വാഷിങ്ടണ്‍: കൊവിഡ് പ്രതിരോധത്തിന് മാസ്‌കണിയണമെന്ന ആരോഗ്യവകുപ്പ് നിര്‍ദേശത്തെ പുച്ഛിച്ച് തള്ളിയ യു.എസ് പ്രസിഡന്റ് ഡൊണാള്‍ഡ് ട്രംപും ഒടുവില്‍ പൊതുവേദിയില്‍ മാസ്‌ക് ധരിച്ചു.
രാജ്യത്ത് കൊവിഡ് വ്യാപനം ഉച്ചിയിലേക്ക് നീങ്ങിക്കൊണ്ടിരിക്കെയാണിത്. മാസ്‌കണിയാനും സാമൂഹികാകലം പാലിക്കാനും വിസമ്മതിച്ച ബ്രസീല്‍ പ്രസിഡന്റിന് അടുത്തിടെ കൊവിഡ് സ്ഥിരീകരിച്ചിരുന്നു.
കഴിഞ്ഞദിവസം സൈനിക ആശുപത്രിയില്‍ സന്ദര്‍ശനം നടത്തുമ്പോഴാണ് ട്രംപ് ഇതാദ്യമായി മുഖാവരണം അണിഞ്ഞത്. പ്രസിഡന്റിന്റെ ഔദ്യോഗിക മുദ്രയുള്ള കറുത്ത മാസ്‌കാണ് അദ്ദേഹം ധരിച്ചത്. ആശുപത്രിയിലേക്ക് പുറപ്പെടാനായി വൈറ്റ്ഹൗസില്‍ നിന്ന് പുറത്തുകടക്കവെ ആശുപത്രിയില്‍ മാസ്‌ക് ധരിക്കേണ്ടത് അത്യാവശ്യമാണെന്ന് അദ്ദേഹം പറഞ്ഞു. മാസ്‌ക് അണിയുന്നത് താന്‍ ദുര്‍ബലനാണെന്ന തോന്നലുണ്ടാക്കുമോ എന്ന ഭയത്താലാണ് പ്രസിഡന്റ് നേരത്തെ മാസ്‌ക് അണിയാതിരുന്നതെന്ന് അദ്ദേഹവുമായി അടുത്തയാളുകള്‍ വാര്‍ത്താ ഏജന്‍സിയോട് പറഞ്ഞു.
രാജ്യത്തിന്റെ സാമ്പത്തിക പുനരുജ്ജീവനത്തിനു പകരം പൊതുജനാരോഗ്യ പ്രശ്‌നത്തിലേക്ക് ശ്രദ്ധ തിരിയാന്‍ അത് ഇടയാക്കുമോയെന്നും ട്രംപ് ഭയക്കുന്നു. അതേസമയം ട്രംപ് തുടര്‍ന്നും മാസ്‌ക് ധരിക്കുമോ എന്നു വ്യക്തമല്ല.
താന്‍ ഒരിക്കലും മാസ്‌കിനെതിരല്ലെന്നും എന്നാല്‍ സമയവും സ്ഥലവും നോക്കി വേണം അത് ധരിക്കേണ്ടതെന്നും ട്രംപ് പറഞ്ഞു. ഇന്ത്യയില്‍ നിന്നുള്ള മലേറിയ മരുന്ന് ഹൈഡ്രോക്‌സിക്ലോറോക്വിന്‍ താന്‍ കൊവിഡ് പ്രതിരോധത്തിനായി ട്രംപ് ഇപ്പോഴും കഴിക്കുന്നുണ്ടെന്ന് കഴിഞ്ഞദിവസം വൈറ്റ്ഹൗസ് വെളിപ്പെടുത്തിയിരുന്നു.