തൊടുപുഴ: ഇടുക്കി യൂത്ത് ഹോസ്റ്റല്‍സ് അസോസിയേഷന്‍ വനം വകുപ്പുമായി സഹകരിച്ച് പെരിയാര്‍ ടൈഗര്‍ റിസര്‍വില്‍ സംഘടിപ്പിച്ച ത്രിദ്വിന സമ്മര്‍ ക്യാംപ് സമാപിച്ചു. വള്ളക്കടവില്‍ നിന്ന് ആരംഭിച്ച ക്യാംപ് മാനംമുട്ടിമല ട്രക്കിങ്, ഗവി-തേക്കടി സന്ദര്‍ശനം, പരിസ്ഥിതി പഠന ക്ലാസ്, പ്ലാസ്റ്റിക് ശേഖരണം, ബോട്ടിങ് എന്നിവയോടെയാണ് സമാപിച്ചത്.
വള്ളക്കടവ് റേഞ്ച് ഓഫിസര്‍ സുരേഷ് ബാബു ക്യാംപ് ഉദ്ഘാടനം ചെയ്തു. ഇടുക്കി യൂത്ത് ഹോസ്റ്റല്‍സ് അസോസിയേഷന്‍ പ്രസിഡന്റ് എന്‍. രവീന്ദ്രന്‍ ചടങ്ങില്‍ അധ്യക്ഷനായി.
തേക്കടി റേഞ്ച് ഓഫിസര്‍ ജോഷി സെബാസ്റ്റ്യന്‍ സമാപനസമ്മേളനത്തില്‍ മുഖ്യാതിഥിയായി പങ്കെടുക്കുകയും ക്യാംപില്‍ പങ്കെടുത്തവര്‍ക്കുള്ള സര്‍ട്ടിഫിക്കറ്റുകള്‍ സമ്മാനിക്കുകയും ചെയ്തു. വള്ളക്കടവ് എക്കോ ടൂറിസം സമിതി ഫെസിലിറ്റേറ്റര്‍ പി.എന്‍. സെബാസ്റ്റ്യന്‍ ചടങ്ങില്‍ അധ്യക്ഷനായി. യൂത്ത് ഹോസ്റ്റല്‍സ് അസോസിയേഷന്‍ ദേശീയ പരിസ്ഥിതിസമിതിയംഗം സി.എം. ആനന്ദന്‍, സംസ്ഥാന അഡ്വഞ്ചര്‍ പ്രമോഷന്‍ കമ്മിറ്റി കണ്‍വീനര്‍ ആര്‍. മോഹന്‍ എന്നിവര്‍ പങ്കെടുത്തു.
കേരളത്തിന്റെ വിവിധ ഭാഗങ്ങളില്‍ നിന്നായി 25 ഓളം പരിസ്ഥിതി സ്‌നേഹികളാണ് ക്യാംപില്‍ പങ്കാളികളായത്.