സ്റ്റീരിയോ സിസ്റ്റം, ലൈറ്റ് സിസ്റ്റം, ടൂള്‍കിറ്റ് എന്നിവ കവര്‍ന്നു
തളിപ്പറമ്പ്: ബക്കളത്ത് നിര്‍ത്തിയിട്ട ടൂറിസ്റ്റ് ബസില്‍ നിന്നു 70,000 രൂപ വിലവരുന്ന സ്റ്റീരിയോ സിസ്റ്റം, ലൈറ്റ് സിസ്റ്റം, ടൂള്‍കിറ്റ് എന്നിവ മോഷണം പോയി. തിങ്കളാഴ്ച പുലര്‍ച്ചെ 12.45നും 1.17നും ഇടയിലാണ് മോഷണം നടന്നത്. ബസ് നിര്‍ത്തിയിട്ടതിനു സമീപത്തെ ബേക്കറിയിലെ സി.സി.ടി.വിയില്‍ പതിഞ്ഞ മോഷ്ടാക്കളുടെ ചിത്രങ്ങള്‍ പൊലിസ് ശേഖരിച്ചു. മാസങ്ങള്‍ക്കുമുമ്പ് കുറ്റിക്കോലിലും സമാനരീതിയില്‍ മോഷണം നടന്നിരുന്നു. ഇപ്പോള്‍ മോഷണം നടന്ന സ്ഥലത്തു നിന്ന് തന്നെ വാഹനങ്ങളില്‍ നിന്നു ഡീസല്‍ മോഷണം പോകുന്നത് പതിവായതോടെയാണ് ഇവിടെ നിരീക്ഷണ കാമറ സ്ഥാപിച്ചത്. ഇതിനു ശേഷം ആദ്യമായാണ് മോഷണം നടക്കുന്നത്. ബസിന്റെ സൈഡ് ഗ്ലാസിന്റെ ലോക്ക് തകര്‍ത്താണ് മോഷ്ടാക്കള്‍ അകത്തു കടന്നത്. രണ്ടു സൈക്കിളിലായാണ് തളിപ്പറമ്പ് ഭാഗത്തുനിന്നു മോഷ്ടാക്കള്‍ എത്തിയത്. മോഷണത്തിനുശേഷം ഇവര്‍ തിരിച്ചു പോകുന്നതിന്റെ ദൃശ്യങ്ങളും ലഭിച്ചിട്ടുണ്ട്. പൊലിസിന് മോഷ്ടാക്കളെകുറിച്ച് സൂചനകള്‍ ലഭിച്ചിട്ടുണ്ട്.