റിയാദ്: ജിദ്ദയിൽ നിന്നും പുറപ്പെടുന്ന എയർ ഇന്ത്യയുടെ പ്രത്യേക വിമാന സർവീസുകളുടെ നിരക്കുകൾ പ്രഖ്യാപിച്ചു.  ജിദ്ദ-കോഴിക്കോട് റൂട്ടിൽ എക്കണോമി ക്ലാസ് 1253 റിയാലും ബിസിനസ് ക്ലാസ് 2383 റിയാലുമാണ്. അതേസമയം, ജിദ്ദ-കൊച്ചിഎക്കണോമി ക്ലാസ് 1003 റിയാലും ബിസിനസ് ക്ലാസ് 1553 റിയാലുമാണ്. നേരത്തെ എംബസി  അറിയിപ്പ് പ്രകാരം കൊച്ചിയിലേക്ക് കൂടുതലും കോഴിക്കോട്ടേക്ക് കുറവുമായിരുന്നു ടിക്കറ്റ് നിരക്ക്. എന്നാൽ പുതിയ അറിയിപ്പ് പ്രകാരം കോഴിക്കോട് സെക്റ്ററിൽ നിരക്ക് കൂടുതലാണ്.

       കോഴിക്കോട്ടേക്കുള്ള  വിമാനം ബുധനാഴ്ച വൈകുന്നേരം നാലിന്​​ ജിദ്ദയിൽ നിന്ന്​ പുറപ്പെടും. കൊച്ചിയിലേക്കുള്ള വിമാനം വ്യാഴാഴ്ച ഉച്ചക്ക് ഒന്നിനുമാണ്​ ജിദ്ദയിൽനിന്ന്​ പുറപ്പെടുക. ഇരു റൂട്ടുകളിലും 141 എക്കണോമി ക്ലാസുകളും എട്ട്​ ബിസിനസ് ക്ലാസുകളുമായി അകെ 149 സീറ്റുകളായിരിക്കും ഉണ്ടാകുക. ഇരു വിമാനങ്ങളിലേക്കും  തെരഞ്ഞെടുക്കപ്പെട്ടവരുടെ പട്ടിക എയർ ഇന്ത്യ അധികൃതർക്ക് കൈമാറി.

      ഈ ലിസ്​റ്റ്​ അനുസരിച്ചു എയർ ഇന്ത്യ ഓഫിസിൽനിന്നും യാത്രക്കാരെ ബന്ധപ്പെടുന്നുണ്ട്. വിവരം ലഭിച്ച യാത്രക്കാർക്ക് ജിദ്ദയിൽ മദീന റോഡിൽ പ്രവർത്തിക്കുന്ന എയർ ഇന്ത്യയുടെ ഹെഡ് ഓഫിസിൽ രാവിലെ 10 മുതൽ വൈകുന്നേരം മൂന്ന് വരെ നേരിട്ടെത്തി ടിക്കറ്റുകൾ വാങ്ങണം.