തിരുവനന്തപുരം: ഭരണഭാഷ മലയാളമാക്കിയതിന് പിന്നാലെ കോടതിവിധികളും ഇനി മലയാളത്തില്‍. സാധാരണക്കാര്‍ കൂടുതലായി ആശ്രയിക്കുന്ന കീഴ്‌ക്കോടതികളിലാണ് വിധിന്യായങ്ങള്‍ മലയാളത്തില്‍ ലഭിക്കുക.
വിധിന്യായങ്ങള്‍ മലയാളത്തില്‍ ലഭ്യമാക്കുന്നതിന് എല്ലാ കോടതികളിലും പരിഭാഷകരെ നിയമിക്കാനും തീരുമാനമായി. സംസ്ഥാനത്തെ 220 മുന്‍സിഫ്, മജിസ്‌ട്രേറ്റ് കോടതികളിലാണ് പരിഭാഷകരെ നിയമിക്കുക. പി.എസ്.സി വഴിയായിരിക്കും നിയമനം.
നേരത്തെ സംസ്ഥാനത്തെ ഭരണഭാഷ മലയാളമാണെന്നും അതിനാല്‍ കോടതികളിലെ വിധിന്യായങ്ങള്‍ മലയാളത്തില്‍ ആക്കണമെന്നും സര്‍ക്കാര്‍ ഹൈക്കോടതിയോട് ആവശ്യപ്പെട്ടിരുന്നു. എന്നാല്‍ സുപ്രിംകോടതി, ഹൈക്കോടതി വിധികളും നിയമപുസ്തകങ്ങളും മറ്റു റഫറന്‍സ് ഗ്രന്ഥങ്ങളും ഇംഗ്ലീഷില്‍ ആയതിനാല്‍ സര്‍ക്കാരിന്റെ ആവശ്യം ഹൈക്കോടതി അംഗീകരിച്ചില്ല. ഇതേത്തുടര്‍ന്നാണ് കീഴ്‌ക്കോടതികളില്‍ പരിഭാഷകരെ നിയമിച്ച് വിധിന്യായങ്ങള്‍ മലയാളത്തിലാക്കാന്‍ സര്‍ക്കാര്‍ തീരുമാനിച്ചത്.
കഴിഞ്ഞ മാസം 16ന് മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന യോഗത്തിലാണ് ഇതുസംബന്ധിച്ച തീരുമാനമായത്. യോഗത്തില്‍ ഹൈക്കോടതി രജിസ്ട്രാര്‍ ജനറല്‍ അനില്‍കുമാര്‍, നിയമമന്ത്രി എ.കെ ബാലന്‍, നിയമ സെക്രട്ടറി ബി.ജി ഹരീന്ദ്രനാഥ്, ആഭ്യന്തര അഡീഷനല്‍ ചീഫ് സെക്രട്ടറി സുബ്രതാ ബിശ്വാസ്, ധനകാര്യ വകുപ്പ് പ്രിന്‍സിപ്പല്‍ സെക്രട്ടറി മനോജ് ജോഷി എന്നിവര്‍ പങ്കെടുത്തു.
നിലവില്‍ ജില്ലാ കോടതികളില്‍ കാസര്‍കോട് ജില്ലയില്‍ കന്നഡയിലും ഇംഗ്ലീഷിലും, മറ്റു ജില്ലകളില്‍ മലയാളത്തിലുമാണ് കോടതി നടപടി ക്രമങ്ങള്‍ നടക്കുന്നത്. എന്നാല്‍ വിധിന്യായം ഇംഗ്ലീഷിലാണ്.
മലയാളത്തില്‍ വിധിന്യായങ്ങളുടെ പകര്‍പ്പ് വേണ്ടവര്‍ അപേക്ഷ നല്‍കിയാല്‍ അതിന് ഫീസ് ഈടാക്കി മലയാളത്തില്‍ പരിഭാഷ ചെയ്ത് നല്‍കുകയാണ് പതിവ്. ഇനി മുതല്‍ കോടതികളില്‍ പരിഭാഷകരെ നിയമിക്കുന്നതോടെ എല്ലാ വിധിന്യായങ്ങളും അപേക്ഷ നല്‍കാതെ തന്നെ മലയാളത്തില്‍ ലഭിക്കും.
മുഖ്യമന്ത്രിയുടെ നിര്‍ദേശ പ്രകാരം എത്ര തസ്തിക സൃഷ്ടിക്കണമെന്ന് തീരുമാനിച്ച് റിപ്പോര്‍ട്ട് ആഭ്യന്തര വകുപ്പ് ധനകാര്യ വകുപ്പിന് സമര്‍പ്പിച്ചിട്ടുണ്ട്. അടുത്ത മന്ത്രിസഭായോഗത്തില്‍ ധനവകുപ്പ് സര്‍ക്കാരിന് എത്ര സാമ്പത്തിക ബാധ്യത ഉണ്ടാകുമെന്നും, എത്ര തസ്തിക സൃഷ്ടിക്കണമെന്നും റിപ്പോര്‍ട്ട് നല്‍കും. മന്ത്രിസഭ അംഗീകരിച്ചതിന് ശേഷം നിയമന നടപടികള്‍ സ്വീകരിക്കാന്‍ പി.എസ്.സിക്ക് കൈമാറും. സര്‍ക്കാരിന്റെ രണ്ടാം വാര്‍ഷികത്തിലെ പ്രധാന പ്രഖ്യാപനമായി ഇത് മാറ്റാനാണ് സര്‍ക്കാര്‍ തീരുമാനം.
സംസ്ഥാനത്ത് 14 പ്രിന്‍സിപ്പല്‍ ജില്ലാ കോടതികളും, 80 അഡീഷനല്‍ ജില്ലാ സെഷന്‍സ് കോടതികളും, 54 സബ് കോടതികളും, 82 മുന്‍സിഫ് കോടതികളും, 14 ചീഫ് ജുഡീഷ്യല്‍ മജിസ്‌ട്രേറ്റ് കോടതികളും, നാല് അഡീഷനല്‍ ചീഫ് ജുഡീഷ്യല്‍ മജിസ്‌ട്രേറ്റ് കോടതികളും, 127 ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതികളുമുണ്ട്. ഒരു ജഡ്ജി ശരാശരി ഒരു വര്‍ഷത്തില്‍ 3,000 കേസുകളാണ് തീര്‍പ്പാക്കി വിധിന്യായം പുറപ്പെടുവിക്കുന്നത്.
ഹൈക്കോടതി ഒഴികെ വിവിധ കോടതികളിലായി ഏതാണ്ട് 450 ജഡ്ജിമാരുണ്ട്. ശരാശരി 13,50,000 വിധി പ്രഖ്യാപനങ്ങളാണ് സംസ്ഥാനത്ത് ഒരു വര്‍ഷം നടക്കുന്നത്.