കണ്ണൂര്‍: വിജ്ഞാപനവും റാങ്ക് പട്ടികയും അട്ടിമറിച്ച് എം.എല്‍.എയുടെ ഭാര്യ കണ്ണൂര്‍ സര്‍വകലാശാലയില്‍ കരാര്‍ നിയമനം നേടിയതിനെതിരേ ആക്ഷേപം. സി.പി.എം നേതാവും എം.എല്‍.എയുമായ എ.എന്‍ ഷംസീറിന്റെ ഭാര്യ സഹലയ്ക്കാണ് സര്‍വകലാശാലാ സ്‌കൂള്‍ ഓഫ് പെഡഗോഗിക്കല്‍ സയന്‍സില്‍ അസിസ്റ്റന്റ് പ്രൊഫസറായി നിയമനം നല്‍കിയത്. സഹല അസി. പ്രൊഫസറായി ഇന്നലെ ചുമതലയേറ്റു. സര്‍വകലാശാലാ നടപടിക്കെതിരേ കോടതിയെ സമീപിക്കുമെന്ന് പട്ടികയിലെ ആദ്യറാങ്കുകാരിയായ അധ്യാപിക പറഞ്ഞു.
പെഡഗോഗിക്കല്‍ സയന്‍സ് വിഭാഗത്തിലേക്ക് കരാര്‍ അടിസ്ഥാനത്തില്‍ അസി. പ്രൊഫസറെ ക്ഷണിച്ച് കഴിഞ്ഞ ജൂണ്‍ എട്ടിനു സര്‍വകലാശാല വിജ്ഞാപനം ഇറക്കിയിരുന്നു. അധ്യാപന പരിചയം, ദേശീയ അന്തര്‍ദേശീയ തലത്തിലുള്ള സെമിനാര്‍ പ്രസന്റേഷന്‍, പ്രസാധനം എന്നിവയെ അടിസ്ഥാനമാക്കി ജനറല്‍ കാറ്റഗറിയിലാണ് നിയമനമെന്നായിരുന്നു വിജ്ഞാപനം. ജൂണ്‍ 14നു നടന്ന അഭിമുഖത്തില്‍ എം.എല്‍.എയുടെ ഭാര്യയും മറ്റൊരു അധ്യാപികയും മാത്രമാണ് പങ്കെടുത്തത്. 2015 മുതല്‍ ഇതേവിഭാഗത്തില്‍ കരാര്‍ ജീവനക്കാരിയായിരുന്ന ഈ അധ്യാപികയായിരുന്നു റാങ്ക് പട്ടികയില്‍ ഒന്നാമതെത്തിയത്. എന്നാല്‍ നിയമനം നല്‍കിയതാവട്ടെ എം.എല്‍.എയുടെ ഭാര്യക്കും. മുസ്‌ലിം ഒ.ബി.സി സംവരണാടിസ്ഥാനത്തിലാണ് ഷംസീറിന്റെ ഭാര്യക്കു നിയമനം നല്‍കിയതെന്നാണ് സര്‍വകലാശാലയുടെ വിശദീകരണം. എന്നാല്‍ പൊതുനിയമനത്തിനായി വിജ്ഞാപനം ഇറക്കിയശേഷം നിയമനം സംവരണാടിസ്ഥാനത്തിലാക്കിയത് എം.എല്‍.എയുടെ ഭാര്യക്ക് നിയമനം നല്‍കാനാണെന്ന് ആദ്യറാങ്കുകാരിയായ ഡോ. എം.പി ബിന്ദു പറഞ്ഞു.