സ്വന്തം ലേഖകന്‍

തിരുവനന്തപുരം: സാമ്പത്തിക പ്രതിസന്ധിയില്‍ നട്ടംതിരിയുന്ന സര്‍ക്കാര്‍ ലക്ഷങ്ങള്‍ പൊടിച്ച് കഴിഞ്ഞ നാലര വര്‍ഷത്തിനിടെ നടപ്പാക്കിയ ക്ഷേമ പ്രവര്‍ത്തനങ്ങളെക്കുറിച്ച് സമൂഹമാധ്യമങ്ങളിലൂടെ വന്‍ പ്രചാരണം നടത്താനൊരുങ്ങുന്നു. ഇതിനായി ദേശീയതലത്തില്‍ പ്രവര്‍ത്തനപരിചയമുളള പുതിയ ഏജന്‍സിയെ കൊണ്ടുവരാന്‍ തീരുമാനമായി.  കഴിഞ്ഞ മാസം എട്ടിന് കൊവിഡിന്റെ പശ്ചാത്തലത്തില്‍ സര്‍ക്കാരിന്റെ വികസന പ്രവര്‍ത്തനങ്ങള്‍ സാമൂഹ്യമാധ്യമങ്ങളില്‍ കൂടി ജനങ്ങളിലെത്തിക്കാന്‍ സ്വകരിക്കാവുന്ന മാര്‍ഗങ്ങളെക്കുറിച്ച് വിഡിയോ കോണ്‍ഫറന്‍സ് വഴി കൂടിയ യോഗത്തിലാണ് ദേശീയ ഏജന്‍സിയെ ഏല്‍പ്പിക്കാന്‍ തീരുമാനമെടുത്തത്. 

സോഷ്യല്‍ മീഡിയ ഔട്ട്‌റീച്ച്, ക്വറി മാനേജ്‌മെന്റ്, മീഡിയ ട്രാക്കിങ് ആന്റ് റിപ്പോര്‍ട്ടിങ്, മീഡിയ റിലേഷന്‍സ് പ്രവര്‍ത്തനങ്ങള്‍ എന്നിവയുടെ ഏകോപനത്തിനായി പി.ആര്‍.ഡിയെയും ചുമതലപ്പെടുത്തി. ദേശീയാടിസ്ഥാനത്തിലുള്ള ഏജന്‍സിയെ ഏല്‍പ്പിക്കാനുള്ള തീരുമാനമെടുക്കാന്‍ പി.ആര്‍.ഡി സെക്രട്ടറി ചെയര്‍മാനും ധനവകുപ്പ് സെക്രട്ടറി, ഐ.ടി സെക്രട്ടറി, കിഫ്ബി സി.ഇ.ഒ എന്നിവര്‍ അംഗങ്ങളും പി.ആര്‍.ഡി ഡയരക്ടര്‍ കണ്‍വീനറുമായ ഇവാലുവേഷന്‍ കമ്മിറ്റിയെയും തെരഞ്ഞെടുത്തു. തുടര്‍ന്ന് ഇവരുടെ ശുപാര്‍ശ പി.ആര്‍.ഡി ഡയരക്ടര്‍ മുഖ്യമന്ത്രിക്കു നല്‍കി. ഈ ശുപാര്‍ശ അംഗീകരിച്ചാണ് ദേശീയ ഏജന്‍സിയെ തന്നെ നിയോഗിക്കാന്‍ സര്‍ക്കാര്‍ ഉത്തരവിറക്കിയത്. എന്നാല്‍ ഉത്തരവില്‍ ദേശീയ ഏജന്‍സിക്കായി എത്ര തുകയാകും ചെലവാക്കുകയെന്ന കാര്യം വ്യക്തമാക്കിയിട്ടില്ല. കൊവിഡ് വ്യാപനത്തിനു പിന്നാലെ സംസ്ഥാനം വന്‍ സാമ്പത്തിക പ്രതിസന്ധിയാണ് നേരിടുന്നത്. പദ്ധതി ചെലവുകള്‍ ഉള്‍പ്പെടെ വെട്ടിക്കുറച്ച് ചെലവു ചുരുക്കല്‍ നടപടികളുമായി മുന്നോട്ടുപോകവെയാണ് സര്‍ക്കാരിന്റെ ഭാഗത്തുനിന്ന് ഇത്തരമൊരു ധൂര്‍ത്ത്.