ദമാം: കിഴക്കൻ സഊദിയിൽ ഒരാഴ്ച മുമ്പ് കാണാതായ കോഴിക്കോട് സ്വദേശിയെ കിഴക്കൻ പ്രവിശ്യാ നഗരിയായ ദമാമിൽ മരിച്ച നിലയിൽ കണ്ടെത്തി. കോഴിക്കോട് കുറ്റിക്കാട്ടൂർ തടപ്പറമ്പ് വീട്ടിൽ മുച്ചുണ്ടി തൊടിയിൽ മുഹമ്മദ് സലീമി(39) നെയാണ് ദമാമിൽ പാർക്കിൽ മരിച്ച നിലയിൽ കണ്ടെത്തിയത്. ഇക്കഴിഞ്ഞ ഒമ്പതിനാണ് ഇദ്ദേഹത്തെ കാണാതായത്. തുടർന്ന് ബന്ധുക്കളും സുഹൃത്തുക്കളും പോലീസിൽ പരാതി നൽകി അന്വേഷണം നടത്തി വരികയായിരുന്നു.

     ഇതിനിടെയിലാണ് കഴിഞ്ഞ ദിവസം വൈകുന്നേരം  ദമാം ടോയോട്ടക്കടുത്തുള്ള പാർക്കിൽ മരിച്ച നിലയിൽ കണ്ടെത്തിയത്. ഡ്രൈവർ ആയി ജോലി ചെയ്തിരുന്ന ഇദ്ദേഹം കുടുംബവുമായാണ് ദമാമിൽ താമസിക്കുന്നത്. ഇതിനിടയിൽ സാമ്പത്തികമായി ഏറെ പ്രശ്‌നങ്ങൾ നേരിടുകയും ഏതാനും ദിവസം മുമ്പ് മാനസിക നില തെറ്റുകയും ചെയ്തിരുന്നു. ഇതേ തുടർന്ന് ഡോക്ടറെ കാണുകയും ചികിത്സ നടത്തുകയും ചെയ്തു. ഇതിനിടെയാണ് ഇദ്ദേഹത്തെ കാണാതായത്. ഭാര്യ: ഹൈറുന്നിസ. മകൻ: മുഹമ്മദ് നാസിഫ്.