെ മൃതദേഹങ്ങളാണ് ഇന്ത്യയിലേക്കെത്തിക്കുന്നത്. ഒരാളുടെ മൃതദേഹം ഡി.എന്‍.എ പരിശോധന പൂര്‍ത്തിയാകാത്തതിനാല്‍ കൊണ്ടുവരാന്‍ കഴിയില്ലെന്ന് അധികൃതര്‍ അറിയിച്ചു. ഇരു രാജ്യങ്ങളും മൃതദേഹം കൈമാറുന്നതിനായി നിയമനടപടികള്‍ പൂര്‍ത്തിയാക്കിയിട്ടുണ്ട്.

2014 ജൂണിലാണ് ഇറാഖില്‍ വച്ച് 39 ഇന്ത്യക്കാരെ കാണാതായത്. ഇവര്‍ കൊല്ലപ്പെട്ടെന്ന വാര്‍ത്തകള്‍ വന്നിരുന്നുവെങ്കിലും കേന്ദ്രസര്‍ക്കാര്‍ അത് നാലു വര്‍ഷത്തോളം നിഷേധിക്കുകയായിരുന്നു. എന്നാല്‍, കഴിഞ്ഞ ആഴ്ചയാണ് ഇവര്‍ കൊല്ലപ്പെട്ടെന്ന വിവരം പാര്‍ലമെന്റില്‍ സുഷമ സ്വരാജ് അറിയിക്കുന്നത്.