കാബൂള്‍: അഫ്ഗാനിലെ ബഗ്‌ലന്‍ പ്രവിശ്യയിലെ പൊലിസ് ഹെഡ് ക്വാര്‍ട്ടേഴ്‌സില്‍ താലിബാന്‍ നടത്തിയ ചാവേര്‍ ആക്രമണത്തില്‍ കുറഞ്ഞത് ഏഴു പേര്‍ കൊല്ലപ്പെട്ടു. 55 പേര്‍ക്കു പരുക്കേറ്റു.
മരിച്ചവരില്‍ സ്ത്രീകളും കുട്ടികളും ഉള്‍പ്പെട്ടിട്ടുണ്ട്. പ്രദേശത്ത് ഇന്നലെ വൈകിയും ഏറ്റുമുട്ടല്‍ തുടരുകയാണ്.
ഇന്നലെ ഉച്ചയ്ക്കു ശേഷം നടന്ന ചാവേര്‍ ആക്രമണത്തില്‍ കെട്ടിടത്തിനു കേടുപാടുകള്‍ സംഭവിച്ചിട്ടുണ്ട്. സ്‌ഫോടകവസ്തുക്കളുമായി വാഹനം പൊലിസ് ഹെഡ് ക്വാര്‍ട്ടേഴ്‌സിലേക്ക് ഓടിച്ചുകയറ്റുകയായിരുന്നു. ഇതിനു ശേഷം ആയുധധാരികള്‍ പൊലിസ് ഹെഡ്ക്വാര്‍ട്ടേഴ്‌സില്‍ പ്രവേശിച്ച് വെടിവയ്പ് നടത്തിയതായും റിപ്പോര്‍ട്ടുണ്ട്. ഇവരുമായി ഏറെ നേരം വെടിവയ്പുണ്ടായതായി താലിബാന്‍ പൊലിസ് അറിയിച്ചു.
ആയുധങ്ങളുമായി പൊലിസ് ഹെഡ് ക്വാര്‍ട്ടേഴ്‌സിലേക്കു കയറാന്‍ ശ്രമിച്ച ഒരാളെ സുരക്ഷാ സൈനികര്‍ വെടിവച്ചിട്ടതായി അറിയിച്ച അഫ്ഗാന്‍ പൊലിസ് വക്താവ്, എന്നാല്‍ മറ്റു ചിലര്‍ കെട്ടിടത്തിനുള്ളില്‍ പ്രവേശിച്ച് വെടിവയ്പ് നടത്തുകയായിരുന്നെന്നും വ്യക്തമാക്കി.
17 വര്‍ഷമായി അഫ്ഗാനില്‍ നടക്കുന്ന ആക്രമണങ്ങള്‍ അവസാനിപ്പിച്ച് സമാധാനം പുനഃസ്ഥാപിക്കുന്നതിന് അമേരിക്കയും താലിബാനും തമ്മില്‍ നേരിട്ടുള്ള ചര്‍ച്ചകള്‍ പുരോഗമിക്കുന്നതിനിടെയാണ് അഫ്ഗാനില്‍ ആക്രമണങ്ങള്‍ തുടര്‍ക്കഥയാകുന്നത്.