കാഞ്ഞങ്ങാട്: പഴയകടപ്പുറത്തെ ഡി.വൈ.എഫ്.ഐ പ്രവര്‍ത്തകനായ ഔഫ് അബ്ദു റഹിമാനെ കൊലപ്പെടുത്തിയ കേസിന്റെ അന്വേഷണം ക്രൈം ബ്രാഞ്ചിന് കൈമാറും. കേസില്‍ പിടിയിലായ യൂത്ത് ലീഗ് മുന്‍സിപ്പല്‍ സെക്രട്ടറി ഇര്‍ഷാദ് മുണ്ടത്തോടിന്റെ അറസ്റ്റ് പൊലിസ് രേഖപ്പെടുത്തി. ഹസന്‍, ആഷിര്‍ എന്നിവരുടെ അറസ്റ്റ് ഉടനെ രേഖപ്പെടുത്തും.

കേസ് ക്രൈംബ്രാഞ്ചിന് കൈമാറുന്ന കാര്യത്തില്‍ ഔദ്യോഗികമായി ഉത്തരവ് ഇറങ്ങിയിട്ടില്ല. അതേസമയം സംഭവം രാഷ്ട്രീയ കൊലപാതകമാണെന്ന് പൊലിസ് പറഞ്ഞു. വോട്ടെണ്ണല്‍ ദിവസത്തെ സംഘര്‍ഷമാണ് പിന്നീട് കൊലപാതകത്തിലേക്ക് നയിച്ചത്. എന്നാല്‍ സംഭവസമയത്ത് സംഘര്‍ഷം ഉണ്ടായിരുന്നില്ലെന്നും ജില്ലാ പൊലി സ് മേധാവി പറഞ്ഞു.

യൂത്ത് ലീഗിന്റെ കാഞ്ഞങ്ങാട് മുന്‍സിപ്പല്‍ സെക്രട്ടറിയായ ഇര്‍ഷാദ് ആണ് കേസിലെ മുഖ്യപ്രതി. കൃത്യം നടത്തിയത് താനാണെന്ന് ഇര്‍ഷാദ് സമ്മതിച്ചെന്നാണ് പൊലീസ് പറയുന്നത്. കൃത്യത്തില്‍ മൂന്ന് പേര്‍ മാത്രമാണ് പങ്കാളികളായതെന്ന് പൊലിസ് പറഞ്ഞു. ഇന്നലെ കസ്റ്റഡിയിലെടുത്ത ഇസഹാഖിന് കൃത്യത്തില്‍ പങ്കില്ലെന്നും പൊലി സ് വ്യക്തമാക്കി. ഇര്‍ഷാദിനെ യൂത്ത് ലീഗില്‍ നിന്ന് പുറത്താക്കിയതായി സംസ്ഥാന കമ്മിറ്റിയുടെ വാര്‍ത്താ കുറിപ്പില്‍ പറഞ്ഞു.