എടക്കര: കര്‍ണാടക ട്രാന്‍സ്‌പോര്‍ട്ട് ബസില്‍ കടത്തുകയായിരുന്ന മൂവായിരം പായ്ക്കറ്റ് നിരോധിത പുകയില ഉത്പന്നങ്ങള്‍ വഴിക്കടവ് എക്‌സൈസ് ചെക്ക് പോസ്റ്റില്‍ പിടികൂടി. ഇന്നലെ രാത്രി ഏഴോടെയാണ് സംഭവം. മൈസൂരില്‍ നിന്നും തൃശൂരിലേക്ക് വരികയായിരുന്ന ബസില്‍ പ്ലാസ്റ്റിക്ക് ചാക്കില്‍ നിറച്ചായിരുന്നു പുകയില ഉത്പന്നങ്ങള്‍ കടത്തിയിരുന്നത്.
കര്‍ണാടക തമിഴ്‌നാട് സംസ്ഥാനങ്ങളില്‍ നിന്നും വ്യാപകമായ രീതിയില്‍ നാടുകാണി ചുരം വഴി കേരളത്തിലേക്ക് വരുന്ന ബസുകളില്‍ മയക്കുമരുന്ന് ഉത്പന്നങ്ങള്‍ കടത്തുന്നതായി പരാതി ലഭിച്ചിരുന്നു. ഇതേ തുടര്‍ന്നാണ് നിര്‍ത്തിവച്ചിരുന്ന ബസുകളിലെ പരിശോധന വീണ്ടും തുടങ്ങിയത്. പ്രിവന്റീവ് ഓഫീസര്‍ കുഞ്ഞാലന്‍കുട്ടി, സിവില്‍ എക്‌സൈസ് ഓഫീസര്‍മാരായ സുനില്‍കുമാര്‍, വിജയന്‍ മോഹന്‍ ദാസ്, എന്നിവരുടെ നേതൃത്വത്തിലാണ് പുകയില ഉത്പന്നങ്ങള്‍ പിടികൂടിയത്.
കഴിഞ്ഞ ദിവസം നടത്തിയ പരിശോധനയില്‍ മരുന്ന് ലോഡിനുള്ളില്‍ ഒളിപ്പിച്ച് കടത്തുകയായിരുന്ന പത്തുലക്ഷം രൂപയുടെ ബീഡി പിടിച്ചെടുത്തിരുന്നു. ഓണം അടുക്കുന്തോറും കേരളത്തിലേക്ക് മയക്ക് മരുന്നും, മദ്യവും വ്യാപകമായ തോതില്‍ ഒഴുക്കുമെന്ന സാധ്യതയുടെ അടിസ്ഥാനത്തില്‍ കര്‍ശന പരിശോധനയാണ് ചെക്ക് പോസ്റ്റില്‍ നടക്കുന്നത്.