ആലപ്പുഴ: നിയമത്തിന്റെ സകലസീമകളും ലംഘിച്ച് മന്ത്രി തോമസ്ചാണ്ടി നടത്തുന്ന കായല്‍കയ്യേറ്റവും റോഡ് നിര്‍മ്മാണവുമായി ബന്ധപ്പെട്ട് നടത്തിയ ക്രമക്കേടുകളും അന്വേഷിക്കണമെന്ന് ആവശ്യപ്പെട്ട് ജില്ലാ കോണ്‍ഗ്രസ്സ് കമ്മറ്റി പ്രക്ഷോഭം നടത്തുമെന്ന് ഡി സി സി പ്രസിഡന്റ് അഡ്വ.എം ലിജു പറഞ്ഞു. ഇതിന്റെ ആദ്യഘട്ടമെന്ന നിലയില്‍ 19 ന് കോണ്‍ഗ്രസ്സ് തോമസ് ചാണ്ടി കായല്‍ കയ്യേറിയ ലേക് പാലസ് റിസോര്‍ട്ടിലേക്ക് മാര്‍ച്ച് നടത്തും.
തുടര്‍ന്ന് കുട്ടനാട്ടില്‍ സമ്മേളനങ്ങള്‍ വിളിച്ച് അഴിമതി ചൂണ്ടിക്കാട്ടും.തോമസ് ചാണ്ടിയുടെ ഓഫീസിലേക്കും മാര്‍ച്ച് നടത്തും. പട്ടികജാതി കോളനിയിലേയ്ക്ക് എന്ന് കാട്ടി ഫണ്ട് വാങ്ങി സ്വന്തം റിസോര്‍ട്ടിലേയ്ക്ക് റോഡ് നിര്‍മ്മിച്ചതും കായല്‍ കയ്യേറിയതും പുറത്ത് വന്നിരുന്നു. ഇതേ തുടര്‍ന്നാണ് കോണ്‍ഗ്രസ് സമരരംഗത്തേയ്ക്ക് നീങ്ങുന്നത്. പുറത്ത് വന്നത് ഗുരുതര വിവരങ്ങളാണെന്നും ഇത് സംബന്ധിച്ച് സര്‍ക്കാര്‍ സമഗ്രമായ അന്വേഷണം നടത്തണമെന്നും എം ലിജു ആവശ്യപ്പെട്ടു. ഇക്കാര്യത്തില്‍ ഇതുവരെ പ്രതികരിക്കാന്‍ മന്ത്രിയോ സര്‍ക്കാരോ തയ്യാറായിട്ടില്ല. അപ്പോള്‍ കുറ്റം ചെയ്തുയെന്നതിന് തെളിവാണെന്നും തോമസ് ചാണ്ടി രാജിവെക്കണമെന്നും അദ്ദേഹം ആവശ്യപ്പെട്ടു. ബന്ധപ്പെട്ട വകുപ്പുകള്‍ക്ക് ഉടന്‍ പരാതി നല്‍കുമെന്നും ലിജു പറഞ്ഞു.