റിയാദ്: ശമ്പളവും ഫൈനൽ എക്‌സിറ്റും ലഭിക്കാതെ ദുരിതത്തിലായ മലയാളിക്ക് സാമൂഹ്യ പ്രവവർത്തകർ തുണയായി. പതിനേഴു വർഷമായി സഊദിയിൽ ജോലി ചെയ്‌തു വരുന്ന പാലക്കാട് , പണ്ടംകോഡ് സ്വദേശി സുരേന്ദ്രനാണ് പ്ലീസ് ഇന്ത്യയുടെ സഹായത്തോടെ നാട്ടിലേക് തിരിച്ചത്. ഇദ്ദേഹം ജോലി ചെയ്‌തു വന്നിരുന്ന സൂപ്പർമാർക്കറ്റ് സ്വദേശി പൗരൻ യമനി പൗരന് കൈമാറിയതോടെ പ്രശ്‌നം ഉടലെടുത്തതോടെ സാമൂഹ്യ പ്രവർത്തകർ ഇടപെട്ടു സുരേന്ദ്രനെ ഫൈനൽ എക്‌സിറ്റ് ലഭ്യമാക്കി നാട്ടിലേക്ക് കയറ്റി വിടുകയുമായിരുന്നു.
       

നദ്‌വയിലെ ബഖാല സ്വദേശി പൗരൻ യമനി പൗരന് കൈമാറിയതോടെയാണ് സംഭവങ്ങളുടെ തുടക്കം. തുടർന്നു അവിടെ ജോലി ചെയ്‌തില്ലെങ്കിൽ റൂമിൽ നിന്നും പുറത്താക്കുമെന്ന് പറഞ്ഞു സ്ഥിരമായി ഭീഷണി പെടുത്തുകയും പാസ്‌പോർട്ട് പിടിച്ചു വെക്കുകയും ചെയ്‌തു. ശമ്പളം കൊടുക്കുവാനോ നാട്ടിലേക്ക് കയറ്റി വിടാനോ തയ്യാറാവാത്തതിനാൽ ജോലിയിൽ നിന്നും മാറി നിൽക്കുകയും ജോലിയോ ശമ്പളമോ ഇല്ലാതെ ദുരിതത്തിലായ സുരേന്ദ്രൻ  തന്റെ സുഹൃത്തുക്കളുടെ സംരക്ഷണത്തിൽ കഴിയുകയുമായിരുന്നു. ഇതിനിടെ സുഹൃത്തും പ്ലീസ് ഇന്ത്യ പ്രവർത്തകനുമായ സുരേഷ് കുളത്തുപ്പുഴ വഴി പ്ലീസ് ഇന്ത്യ ചെയർമാൻ ലത്തീഫ് തെച്ചിയുമായി ബന്ധപ്പെട്ടതിനെ തുടർന്ന് സുരേന്ദ്രനെ നേരിട്ട് സന്ദർശിക്കുകയും കേസ് ഇന്ത്യൻ എംബസിയുടെ ശ്രദ്ധയിൽ കൊണ്ടുവരുകയുമായിരുന്നു.

       ലത്തീഫ് തെച്ചിയുടെ പേരിൽ എംബസിയിൽ നിന്നും അനുമതി പത്രം നൽകുകയും ചെയ്‌തതോടെ പ്ലീസ് ഇന്ത്യ നേതൃത്വം നിരന്തരമായി സ്‌പോൺസറെ ബന്ധപ്പെടുകയും അദ്ദേഹം വഴങ്ങാതിരുന്നതോടെ ഇന്ത്യൻ എംബസിയിൽ നിന്നും ഔട്ട്‌ പാസ്സ് സംഘടിപ്പിച്ച് പ്ലീസ് ഇന്ത്യ നൽകിയ ടിക്കറ്റിൽ നാട്ടിലേക് തിരിക്കുകയായിരുന്നു. പ്ലീസ് ഇന്ത്യ ജനറൽ സെക്രട്ടറി സജീർ വള്ളിയോത്ത്,റഹീസ് വളാഞ്ചേരി, ബഷീർ പാലക്കുറ്റി, എൻജിനിയർ ശ്രീകുമാർ, റബീഷ് കോക്കല്ലൂർ, പ്രജിത്ത് കൊല്ലം, ഷറഫു മണ്ണാർക്കാട്, എന്നിവർ വിവിധ ഘട്ടങ്ങളിൽ സുരേന്ദ്രന് സഹായവുമായി ഉണ്ടായിരുന്നു.